李文基師傅帶領富嘉閣十多年，除了出品質素獲肯定，他更具前瞻地引進新能源，締造優良環境予員工。
不過基哥在自立門戶之前，其實是楊貫一的入室弟子，跟一哥炮製鮑參翅肚十多年，但他選擇低調，他的工作之處統統「乾乾淨淨」，一張和一哥的合照都找不到，但一哥給了他很多啟發，卻是不爭事實。
從不標榜
雖然民間有關基哥的報道，都寫及他和楊貫一的師徒關係，偏偏基哥卻從不標榜。
「從來冇話畀人聽係一哥徒弟，從來唔sell嗰啲嘢，你睇我間舖乾乾淨淨。有人話：『阿基呀你啲菜炒得幾好喎，識唔識做鮑魚呀？』先會講我都跟過一哥、喺新同樂做過，你有信心咪試吓囉！」
「因為我好擔心有人講我一句說話，就會影響師傅！我做乜都唔擔心，就算貼錢、返去問老婆攞錢，都捱得過。如果有人話：『你都唔知係咪阿一嗰度出嚟嘅！』壓力會大。」
類似的說話，通常只會出自對自己非常有要求的人口中。
感謝一哥
楊貫一的說話，更驅使基哥專心一意做好鮑魚。
「一哥話，傻仔你炒埋（啲小菜）咪一百幾十（價錢）！我攞隻鮑魚都幾千啦！畀啲心機做鮑參翅肚啦！」
一哥當然有道理，難道走進阿一鮑魚，會吃叉燒包嗎？
「梗係食鮑魚啦，去一哥嗰度食飯，唔係鮑魚就魚翅，再蒸條魚、炸隻雞，整條菜、加碗燕窩，枱枱都差唔多。」
一哥還有廣闊的胸襟，認為中菜不一定局限於某個框框內，基哥也慢慢深得其道。
「平時炒帶子都係白雪雪，一哥就唔係嘅，落啲蠔油，係會有少少顏色，但蠔油同帶子好夾，少少顏色唔係死罪！」
正如西方名廚Jamie Oliver、Gordon Ramsay都加入了很多亞洲菜元素。只要好吃，中菜西菜不用分得那麼細。
「譬如食鮑魚用刀叉，又真係方便啲。一哥唔係好傳統嘅廚師，係做營業部嘅人，出到外國會吸收好多嘢返嚟，思維好犀利，可以變化好多嘢！我覺得點解佢諗到咁多嘢嘅？我就開始去挑通番自己，唔好限制咗自己！我出嘅菜式就等於一套戲上畫，好睇嘅做多兩三個禮拜；唔得嘅兩三日咪落畫囉！」
基哥還要感謝一哥多年來提升了廚師地位，不再被人譏諷為「廚房佬」。
「一哥喺外國攞咁多獎，有『鮑魚大王』稱號。又喺領導人、總統面前做餸，喺法國上議院演講過，畀人認識到佢嘅專業！」
在工作生涯中做過最nuts的事情是甚麼？
「開私房菜都好癲呀！」
話說跟隨一哥十八年後，基哥開始覺得尚未夠空間讓他發揮所有廚藝，於是便開了名為「灣仔人家」的私房菜。
「係喺一哥門下真係只係一人之下咋，控制晒所有嘢，生活又安穩，但後期好想自己闖下，出嚟做私房菜！嗰時瘦咗二、三十磅，本身已經瘦㗎啦！朝頭早起身戴住個headphone，接啲客打電話訂枱係自己，買餸又係自己，成個製作過程又係自己，又要出去招呼啲客，仲要補倉，夜晚聽埋《光明頂》成一點鐘先走！」
他回想，如用金錢衡量回報，是「收咗錢完全搵唔到食」。
「嗰時我都諗咗好多好瘋狂嘅嘢，譬如喺中菜裡面冇人搵動物內臟，我就喺南非搵啲鹿心之類古靈精怪嘢，就返嚟做紅酒煮鹿心，都唔知係西餐定中餐咁，但都會嘗試！」
