鐵板燒吉祥師: 小芬

你信命運嗎?有人覺得自己可以選擇命運,但更多時候是命運選擇了你。 站在鐵板後的小芬,看上去像是普通的一位鐵板燒廚師,其實她曾經放棄而轉行,但後來這一行還是回來找了她,她更下定決心不再放棄,更希望藉自己廚藝、細心,除了醫飽你的肚,要用開心來感染你,醫好你的心靈。 「日本啲活動好興有吉祥物,我係一個『吉祥(鐵板燒廚)師』!帶開心歡笑畀大家!」


做個有自信一夜御廚

靚牛扒、生猛鮑魚、游水大海蝦……

彷彿已是吃鐵板燒必備、理所當然的主菜,但站在鐵板默默為你烹調的廚師,應該更重要,小芬就是當中一員。當了8年廚師的她,一穿上制服就明白有種使命感。
「我就係客人嘅御用廚師,個廚房已經拎咗出嚟,只係隔籬可能多咗個陌生人咁解。如果喺廚房煮,點樣唔笑、靜都冇乜所謂,但氣氛好緊要,呢個係我哋責任。」
這個資訊開放又爆棚的年代吃鐵板燒,煮得好、食材好已是必然,致勝之處就是:你有甚麼「增值」?
「鐵板燒以煎為主,好容易膩,所以要保護客人個胃。我以前嘅志願係想做醫生 當然我quali唔夠,但仲好想做呢樣嘢,譬如點樣將油膩感減低?見到啲老人家唔食鮑魚,佢哋唔係唔鍾意食,係驚太韌食唔到,所以我切啲裙邊畀佢哋,全部食晒!好腍吖嘛!」
牛柳是經典到極的鐵板燒必備主菜,小芬的廚師生涯中,都不知問過幾多萬句「想要幾成熟?」然而看似簡單,實際又是另一回事。
「個客要五成咪煮五成畀佢,跟住佢話可唔可以熟啲呀?我話再熟啲就去到七八成喎!點知佢其實想食七、八成,因為喺出面成日畀人呃,叫八成得五成,叫五成得三成,冇乜安全感。」
說到安全感,小芬曾遇上一位相信是當西廚的客人,十分擔心他的牛柳。

「我有一個style係將個網擺喺鐵板上盛起牛柳,唧啲水話焗一焗桑拿先,將啲牛柳纖維澎拜番、令佢鬆啲。咁樣蒸佢入面都仲係好生,唔會蒸到熟,你估蒸幾個字咩!嗰個男仔話:『師傅,牛柳熟喇。』仲以為佢講笑,我話邊有咁快吖,不過多謝你提醒我。隔咗唔夠半分鐘佢好認真又話:『師傅,熟喇嚿牛柳!』好唔信我咁樣!我話放心啦,真係未熟嘅,然後揭開個蓋切開畀佢睇,入面真係仲係生嘅。
「其實我EQ幾高,畀『鐵板超』訓練到我EQ好高!我冇怪佢,喺佢個technique嚟講係啱,但佢唔係鐵板燒嘛,驚牛肉熟咗唔啱食,我切開佢再兩邊煎多一兩秒就可以。冇問題嘅,佢又唔係直接教我煮!如果佢叫我落茄汁我唔會落,要牛柳薄燒包隻未剝殼嘅雞蛋梗係唔得啦,呢啲離開咗我範疇!」
不過最好笑有人替他打圓場。
「佢爹哋話:『你講少句嘢冇人話你啞㗎!』」

如何化解尷尬場面?

多年來,站在火燙的鐵板後,看盡冷靜與熱情之間。

「第一道菜後我會問你啲味道啱唔啱呀?想濃味啲定淡味啲?有啲客就唔好意思話你知,佢話OK呀但跟住見佢點鹽,咪即係唔夠鹹囉!」
曾有名女士收了風,到小芬的鐵板燒擒獲所謂男朋友與疑似第三者撐枱腳,兩名女士當然大發雷霆,正當七國咁亂、腥風血雨之時……
「梗係將啲刀叉拎去另一邊先啦,點知會唔會搞出人命?」
又試過疑似不肖子在餐桌因為錢銀問題教訓爸爸,幾杯下肚還一巴掌打向長輩,又弄斷筷子。
「我話你做咩呀?我想救佢爹哋,第一時間又拎開啲刀叉利器先!我話有事慢慢講,唔好嘥咗呢餐!你用唔好嘅心情去食,我幾有心機煮都冇用、食乜都唔好食!同時我就係咁煮快啲啦……」
「我哋而家回味、講出嚟就叫搞笑,嗰一剎就一啲都唔搞笑。」

命運還是選擇了你

8年前某天,還在當侍應的小芬看見飲醉酒的廚師同事煎燶了銀鱈魚,卻若無其事奉予同樣醉了的客人,以為可以瞞天過海。小芬怨憤地向上級投訴,換來輕描淡寫的一句:「你咁緊張做咩啫?但係我教你煮嘢你學唔學吖?」第二天她就獲安排進廚房工作。
「所以要望一望個底先好食呀!哈哈,其實我好鍾意學嘢,好有好奇心!」

不過幹了一段時間,她的感受起了變化。
「我辭過工,因為頂唔順班同事。飲食業畀人形象係點?好多不良嗜好,但全部都唔啱我。你有呢啲興趣都唔緊要,但你開緊工個魂魄唔知去咗邊,可能飲醉酒,要攞碟但攞咗叉,柯打牛柳你就煎隻蝦,好攰,好難一齊做嘢,要執手尾。
「喺佢哋嚟講我係唔正常,令我覺得係咪唔適合呢行?於是去學化妝,因為好鍾意靚同creative,仲做埋freelance化妝師。好鍾意做,因為乾淨、好靚,啲人好認真!我都好鍾意跳舞想做dancer,無奈生得唔夠高,如果企喺後面人哋睇唔到我囉!」

本來大半隻腳踏了出去,差不多百分百投入化妝界,一封邀請報讀餐廳管理課程的信又把她拉回來。
「我真係好好學、好鍾意學嘢!學點樣管理一間餐廳喎!聽講好難考入去,筆試OK咗但面試唔得,我就檢討自己;第二年佢直接寫信叫我去面試,我諗住實得,點知又唔得,又檢討自己。六合彩你唔買都冇得中啦,第三年硬住頭皮再試,嗰年就收咗我。
「個課程將思維全部洗晒,讀咗一年就由想放棄飲食業變咗唔會放棄!以前唔識改變自己,成日都好嬲,但而家知道改變唔到人咪改變自己囉。讀完課程,發現個個好相似,你嘅困難唔係你一個人嘅困難,度度都係咁!我哋互相幫助,唔識解決,就會有同學、老師幫忙,話畀我知點解決,好warm!我係一個感性嘅人!」
起初小芬拉住化妝篋穿梭學校和各開工地點,慢慢發覺還是要專注在一個領域才能做好,針沒有兩頭利,決定專心做鐵板燒。

ImNuts

Urban Nutters是幾位熱愛飲食的Nutters成立的網上飲食媒體,訪尋各路飲食精英,深入淺出講解不同的飲食知識,同時召集一眾志同道合的Nutters,組織全港獨一無二的飲食社群。

留言

Your email address will not be published.