原籍台灣高雄的Tony，和本地土生土長的Henry同是經驗調酒師，兩人都在節奏急速、工時冗長的吧枱後工作多年，幾乎沒有一分鐘能停下來。
影響世界的疫情剛好給他們慢慢深呼吸的空間，在居住環境、工作節奏的轉變下，開展了以farm to glass為主題的Glass Gardener。在美味調酒的基礎下，更與香港農夫及本地農作物連結，透過工作坊、客席輪班（guest shift）等讓更多對調酒有興趣，但未踏出第一步進入酒吧的朋友，享受調酒的魅力。
思考人生
Tony和Henry都在飲食業工作了十多年，當中在日式酒吧的歲月佔最大部分，對調酒的感情深厚。可是動輒十四、五小時的工時，營營役役的生活，兩人在收工後根本只想休息，遑論創一番事業。
然而肆虐數年的疫情，使兩人意外地得到靜下來的機會。
Tony說：「因為疫情衍生咗好多出去做catering嘅工作，去人哋屋企、出去教班，原來有需求喎！好多人驚行入去酒吧踏出嗰一步，但係好多人有興趣，只係唔知點樣approach。」
心血結晶在杯內
無獨有偶，兩人都先後搬到大埔村屋居住，空氣和風景都豁然開朗，生活轉變亦使自己重新思考人生。
Tony說：「搬咗之後識到啲本地農夫，了解本地農業嘅現狀。既然Farm to table喺外國好流行，咁調酒師都可以 farm to glass！廚師透過餐桌畀大家認識本地食材，我哋就透過酒杯！」
他們在決定Glass Gardener這名字之前，想了很多有關農田的名字，然後想到解作園藝師的gardener，因為他們覺得自己像gardener般修飾材料再呈獻出來，而所有成效都會集結在杯子裡，終成為了Glass Gardener這個名稱。
梅菜、蘿蔔調酒
香港缺乏天然資源，絕大部分的材料都要靠入口，所以他們更要推廣來自本地具特色的農產物，融入每杯調酒之中，以創造話題。
Henry說：「最近同喺香港種咖啡豆嘅『啡農』合作，而佢隔籬檔有個朋友專做廣東式醃菜。最近佢用咗發酵咖啡嘅水去浸梅菜，再用浸咗梅菜嘅發酵咖啡水去發酵咖啡，而我哋就再用嗰啲水研發一個調酒出嚟！」
談到蘿蔔，香港人一定想到老火湯、炆牛腩，而Glass Gardener兩位也受盡薰陶，把這種家傳戶曉的食材，加入自己心思，來放進調酒中。
Tony說：「前排鍾意醃嘢，自己醃蘿蔔融入調酒裡面，成為有蘿蔔嘅調酒！我哋嘅範疇好闊，我哋仲會鑽研調理技巧。」
Shake得出色
說到調理技巧，酒保在吧枱後調製每杯飲品時的動作往往魅力非凡，Henry初出茅廬時於銅鑼灣的百分百日式酒吧做兼職，因為他當時的老闆shake得很型，所以吸引他向這界別發展。
「成日研究shake cocktail嘅動作，當然之後會着重番個味道，繼而被調味呢樣嘢吸引繼續行落去！」
為了愛情而來港定居了十多年的Tony已在此落地生根。
「雖然我係台灣人，但開始調酒嘅根，都係喺香港開始。」
兩人認識就是因為Tony到Henry工作的地方拜師學藝，加上自己也是日式調酒擁躉，兩人很快傾得十分投緣，即使當時未有合作搞生意打算，但常常一同研究日式調酒，算是為今天打好了基礎。
測試bartender最佳調酒
談到一杯好喝的調酒，要綜合不同原料，味道複雜之餘，而且互相平衡。Glass Gardener雖融入了嶄新的farm to glass元素，但沒有經典調酒基礎，是很難進行創作的，Tony是傳統調酒的支持者，認為材料簡單的款式才是調酒師功力的指標。
「大部份日式酒吧都只做經典調酒，有時去新酒吧都會試吓佢哋嘅招牌，但之後都係想飲基本調酒。經典調酒有個好處就好似出去食炒飯一樣，如果成日都試新嘢你好難比較每個廚師嘅功架係點樣。」
「每次叫Old Fashioned差唔多係基本，一杯好嘅Old Fashioned我要覺得好飲先，人生遇過兩、三杯，甚至有一杯係用碎冰嘅，我從來都冇見過！」
「Manhattan係唔容易整嘅，最麻煩嘅嘢係佢得三種材料，bitters、Bourbon whiskey、vermouth。呢三樣嘢就係所謂調酒嘅炒飯，冇其他味道可以掩飾，只靠你自己記憶，你唔識整就係唔識整！所以我平時都唔係好敢叫Manhattan。」
而Henry異口同聲說注重經典調酒之餘，更重要的是內裡的細節。
「以前返工嚟嚟去去都係整經典調酒畀自己飲，Martini、Manhattan、Negroni。經典調酒材料少，最重要係技術，唔係淨係點樣shake & stir，揀冰嘅細節位要執着，揀咩杯等等，好多玩法。Martini室溫都會有，所以經典調酒都有無限可能性！」
滿足客人為己任
經典調酒全世界通用，但要向客人表現自己，便必須靠創作，在穩固的經典調酒基礎上，再加入Glass Gardener自家元素，成為別人無法取代的作品。
Tony說：「創作調酒係好好實驗嘅嘢嚟，畀客人了解我嘅方式。而家嘅客人係飲得出邊杯係我整！我好注重基本同埋傳統，但始終時代喺度變，我知道Manhattan好好，但受眾未必一定鍾意，要用現代方法呈現出嚟。」
Henry說：「見到街市有乜嘢都可以買返嚟創作，加上而家香港好多人追求新鮮感。我哋最癲嗰陣試過兩星期內有兩場guest shift，當我哋絞盡腦汁創作獨特味道，客人非常喜歡嘅時候，滿足感非常之大！」
Henry和Tony不約而同在此時露出會心微笑，眼角流露自信，可見客人的讚賞和正面反應，是每位調酒師追求的最佳回報，多少錢也換不到。
談到創作，他們繼續滔滔不絕，而兩人自創立Glass Gardener以來亦炮製過了不少滿意作品，他們會在訪問下半部分公開創作新調酒過程！當然也會分享工作生涯中最難忘經歷和調酒夢想！
場地支持：De Luna Tapas Bar & Restaurant (G/F, No.17, Hak Po Street, Mongkok, Kowloon, Hong Kong)
產品贊助： LUNAQUA
