/

咖啡杯測世界亞軍Jaco 熱情下的冷靜篇

身為咖啡愛好者的你,相信和無數咖啡師有相同感受:香港的精品咖啡已經達到世界級水平。

何出此言?近年來在世界級比賽名列前茅的咖啡師人才輩出,今次訪問的對象Jaco(趙朗皓)就是今年新鮮滾熱辣於意大利米蘭奪得世界杯測賽亞軍的猛人,實力非凡。

其實他只投身了咖啡界短短幾年時間,但已建立了自己咖啡店。他的成功之道就是要保持冷靜。其實這條道理,也適用在他的人生中,因為站遠一點,定能看得更清。

保持冷靜

當疫情今年稍為回穩,Jaco便把握機會遠赴意大利米蘭參加「世界咖啡杯測師大賽」(World Cup Tasters Championship),更勇奪亞軍,只屈居南韓選手之下。回想比賽的幾個回合,Jaco對自己的心理表現仍非常清楚。

「我比賽每一回合時間係5、6分鐘完成,都唔係好慢,但絕對唔係快。都攞到8分(每組3杯共8組24杯全中)或者7分(錯1組)。我唔係超級天才,我要做嘅嘢係每一回合,保持我嘅能力可以發揮到最大化。」

來到國際級別場合,選手的實力距離非常微小,取勝原因可能已經不是能力問題,而是在台上那一刻如何表現。

「重點係點樣令自己冷靜。對手平時能力好強,會臨場時候撻咗Q!你緊張就會影響判斷力,你天份幾高都會判斷錯誤。我其實唔冷靜㗎,只係盡量令自己冷靜,而呢樣嘢冇絕對方法,因為個個人都唔同。」

「我覺得認識自己比較重要,要令自己喺比賽時候冷靜,就係唔好諗住任何嘢,settle自己心理狀態,同自己講:『唉我贏唔到㗎啦,但都要最高分咁樣輸。』就係咁嘅前設!」

信心此消彼長

比賽最後回合,Jaco以6分零8秒時間完成,當自己把所有答案都推了出去時,Jaco就是保持着那個思想。

「就係『由得佢啦,我都入咗決賽!』嘅諗法。因為我係最後一個推出去嘅,嗰個回合其他人都快咗,大家都鬥快。我心諗:『輸啦你哋!』有機會贏,就係贏得穩陣,我博你哋出錯。推嗰杯odd cup出去,我保持係冇信心嘅狀態㗎、我贏唔到㗎喇,不過就算輸都係最高分咁輸,每一杯都係咁樣去推,可以話推每一杯都冇信心,因為嗰陣知道我嘅狀態咁樣係最穩陣!好多人會覺得,『你講緊乜嘢呀?』但係嗰陣我了解咗自己狀態,咁樣會發揮得最好!」

成為世界級人馬,Jaco說得輕描淡寫,彷彿不會因此多了甚麼光環。

「我覺得我有天賦,但都有後天嘅努力先至做到而家做嘅嘢。我發現有天賦嘅人都好多,我天賦係咪比人好?唔係!好多人天賦唔比我差,不過我識得認識自己同識得運用天賦,等佢保持最大發揮範圍。贏比賽,係因為狀態控制,我時間唔快,而係要保持穩定。」

專業證書的意義

令人意想不到的是,Jaco不像城中多位著名咖啡師般,考齊所有專業咖啡證書。

「冇讀任何證書,我覺得係個內容吸引我先會去讀證書。功能上,如果我去考world judge嘅話,有張Q Grader 係會吃香少少,如果需要張證書表現某一啲嘢嘅時候,我先會去考。」 

「好多嘢要資料去學習,只要你有足夠多渠道去接受資訊,勤力啲睇多啲唔同嘅書,學多啲、同多啲唔同人傾偈,其實你學到嘅知識可能會比啲課程多。」

獨有感官

更令人意想不到的是,Jaco也沒有像很多以嗅覺味覺搵食的人那樣吃清淡、戒辣之類。

「贏咗比賽,但飲食習慣輸番轉頭!食煙、飲酒、講粗口!食嘢重口味,食拉麵永遠最濃味,最多油、最辣,呢個係我嘅飲食習慣!Cup Tasters決賽前一晚仲食緊煙、飲緊酒,仲要食煙斗嘅!都係重味!」

「我當然有練習,但係練思維同判斷,練習大腦感官,就咁坐喺度感受成個感官過程。將啲嘢食放入條脷,或者個鼻感覺到,然後有資料再存入大腦,再思考分析,判斷食緊啲乜嘢。假設而家條脷掂到一樣嘢,係叫做蘋果,咁我去練習大腦分析速度同準確度。我食所有嘢時,都會好認真咁食,同思考。」

「我自己諗法係可能你食開煙、飲開酒,食到蘋果,正常感覺強度係5度(10度滿分),但你食煙飲酒嘅話,個蘋果得番1度。如果仲有呢個味道資訊畀到你嘅話,我都仍然判斷到,咁就OK 。味道記憶同判斷嘅速度,食所有嘢、飲所有嘢都會用呢個思維去練習。」

他的見解,相信未必人人容易有共鳴。

FruityNutty

論感官味道,Jaco發現不少咖啡店和愛好者,硬要把咖啡分成nutty和fruity兩大陣營,然而這是不是理想的做法?

「講真冇乜嘢真係nutty,但你都係要分fruity定nutty,我諗fruity並唔係fruity,其實係高酸;nutty都未必係nutty,純粹係低酸,味道未必關fruity定nutty事。」

「一開始出現呢種分類方法嘅時候係好事,佢有教育功能,話畀大家知咖啡可以有好多唔同味道。當呢樣嘢普及咗之後就定咗型,定咗型就唔好!所以大家要嘗試飲flavour profile,所以我都唔講fruity定係nutty,我會講杯咖啡實際有啲咩味。」

在訪問下半部分,Jaco會回顧一下入行以來的事跡,他又對香港的飲啡文化以至香港人生活態度有獨特見解,當然也會分享他的瘋狂事,記住留意!

ImNuts

Urban Nutters是幾位熱愛飲食的Nutters成立的網上飲食媒體,訪尋各路飲食精英,深入淺出講解不同的飲食知識,同時召集一眾志同道合的Nutters,組織全港獨一無二的飲食社群。

留言

Your email address will not be published.

Popular