人人都知香港人熱愛日本料理，雖然Omakase開到成行成市，但肯沾手日本活蟹貿易商家的卻幾隻手指數得晒，其中一間就是有超過10年經驗，位於九龍城的「富士水產」。
創辦人Sunny和Frankie兩兄弟一直從事家族的建築生意，但基於對日本蟹的熱愛，便膽粗粗創立這門副業。
本來沒有打算賺大錢，但希望找個地方與客人和朋友分享他們覺得最美味海產的他們，以新鮮松葉蟹、越前蟹等作主打，配合季節刺身，走高檔路線卻結合外賣與私房菜的非一般生意模式，無心插柳柳成蔭，累積無數識食支持者！
不賣蟹先賣牛
做生意，哪有一開始便順風順水？富士水產在十多年前甫開始時，是以和牛作主打。當年Sunny透過一名日本朋友介紹，親身到日本採購整隻和牛，不過一隻幾千磅的牛，值錢的位置來來去去只有幾個部位。
Sunny說：「我哋過去bid一隻返嚟，30幾萬港紙。嗰陣時唔識就成隻買，諗住抵啲，但賣完啲西冷之類，啲下欄位賣唔到出去。蝕錢係因為賣唔晒，同埋和牛好『漏』，啲客買完塊牛扒，下次買就係兩年後。」
雖然當時建立了自己品牌，但採購回來的和牛只能賺回五分一成本。
Sunny說：「（下欄位）如果做漢堡包可以賣$100一個，但我哋冇呢啲餐廳。」
經營一年多後仍不成功，Sunny眼見既然開了頭，便考慮轉型做海鮮，因為自己是個超級日本蟹迷，每年當日本蟹最肥美的時節，他一定親身去到面向日本海的福井縣，駕車遍遊多個地點，吃盡最時令的靚蟹。
Sunny說：「開始入蟹做批發，做做吓啲人就問有冇得賣呀，就搞咗個小廚房幫佢煮埋，但做咗兩三年就同嗰個日本人鬧翻咗，佢成日叫你買貨，原本200蚊1公斤，點知佢賣畀我哋400蚊，嚟到好多蟹又死咗，最後同佢斬纜。」
公司一夜間所有連繫隨之消失，他們要由零開始。
從頭開始
問題來了，蟹從哪裡來？他們膽粗粗像遊客般去到東京的著名海產集散地，暨旅遊景點：築地。
Frankie說：「雖然香港有好多agent我都可以自己搵，但佢哋唔會做蟹嘅，因為難度高。
Sunny道出箇中原因：「魚嚟到香港，係唔係都瞓咗；但蟹唔得，死咗一個鐘後就會臭。」
Frankie繼續回憶獵蟹之旅：「帶咗個識少少日文嘅朋友去，喺築地見到舖面個牌好多蟹就入去問會唔會做出口㗎？其實好多都唔可以做出口，只可以內銷。一間唔得，行晒成個築地！見到有蟹就問，但個個都係NO！（同時兩隻手做出交叉手勢）」
「跟住心灰意冷，諗住再去其他地方……但不如咁啦，去返第一間問多次啦！」
在有點神推鬼㧬之下回到第一間店，那裡的職員見他們有點誠意，又不似是行內人來試探，便答應翌日讓他們見老闆。
更有趣的是，轉頭老闆便回來了，而且一拍即合。原來台北的上引水產，也是使用這間供應商。
Frankie笑着說：「真係好彩！傾完之後就去箱根浸溫泉！」
Sunny補充說：「就算做唔到嘢都要玩！哈哈！」
這間供應商一直合作至今。
「老闆係好直接嘅人，我話約食lunch佢都話唔食啦，傾完就算，每次meeting大約15至30分鐘，真係做嘢嘅！送嘢畀佢都唔要，買奇華畀佢都話下次唔好嘥錢！」
「開頭佢都畀咗好多信心我哋，第一批貨都冇收我哋錢先，可能連供應商本身都覺得好微不足道，跌都跌咗啦！好多supplier要畀定100萬做訂金呀！」
天價成本砌水缸
走出了第一步，然而之後的道路仍然很長。面對蟹容易死的問題，Sunny和Frankie要準備最有利牠們生存的水缸，才能保證蟹的新鮮度。沒有正確的水缸，批發商也拒絕供貨。
Sunny說：「整咗個缸，砌好晒影相畀佢睇！造呢個缸係貴好多，因為魚只要水溫十幾度，但蟹要4度水，所以掉隻蟹落街市啲魚缸，兩日就死！要投資，每個月交電費都萬幾兩萬蚊！」
「第一批越前蟹返到嚟好開心，點知一晚死晒！因為啲水唔啱！」
原來溫度對了，鹽度卻不對。
「啲蟹會甩晒啲腳，賣唔到！卒之自己食咗成個月。」
日本的批發商也很道義，不但教他們調節鹽度，又寄了珊瑚給他們改善水質。
「佢都話好少賣越前蟹畀台灣人，一來因為貴，二來易死。叫我搞下個缸，喺我度養到兩個星期唔死，就話賣畀我。跟住啲越前蟹喺我哋度可以養到一個月，既然越前蟹都養到，咁就叫佢所有六隻腳嘅都攞嚟啦！」
一番努力下，富士水產成為全港第一間有鮮活越前蟹售賣的地方。
最美味回憶
有這種幹勁，皆因美食對兩兄弟來說實在太深刻。問及人生最美味的回憶，Sunny仍然首推在日本的經驗。
「特登11月尾喺福井縣揸車去食越前蟹，但佢最好味唔係蟹，係碗甜蝦飯！個味道入晒腦！因為福井做好多新鮮甜蝦，喺我面前拆20隻新鮮甜蝦鋪晒喺碗飯面頭，嗰碗飯就好似食糖果咁！好緊要！只係3,000円！」
「第二樣都係食蟹，都係福井。松葉蟹好貴，但佢好捨得咁將十幾隻蟹嘅蟹膏倒落個鍋度，用蟹膏鍋烚番啲蟹肉！香港真係做唔到，因為一隻蟹都幾千蚊，喺福井嘅蟹量多，可能有啲斷咗腳嘅蟹只係十份一價錢，就將佢啲蟹膏倒晒落去shabu shabu！」
Sunny流露出來的美味之情，溢於言表。另外他還推介九州福岡河邊大牌檔，一檔細心地用45分鐘製作的鰻魚飯。
至於Frankie的美味回憶，就要數每年冬季到北海道札幌的日航酒店早餐。
「食到北海道當日最新鮮蔬菜或者魚類，再加埋望出去個景好靚、好特別！一舊薯仔，佢話畀你知係十勝嚟嘅，好簡單但真係好食！佢有十幾廿個農場幫佢搵啲菜過嚟，會睇到係邊個農民種嘅，每日早餐都唔一樣，特別令我記憶深刻。」
但兩位也同意，雖然自己對食物要求高，但現況是有時食材太貴，如果路向太刁鑽，也未必能持續發展。
訪問下半部分，Sunny和Frankie會繼續分享營運這門混合外賣和私房菜生意時的趣事、危機和瘋狂事件！
