事件起源係十六世紀時值80年戰爭，當時大戰連場，由荷蘭一方聯同盟軍戰鬥西班牙葡萄牙聯軍。
作為荷蘭嘅盟軍英國，緊隨荷蘭嘅腳步同對方展開大戰，喺大戰期間英軍每每見到荷軍嘅戰意非常高昂、勇氣非凡，全部人都非常之好奇到底點解佢哋咁堅揪。
呢個時候，有人就發現佢哋喺打仗之前飲用一種酒精類飲品叫做Genever／Jenever（荷蘭文嘅杜松子酒）。
佢哋就覺得：「嘩咁犀利！等我又飲吓先！」飲完個個都生生猛猛、精力充沛、連戰連勝，派畀佢哋嘅勇氣仲多過梁靜茹帶畀佢哋嘅勇氣，呢個就係英國人開始認識Gin（杜松子）嘅過去。
由呢個時候開始，英軍就開始學飲Gin酒，其後更將Gin嘅文化帶返英國本土。之後慢慢Gin亦成為英國人不可分割嘅酒文化，就係咁開啟咗地球人對Gin嘅狂熱。
作為地球村一員嘅香港，我哋都曾成為日不落帝國嘅一員，好早就開始有Gin 呢隻酒，我就細細個就聽阿媽講Gin酒浸提子乾可以幫助舒緩關節炎。
所以King Robert II Gin就係我第一隻認識嘅Gin，我阿媽就係第一個教我飲Gin嘅人。
後期大個啲可以去酒吧就梗係飲Gin & Tonic，Gin就一定係Bombay Sapphire 啦！又香，個樽又靚，唔識嘅囡囡聽到你咁識叫，一定覺得你好有品味，仲唔溝死囡（我本人係靠樣嘅，呢啲留畀你哋）。
講住咁多先，下次再講下飲Gin除咗可以令你更有勇氣之外，仲點樣可以令你身體健康。One Gin a day，keeps the doctors away。
網上圖片
