要數近年流行度升得最快的烈酒，可算是gin。它是由杜松子為基礎原料的烈酒，配合其他可由製作者選擇的原料配合而成。撇除最經典的品牌，Gin可算是自由度最大的烈酒。
正因為這種自由度，便吸引了曾在餐廳、酒吧工作的William全力投身推廣Gin的工作。
「你有一個好大mass嘅platform，但係未必個個都命中；定係想做一個好細mass嘅platform，但係每一個人好充足吸收到你畀佢嘅理念？」
相信William一定是後者。
然而Gin這種酒似乎還未成為氣候，所以他會以特別的心情來盡力擴大影響力。
「做嘢唔係唔好怕蝕底，係要怕蝕底！怕自己蝕底先可以攞凸，先可以喺日常工作之中，得到更多！」
日久生情
少不更事的William曾做過一年多普通文職，但在親戚介紹下，好像有點不清不楚般便走進了酒界。
「有個親戚見我冇嘢做就叫我去炒吓散先，見到人做酒吧好似好有趣，但我唔係一個飲得嘅人，都唔係好鍾意、好識飲。」
「跟住做意大利餐，有百幾二百種意大利wine，係接觸酒嘅契機，公司個阿頭再介紹咗我去蘭桂坊做酒吧。」
「嗰時都唔知自己做緊乜，呢個樽攞起，佢個名叫vodka，攞起倒三秒，擺番低斟梳打水、打冰，或者開啤酒樽，嗰樣嘢係乜嘢人都做到！」
每天都被這些可以帶給人樂趣的飲品包圍，他不期然便產生了濃厚興趣，便想辦法要令自己了解多一點。
他自認懶做research，但鍾意坐低上堂，所以他好實在地去認真學習酒精飲品知識，加上日積月累經驗，使他的技術不斷進步。
每天被Gin圍繞
在cocktail bar工作，Gin一直都在他身邊出現。
「我好鍾意用Gin做base，因為brown spirit好難用，味道好實淨，好難打破，cocktail要creativity所以冇得create，嗰個年代最勁係用薑㗎喇！哈哈哈！我係好舊式，用liqueur、用juice做modifier嗰啲人。試過用bourbon整Japanese Slipper，人哋就話嘩好得意呀。至於tequila已有好unique一個style，而rum就甜啦。
「Gin得意啲，有啲citrus有啲spices幾有趣，幾容易去做cocktail。」
不過Gin也有它的局限，就是不像cocktail般有很多故事可以訴說。
「有一日我見到一個女仔，佢話佢生日，佢個名叫Gigi，所以我創作呢杯cocktail就叫Gigi。但係一個Gin、一個tonic，點樣可以講到故事出嚟？好難！呢隻Gin同另一隻Gin對於你嚟講有冇分別？」
能有像Broken Heart Gin般的可歌可泣故事，會有幾多？
「兩個男士成立公司一齊研究，差唔多成功時其中一個死咗，另外嗰個完成遺志，完成呢個Gin嘅recipe。唔係個個Gin都有咁好聽嘅故事！」
「我成日都話，唔係個故事好聽，係我講嘢好聽！哈哈哈……」
不是說笑，一位好的說故事人，絕對有能力令平平無奇的事，包裝得動聽，William絕對有這種能力。憑這種能力，加上曾在著名Gin吧工作，現在他全力投身推廣Gin文化。
積極滲透各層面
「離開咗前線，以前喺酒吧可能係拎住支酒揸住個pour頭就隊落你個口度pour緊。而家唔係純粹想做生意，係一個文化推廣，點樣做呢樣嘢，嘗試加入唔同business裡面。」
例如早前他和時尚運動品牌合作了一天的推廣活動，因為他覺得飲wine是文化、飲whisky是文化，飲咖啡都是一種文化，但Gin還未成為一種文化。
「坊間好多書講烈酒，講幾多度、咩region咩style，但我唔滿足！唔能夠將wine system、whisky system擺落去Gin，因為categorise唔到嗰樣嘢。你可唔可以講大阪Gin咩style？講唔講到吖！呢個世界冇人講到！所以我諗呢樣嘢唔係咁容易令人了解。」
他認為還是要由基礎做起。
「對住唔識Gin嘅人，梗係第一時間講咩味啦！咩味有certain嘅term，citrus喺邊度等等。其實我好期望我每一個我教出嚟講Gin可以話到畀我知，peppery喺邊度嚟，citrus喺邊度嚟，先至講佢咩region。因為冇一個客人想知咩region，佢哋想知飲緊杯嘢係咩味。仲有我哋去學Gin時由個名開始，係法文就唔該讀番法文。」
對市場的使命感
隨時間向前，認識和喜好這種飲品的人數必定增多，想了解它的人數也一定同時上升。
「當你冇一個standard時係唔會last，而家Gin處於transform緊一種文化嘅狀態。Gin可以係所有原料吖嘛，呢樣嘢係幾混沌嘅！Define佢吖？最重要嗰樣嘢要有個名先可以define。例如你叫做William，define呢個人係乜嘢，先present到乜嘢係William。所以要develop一個systematic方法去理解Gin！」
「舉例日本飲食文化，你見到日本Gin，原料喺邊度，一聽到邊個region，你應該要知道柑靚啲，定柚子靚啲。有隻Gin叫Komasa，佢用櫻島嘅小蜜柑，你就知道點解係小蜜柑。中國人話：『柑越淮而止』（優質的柑只於淮河南面生長），啱啱嗰個climate適合種柑，唔係柚子，呢個就係文化嚟，推廣就要base on資料搜集！」