「每個月都返去同一哥傾偈，希望佢畀啲提示我，連佢都覺得我癲！」
那時候撞正沙士尾聲，亦師亦友的兩人也會苦中作樂。
「問一哥今晚有幾多枱客？佢話得四枱咋！我話我一世人乜嘢都贏你唔到，今晚贏你啦，因為我有五枱！苦中作樂，黑色幽默咁！」
難忘的徒弟
與楊貫一的情誼，造就了基哥努力提拔後人，毫不吝嗇傳授知識，只要有心學，幾乎來者不抗。近來百業蕭條，曾當攝影師、記者的，都來找基哥學藝，希望打開人生新一頁。
講到最難忘的徒弟，他想起在內地時遇上的這一位。
「佢本身切生果嘅，但佢好醒目，我郁一下佢都知道我要乜嘢。我話你唔好切生果，過嚟學做鮑魚！而家佢喺江南，做鮑魚已經獨當一面。」
他的婚禮，基哥也是座上客。
「佢父母見到我係跪喺度！嚇死我！佢話個仔好曳，十零歲成日同啲黑社會打交，就送落去廣州搵嘢做，然後就跟咗我。我完全唔知佢咁曳呀！佢結婚嗰日嗰啲兄弟女婿喺度開大片，飲醉咗打到嘭嘭聲，佢父母話個仔舊陣時就係咁樣！」
「佢生咗仔個名都搵我幫佢改，仲話要嚟香港搵我學嘢！」
肺腑之言
疫情前，基哥其實一直馬不停蹄遍遊中國，為的當然是發揚鮑參翅肚文化，徒弟數目也有上百人。不過基哥時常提醒他們，即使今天能賺到錢，也不代表一世順暢，何時也要有危機感。
「我話畀佢哋聽，有錢唔好賭晒、使晒、飲晒，留番啲傍身。有錢有面子，冇錢就好似乞兒呀！」
「每年都帶十個八個落去澳門，由佢哋輸錢，因為輸咗就知道錢嘅珍貴，以為澳門好容易發達？贏錢就害死你！」
不少肯聽基哥說話的，即使到了近年，在某些省份的鮑參翅肚熱潮過去，仍懂得轉行找出路，不愁生活。
最自豪自創菜式：陳皮香酥骨
「喺私房菜嗰度開始做嘅陳皮骨，唯靈先生食過幾次，話呢個餸都幾好食喎叫咩名呀？咪話陳皮骨囉，好求其。佢同我改咗個名叫陳皮香酥骨，就由2003年賣到今時今日都廿幾年。如果有邊日唔賣呢個餸，就會畀人鬧！」
「有啲朋友會打畀我：『阿基，陣間同朋友嚟食飯，我乜都唔食，淨係食陳皮香酥骨！』」
因為這些好友在別處吃過所謂的「陳皮香酥骨」完全不是那回事，惟有找原創者。
「真係好好笑㗎，佢話頂唔順呀，喺第度食咗都唔知咩嚟！就算米芝蓮三星又好乜都好，真係唔係嗰回事！我都唔係唔公開，唔知點解冇乜廚師跟我個form去做。」
「一講陳皮香酥骨就會諗起我，已經好滿足㗎啦！」
肚子富有
基哥屬鋼條身形，完全沒有肚腩，官仔骨骨，到外地傾生意，別人也不信他是廚師，要他即席炒幾味，才肯談下去。而從某些角度看，基哥有七分像香港首富李嘉誠，巧合地兩人也姓李。
基哥笑着說：「我心中富有，個袋就冇乜錢！」
年過七十的他，雖說打算退休，但曾因染疫而要留家隔離，大罵那幾天悶到發瘋。「雖然我做飲食啫，但我好多興趣。」
談起年前親辦的潮州美食團，參加人數多得坐滿兩架大巴，登時眉飛色舞。由此可見，要他退休也許有點為難。
相信基哥的支持者，絕對希望他不斷以美食使人肚子富有，多過退下來靜靜生活。
