有否認真想過，你每天外出吃飯，從廚房熱辣辣地端到桌上的安格斯牛扒、西班牙黑毛豬、炒雞柳、甚至牛雜，絕大部分其實是急凍肉類？今次的訪問對象Keith，就是供應此等肉類的批發商話事人。
他已經是這盤生意的第三代傳人，哪個國家、哪種動物的肉，賣點是甚麼、如何烹調等等，他都瞭若指掌。
然而本來擁有雙工程學士學位，另一再生能源碩士學位，在跨國工程顧問公司當工程師已有10年的他，當時決定繼承這盤生意，不是因為他無肉不歡，而是全因為一份情。
少時歲月
Keith的公司現在佔了大半層工業大廈，共有約50位員工。然而這門生意的起點，只是一間位於順寧道街市的凍肉零售店，而Keith童年也裝載了不少在街市度過的片段。
「會喺街市、喺舖頭前面嘅紙皮箱玩，爸爸媽咪做生意，冇人理我哋就喺街市推車仔、又會坐入紙皮入面，由街頭推車到街尾！」
「好多時啲老師知道我哋做凍肉，都會成日嚟我哋舖頭買嘢，覺得我哋啲嘢信得過，過時過節買啲鮑魚去煲湯，覺得唔會畀人呃。」
拾級而上
所謂近廚得食，而鄰近食材供應的地方，總有數之不盡的食店，何況Keith那裡是九龍中心地帶。
「周圍有餐廳食肆開始問我爸爸攞貨，就做埋批發。爸爸踩住用嚟運石油氣嗰啲單車運兩三箱凍肉，由長沙灣踩到去深水埗。」
Keith爸爸的生意一直擴充，由單車升級至客貨車，然後一部變兩部，繼而再升級至容量更大的貨車。
「嗰個年代好深刻㗎，因為冇冷氣，坐親架貨van就聞到冤崩爛臭，所以細細個已經聞慣啲味！咁批發嘅生意愈嚟愈多，仲多過每一日賣畀街坊嘅雞翼同豬扒，所以喺兼顧上爸爸有取捨，就選擇咗批發。」
Keith的爸爸，可算是這門生意愈做愈大的重要人物。
動之以情
在Keith之下還有一位弟弟和一位妹妹，不過爸爸從來沒有指明要由子女繼承。
「我爸爸都好開通，冇話一定要做番凍肉生意，所以我哋好早期就去咗澳洲讀書，做咗10年工程結埋婚，冇諗過返嚟香港。」
Keith的弟弟在澳洲同樣修讀工程，但現在在澳洲從事飲食業，而妹妹則在港從事另一行業。
「結咗婚生咗第一個女後，我同我老婆係有信仰，我係基督徒，當時神比咗一個諗法我哋。每次返嚟香港都覺得屋企人喺晒呢邊，我老婆都喺香港呢邊，咁不如返嚟啦，始終中國人思想、家庭觀念！我哋仲咁後生，等佢哋百年歸老先至再返嚟澳洲做咩都得啦！有呢種諗法嗰陣時，好快就決定返嚟接管生意，而爸爸都諗住退休㗎喇！」
華麗轉身
Keith大學畢業後選擇了一間美國跨國工程顧問公司，因為當時這公司有一大工程項目要駐守工地，而不是只坐在辦公室的工程師工作。所以，備有實戰經驗又精通行業運作的他幹了兩、三年已晉升管理層。
「喺澳洲做工程師都幾吃香㗎，但喺香港對工程呢樣嘢我覺得冇嗰個專業感覺。可能你會聽到：『你工程師嚟？我有兩盞燈壞咗過嚟幫我換燈膽吖！外母話水喉壞咗、屎渠塞咗可唔可以過嚟幫我？』變咗五金三行技工！我哋工程師唔係做呢啲嘢㗎！係幫你起緊橋起緊樓㗎！」
親身上陣
Keith放低工程師管理層工作，返港沾手「dirty work」，從世俗眼光來看，可能是很大的落差，反而，Keith從來沒有這種感覺。
「放低工程，返嚟做生意係唔難嘅，對我嚟講，我做乜都得！睇我想唔想嘅啫！返到嚟，問我唔覺得污糟邋遢？一啲都唔覺得！臭味？我聞慣！講生意？可能因為喺生意人家庭長大，由細聽到大，反而會有一種自然嘅感覺！」
既然下了決心，Keith做足準備落手落腳，真正get the hands dirty。
「返到嚟第一件事，即刻學貨車、拖頭牌！有司機邊個扭計，我就上！」
專業證書
要令家族生意持續發展，怎能單靠自己上場開車、切肉。Keith要諗計，不能安於現狀。當時他和爸爸商量，要維持現狀只賺到一點錢，還是要擴大整個業務。
「大家傾完之後，爸爸唔會兩年就話退休㗎嘛，梗係擴張啦！10年前返到嚟第一件事，就係考咗ISO先。嗰陣時未係好多人講食安問題，但周街用緊啲冇冷藏嘅斗車，我話唔得喎，要擴張就唔係淨係想做茶記，要做機構客！入場券嚟就梗係ISO，跟住就搬更大嘅地方！」
返回原點
當時公司在長沙灣舊式工業大廈，升降機還是手拉鐵閘，連他自己也覺得心寒，於是便搬到荃灣現址。而因為工程師背景，工場設計管理都由他包辦，更在三個月內完工。
「當時啲機構客人真係需要ISO證書，起碼有得畀我哋報價。贏吓一個客，跟住贏吓兩個客，咁就擴張到。然後搬埋呢個地方，成件事就完美。」
雖說做了10年工程師，凍肉批發才似乎是Keith的原點。
「唔係誇張，個零月已經上手。首先我街市出身，對我嚟講唔會抗拒，我係好肯去做，冇嘢係做唔到！我一返到嚟就唔係淨係坐喺office，真係會落去工場、落去揸車，每一樣嘢試晒佢！」
「當你自己去做就好快上手，唔自己去做，睇書睇10年都未必識！」
現在已是老闆的Keith，開始與凍肉為伍，到底擴張業務後，他遇到甚麼難關？最麻煩刁鑽的客人是怎樣？他又會分享工作生涯中最瘋狂的事情，記住留意！
