話說愛好日本新鮮毛蟹、松葉蟹、越前蟹等等靚蟹的Sunny和Frankie兩兄弟，在十多年前創立了富士水產，連出名難養的越前蟹都可以在他們店內養足一個多月也相安無事，成為香港絕無僅有的日本活蟹供應商。
不過，店子以高檔外賣結合私房菜方式運作，在市場上同樣罕有，長久以來都發生了不少鮮為人知的趣事。
獨當一面
做日本海鮮生意的商家多不勝數，但因為日本活蟹價高，加上要保持牠們新鮮生猛的成本更高，Frankie原以為市場會不斷湧現抄襲者，其實現況不然。
「做活蟹生意要投資好多，好多人都費事搞。」
活蟹是主打，但同時也有海產刺身發售。
「出面有啲賣拖羅要買成嚿，客人就要成嚿食晒，但我哋有sashimi platter，價錢分別可能好大，但始終啲人鍾意呢度嘅種類多！我都覺得我哋貴，但啲人會返嚟買，即係佢哋鍾意。」
Frankie口中的sashimi platter是每件切得專業級數，又有齊伴碟，一打開蓋根本是餐廳級數。以為很多競爭對手都做得到？其實又不然。
「你喺舖頭嗌到新鮮魚生，或者走去連鎖壽司店買外賣，都係全部就係咁樣咋嘛！但我搵到人砌一盒魚生有presentation，拎得出嚟可以請客，有花有草咁，香港真係冇喎！有時啲客問番轉頭，除咗我哋之外仲有邊度啲魚生擺出嚟有擺盤、又靚嘅？真係冇喎！」
外賣店？私房菜？
要叫富士水產是外賣店，不是100%正確；叫他們是私房菜，亦不是100%正確。
Sunny說：「我都覺得好奇怪！因為通常做餐廳就唔想做外賣，如果開一間魚生做delivery嘅又想密密做！」
Frankie也同意：「我哋門檻係咪咁高？其實應該唔難。做吓做吓有啲人想抄，抄抄吓做咗一陣但又抄唔足，變咗第二樣嘢。因為呢幾個概念係好怪嘅mixture，係好唔一般，但somehow又work到。呢個生意全世界都冇咁嘅嘢，如果呢件事喺加拿大、美國一定唔work！畀幾千蚊買外賣送返屋企食？不如坐低喺餐廳食！」
要留住有手藝的師傅也是難度，因為工作時間非比尋常地長。
「譬如餐廳師傅11點上場做到2點，通常要落場瞓3個鐘頭抖抖再做夜晚。我哋晏晝嗰場要佢砌埋，連續做5晚私房菜，第朝早10點返嚟仲要切魚生，第二個走咗唔做啦！」
工作生涯最nuts的經歷
所以，即使有獨當一面的日本直送活蟹，人手問題也曾令兩兄弟墮入危機。
Sunny苦笑說：「有個星期日有幾十個order，跟住嗰日朝頭早唔見咗個師傅！原來前一晚佢搵咗份工，第日唔出聲就冇返嚟，幾十個order唔知點搞！」
「惟有即刻call平時幫襯開嘅壽司師傅，問佢哋可唔可以過嚟幫幫手！」
同時Sunny和Frankie也要硬住頭皮親自操刀。
Sunny續說：「蟹都仲識搞，魚邊識切？睇住YouTube學點樣切、不斷喺度摸，直頭擺部iPad喺度……仲要搵個眉鉗掹啲骨出嚟，啱啱嗰排係秋刀魚，好難切！」
「有個客問：『好特別喎你啲魚生，但好少有骨㗎喎？係咪食得㗎？』佢之後就冇幫襯過。始終要交貨，冇辦法！」
這也成為Sunny的最nuts經歷。
至於Frankie則認為，那次膽粗粗地去築地逐間店子敲門，順利成功至今仍然和同一供應商合作中，整個經歷也非常nuts。
平衡心理
現在他們有靠得住的師傅支撐大局，讓Sunny和Frankie可以好好享受這門生意帶給他們的快樂。
Sunny說：「過癮嘅，一來自己認識多好多食材，食多咗好多唔同嘅嘢，就算以前去日本都只會食大路嘢咋嘛，原來海膽有幾百款，味道可以差好遠！」
「食飯又識咗好多朋友，呢盤生意係好開心，啲客打畀你通常都係話好好味呀、多謝你呀，下次再嚟過嗰啲……做建築嗰啲唔係㗎，通常打嚟就係話有冇搞錯，冇好嘢！」
Frankie也滿足地和應：「成日講happy meal，嚟呢度好開心㗎！我哋唔係做特別高檔，始終九龍城畀人嘅感覺唔會好fine，但一齊食好開心！」
不一樣的客人
談到開心，想起有趣的客人，也令人會心微笑。
店子的招牌菜是日本活海鮮，更能為客人煮好、處理好，一打開便能大快朵頤。
Sunny說：「有客人逢星期一都要一隻鱈場蟹再加魚生，個個星期一都訂！我問佢幾多人食，呢度夠6個人食㗎喎？佢話：『3個。』問佢隻蟹要唔要細啲？客人好斬釘截鐵回覆說：『唔使！』」
又有一位客人以另一種方式欣賞這些鮮味。
「有客人買10隻日本象拔蚌同鮑魚，我好奇問佢食10隻日本象拔蚌同鮑魚咁多？仲唔使切唔使處理，原來佢用嚟煲湯！佢老細話咁樣啲湯先夠甜！」
有些蟹種的鉗是一大一小。
「佢話做乜換咗我隻蟹弶呀？跟住我就影番幅蟹相畀佢睇。」
又有懷疑Sunny是黑心商人的客人。
「有啲客好醒㗎，揀一隻活蟹趁我哋唔覺，喺隻腳度剪一下，跟住自己check番係咪剪咗……原來鯉魚門好多會換咗第隻，所以啲客會識。」
未來夢想
一晃眼已經營運了這盤本來沒想到賺錢，又困難重重、高低起跌的生意十幾年，Sunny和Frankie對於未來有甚麼夢想？
看到滿街都是Omakase壽司餐廳，他們的發展路向似乎更加清晰。
Sunny肯定地說：「當個個都係咁樣嘅時候，我哋就唔可以係咁樣！我哋一定要夠focus，開餐廳都要以蟹做主題！」
假如真的由輕鬆外賣店變成餐廳，Frankie覺得要十分小心。
「請多咗員工，就會變成好緊張盤生意，每個月有冇賺蝕，然後會好容易give up on food quality。我哋開始做嗰陣時，都傾過無論點都要做好food quality，一定要keep到。可能個價錢好似咁貴，但我係畀番咁多嘢客人。」
只要產品質素夠好，客人一定回頭。Sunny和Frankie的故事其實是最簡單的教科書層次，只要不被複雜的現實和世俗價值影響，保持初心，誰人也能踏上成功之路。
