在調酒界有多年經驗的Tony與Henry，因為疫情被迫停工而萌生創一番事業的念頭，創立以farm to glass為主題的Glass Gardener，讓本地農產物可以由杯內的調酒呈獻出來。
兩位話事人一直都是經典調酒支持者，但也熱愛創作，而出自他們手筆的每一杯全新作品，都是變化萬千的經歷。
神來之筆
無論甚麼範疇的創作，也需要找靈感，Glass Gardener也不例外。他們非常注重作品內的新鮮農作物元素，加上本身對味道的敏感度，每杯作品可以是神來之筆，也可以是經歷數星期的大製作。
Henry強調，在腦海中要有充足的味道庫存，更要時刻保持高度靈敏，吸收所有資訊。
「舊年好多時候返屋企煮飯，同埋少咗出去飲酒，好多靈感來自生活上嘅嘢。唔一定係味道，同五感有關嘅嘢都同調酒有關，因為有時都講意境！」
「有次整咗雞煲食完後，用番個煲嚟煲開心果糖用嚟整其他cocktail，點知個煲仲留住雞煲嘅味道，混合咗開心果味道真係唔錯！有當歸、黨參、北芪嗰類藥材原來同開心果咁夾！而家調酒真係甜酸苦辣元素都重要！」
按部就班建構新作
雖然Tony也有類似經歷，但相比之下他則較為學院派。
「經典調酒要學嘅係架構，睇吓五種味道（甜、酸、苦、鹹、旨）點樣由味蕾嘅感官平衡。」
「譬如gin sour嘅甜可以來自普通白糖，但可以係蜜桃，亦可以自製糖漿，例如西芹糖漿、番茄糖漿……至於酸，好多水果都有酸，青檸有青檸嘅酸，西柚有西柚嘅酸，士多啤梨如果未熟嘅話都係酸㗎！所以係無限多變化。」
Tony的創作好夥伴是他的手提電話，有甚麼靈光一閃的idea都先以key words記錄在電話筆記中，待有時間再詳細嘗試。
「去guest shift要創作咁多新酒，要多謝近10年儲落嚟嘅筆記！」
綜合來說，要正規地按部就班創作一杯新調酒，一定先要有主題。有了大方向便再決定主要原料或者主題味道，甚至是一個畫面、一張畫作都可以，然後再細心考慮如何在各方面作平衡的配搭。
「到最後一個過程就比較枯燥，就係不斷試作、不斷refine、不斷改。」
芫荽調酒
即使Glass Gardener只是創立了不到兩年，然而兩人的創作調酒數目已經多不勝數，而Henry暫時最滿意之作，乃極具香港口味。
「係用咗芫荽整嘅cocktail，而基礎係mezcal加tequila、西芹糖、jalapeño辣椒去籽，加青檸汁blend埋一齊再shake，呢個組合好好飲！每一個材料都好重口味，但重得來撞埋一齊有平衡嘅，做到呢一點好滿意！」
始終因為芫荽這材料十分揀客，客人反應亦一如所料十分極端。
「鍾意嘅會非常鍾意，唔鍾意芫荽嘅真係覺得唔得！而我曾經改變過一個客人，佢極唔鍾意芫荽，但佢試完都話其實芫荽都OK呀！」
震撼Manhattan
留在Tony腦海的印象最深刻的，始終都是一杯傳統調酒。
「人生飲過最震撼嘅都係Manhattan！係日本好出名嘅酒吧High Five主理人上野秀嗣徒弟整嘅Manhattan，令我對經典調酒更加鍾情。咁簡單嘅元素佢做到好千變萬化，佢嗰種好飲係我唔識點樣講，呢種層次係可能我成世都整唔到嘅味出嚟，我覺得嗰一下係好震撼嘅，有wow factor！會掛住到睇番張相！」
理想舖頭形象
在酒吧界打滾，在輕鬆氣氛、無限酒精供應下，可謂有甚麼風浪未見過。無論客人還是老闆，失常的、出軌的、暴躁的、不道德的事跡，你想得出的都可以發生，無論如何，這些瘋狂經歷都豐富了他們的旅程。
相信現在更重要的，是放眼未來，壯大Glass Gardener的知名度，讓更多人認識調酒的魅力。Tony和Henry除了在港島區，更到了調酒消費比例較低的九龍區做pop up及guest shift，但至今未擁有自己的店舖。
在這一點，Tony的頭腦十分清晰。
「坦白講未諗咁遠，暫時要強化自己品牌形象先，再做多啲以本地為基礎嘅試驗。」
香港這個金錢掛帥的社會，要開舖實在談何容易。
「如果可以唔諗錢呢個問題，最好可以開一間細細地，有張bar枱，再加三四張枱，幾日式嘅。舖裡面有幾個shelf有自己個名，邊個有返工嘅就開燈。啲客鍾意我哋邊個，咪過嚟搵我哋整嘢飲，一個家庭好close、cozy嘅感覺！」
與文化緊扣
Tony的調酒夢想，已經與這片土地緊緊相扣。
「雖然我係台灣人，但係住咗香港十幾年，我嘅根喺呢度。我好想做一個Hong Kong Cocktail，但唔係淨係用香港食材就叫做香港cocktail。因為好多用香港食材嘅廚師，攞出嚟嘅菜式第一個直覺點解就係西餐？所以呢啲飲食嘅嘢，路線要去番文化層面，做好調製方法。」
榴槤調酒？
Henry則十分實際，着眼點仍是在研發產品這一範疇，而且繼續有點「極端」、「揀客」。
「我諗過做一杯榴槤嘅cocktail，但榴槤加酒精會對身體唔好，同埋榴槤個味太勁，我諗直到我自己有一個地方，會嘗試下。」（按：榴槤內含的硫化物，可能會影響乙醛去氫酵素（分解酒精的酵素）的效用，所以榴槤配酒可能會更易發生面紅、心悸、頭暈等類似醉酒症狀，但對生命沒有危險。）
「如果講一樣產品嘅話，我諗過可食用嘅香水，可能係調酒嘅味道，可以當香水咁用，又可以噴喺cocktail度飲，又或者噴喺食物度。」
最後，Tony和Henry都寄語大家，不能低估任何人實力，驟眼看上去似是普通的客人，可能已經到訪過全世界知名酒吧，飲盡無限美味。換句話說，無論做任何事情，也要保持謙虛學習的心。
這個道理，不只是調酒工作，亦能應用在各行各業。成功沒有捷徑，只要珍惜每次機會，多作嘗試，有時甚至要歷盡艱辛，才有令人印象難忘的收穫。
獎勵用心讀畢全文的您們，Glass Gardener額外提供它們產品的購買優惠。另外，稍後我們還會GG為Urbannutters特別安排的workshop呢！Stay tune :
場地支持：De Luna Tapas Bar & Restaurant (G/F, No.17, Hak Po Street, Mongkok, Kowloon, Hong Kong)
產品贊助： LUNAQUA