「例如四川Dry Gin一聽就知川椒、辣！中國人梗係知啦，你咪知我講緊乜。要將呢個帶畀個market，嚟緊mission ambition係呢個！」
幸好香港這個彈丸之地的Gin文化走得頗前，人口少少，最高峰時曾有二千多款Gin可買。
「香港飲Gin人口基數大，而且後生咗好多，energetic咗好多，好多女仔鍾意飲。有別於之前嘅酒市場，brandy、wine、whisky、craft beer，Gin帶領好多唔飲酒嘅人入去酒吧！」
最喜歡的Gin是甚麼？
「Crazy Monday。比利時嘅，好得意嘅style，ingredients好分明。佢有9個，飲完就算講唔到9種，你可能都講到3、4種。Alcohol 48%，carry個味carry得好啲，會strong啲。我哋以前做Gin & Tonic pairing，如果strong character嘅Gin會用啲冇乜味嘅tonic、少啲character嘅tonic。唯一呢一種係用Elderflower Tonic，因為佢成個balance做得好靚，一飲落去好分明，加咗Elderflower成個aroma好璀璨！成件事好開心！仲有因為工作關係太容易買，係非常貴，$698一支，但大家都好鍾意成個感覺，要fruity有fruity，要citrus有citrus，要herbs有herbs，要spices有spices，加埋Elderflower Tonic仲有花香！」
即是可以日常飲的Gin？
「冇咁有錢！雖然我prefer比利時。
「澳洲有隻Gin，由一個好樸素嘅女士做，叫Kis distillery，喺澳洲Kangaroo island，自己種田做啲原料。最犀利嘅product係Old Tom，而家啲人好鍾意barrel age啲Old Tom Gin。佢哋用咗sherry桶加French oak！French oak係用嚟浸wine嘅，冇人用French oak嚟浸spirit！好好飲！Wao咩嚟㗎？又有sherry嗰種果味包住French oak本身好重嘅tannin，我真係覺得太犀利！我畀咗好多我覺得佢哋飲酒好叻嘅同事、行家去試，冇人會答你French oak㗎！黐線咩！講完French oak隔籬嗰個一巴星落嚟啦！太好飲喇，又係一種我會就咁飲好多嘅Gin！」
另外，他也推介一款越南Gin叫Song Cai。
在工作生涯中做過最nuts的事情是甚麼？
「學Cocktail嘅師傅講咗句說話好感動，爭啲要喊咁滯，佢話唔希望我哋出到去畀人睇死，香港bartender真係識嘢嘅、真係有價值嘅。咁我真係想推廣酒文化，係咪有啲嘢可以貢獻到？我就同幾個兄弟搞咗個programme叫This is us，喺赤柱大街擺張枱，有一堆嘢帶過去整嘢飲。希望touch唔同嘅人，所以冇做cocktail做咗mocktail。一整日不停整嘢飲，同人做訪問，問吓對於呢個行業嘅了解，特別搵有細路仔嘅，問點樣理解做bartender嘅人。大部分都係講嗰啲好曳、好壞、夜一夜都唔返屋企……到底而家接觸咗我哋之後，會唔會畀你個小朋友有機會考慮去了解吓呢個行業之類。
「其實都係一個achievement，好白痴！冇錢，冇人記得你，冇人appreciate，但係喺人生之中其中一個achievement！」
唔怕蝕底？要怕蝕底！
回想初時入行，William被爸爸一句說話影響了自己，直至現在也一樣影響深遠。事緣當年他幾乎不諳英文，成為他很大的絆腳石。
「去interview，個菲律賓老細好老實咁同我講William，I don’t want to hire you because the whole team are English speaker and you can only answer Yes or No！
「老竇講過一句說話，成世都記得：『出嚟做嘢唔好怕蝕底！』我話錯，出嚟做嘢一定要怕蝕底，返10個鐘頭工出定額嘅糧，點解唔可以攞多啲？
「我成日教啲後生仔，要攞凸呀！由嗰日開始，只要我企喺酒吧，見任何一個外國人我就行埋去approach佢，我試過同一個澳洲人講咗15分鐘嘢一句都聽唔明，真係一句都聽唔明，我都係扮明！」
在日復日扮明之後，William似乎有點成績。
「試過同一個California人講ＵＦＯ！3個月之前我仲係答緊yes or no，不過3個月後我同人哋講緊ＵＦＯ！
「我個人好唔輸得！點解有咁好嘅環境我唔學多啲嘢？人工7千蚊，呢啲邊係錢嚟！我唔攞凸點得？成日勉勵啲年輕人，你返10個鐘做又卅六唔做又卅六，點解唔可以做又卅九唔做又四十？」
職場上人人機會均等，進步和成功與否，就看你肯不肯行多幾步。
「好想佢哋出去同人傾偈，喺唔同人身上學到唔同嘅嘢，approach吓啲外國人啦，唔好淨係approach香港人，唔好淨係溝女！同阿伯傾偈啦，唔止我先同到阿伯傾偈㗎嘛！要學多啲嘢，aside from 10個鐘頭daily work duty，要建立一啲嘢出嚟。所以唔係唔好怕蝕底，係要怕蝕底！」
各位Gin fans也要像William一樣怕蝕底，盡情享受Gin的美味，一同建立屬於我們的Gin自家文化！
