/

社企 糕點時光創辦人  明珠、Anita  婦女力量篇

砵仔糕、茶粿、芝麻卷……大家腦海一定同時浮現幾蚊雞、街邊檔、膠袋仔等等,總不會聯想到兩位九十後女孩,明珠和Anita為了保育兼發揚傳統中式糕點文化,創立專售手造糕點小吃的社會企業「糕點時光」。

而除了售賣傳統糕點,身為社企更有多一重使命,就是讓本地金齡婦女發揮所長,藉製作糕點增強自信。

所以每件砵仔糕、芝麻卷內裡,滿載不為人知的情誼。

市場空間

眼前的Anita,左看右看都像金融界白領;明珠則帶點書卷氣,以為她是小學老師,沒有人會估到她們已是營運數年的社企老闆。對無數打工仔距離萬丈遠的「創業」,已是兩位廿來歲女孩正在走的路。

Anita說:「大家正常會期望大專畢業生出到嚟,都係大公司機構做嘢,慢慢晉升,好少諗自己出嚟開小生意。」

明珠說:「我同Anita好在乎傳統嘅嘢,點解唔可以畀更加多人認識呢?想將啲食物或者將傳統概念好有溫度、好有故事咁傳達畀人知道。香港呢啲好有特色、好有傳統嘅糕點,好多人都覺得老土,我覺得好可惜。」

Anita補充說:「細個時都會見到,係啲老人家做嘅、婆婆喺街邊賣砵仔糕,街市賣茶粿咁。」

反而同類型食品,在台灣、日本等地的地位比較崇高,甚至可以賣天價。愛吃的Anita和明珠,漸漸發現這些小吃,在香港有一定市場空間。

按部就班

初時她們只是開設Instagram戶口,介紹逐漸式微的傳統糕點,又走訪快要結束的小店,拍照和訪問店主,作個文化紀錄而已,並非以創業為前提。

修讀文化保育碩士課程的Anita說:「慢慢好多人以為我哋賣糕點,咁我哋又真係介紹白糖糕、芝麻卷,寫得好明顯唔係我哋賣㗎喇,但佢哋都會inbox問。」

事實上,遍尋網絡,又難以找到售賣砵仔糕白糖糕的網店,所以這門生意,並非突然萌生出來的意念,而是一步一步發展出來。

「我哋一路係傾偈時候jam出嚟,大家都鍾意食嘢,講起傳統糕點大家都有興趣。開頭我哋參加咗社企比賽,得到少少資金,又搵到啲姨姨識得整,不如就請佢哋整呢啲傳統嘅糕點!」

糕點時光由初始只有一位她們口中的「姨姨」製作,到現在超過10位,Anita和明珠都覺得她們才是店子的骨幹,助糕點時光由網店發展成為實體店舖。

「遇到呢班姨姨好有心,係佢哋鼓勵我哋去得更加遠!單憑我哋兩個,絕對做唔到呢間舖出嚟!」

重新出發

品牌名稱「糕點時光 Time to Gold」可以說是向這班「得力姨姨」致敬,即是處於五、六十歲的「金齡」婦女。

明珠說:「首先店名一定有『糕點』兩個字先。而無論糕點,定係一班金齡(Gold)姨姨都希望有重新出發(Go)嘅機會。大家覺得呢樣嘢冇乜價值,係夕陽行業、青黃不接,其實我哋就想由品牌開始,畀多啲機會傳統糕點同埋金齡婦女,所以係Time to Gold。」

「我哋唔想highlight某個年齡,但我哋覺得呢段日子係佢哋好黃金嘅時代嚟!」

登大雅之堂

大家身邊或許存在廚藝出眾,但卻不以為然,並不覺得甚麼回事的女性親戚朋友。讚賞她們時,更可能露出尷尬神情,耍手擰頭不肯承認自己的高超手藝,而「糕點時光」好像為這些姨姨加冕一樣。

明珠說:「我哋希望佢哋用自己手藝,令佢哋有番自信心。好多同佢哋差唔多年齡嘅婦女做慣家庭主婦,就算佢哋係好識得整嘢食,屋企人都未必咁願意讚賞,或者佢哋唔會有好多途徑獲得認同。」

「我哋運用佢哋手藝,將佢哋帶到更大舞台。除咗自己舖頭,仲有網上,同埋各大商場例如希慎、崇光、金鐘Lab Concept,等佢哋認同自己產品都可以去到呢啲地方,令佢哋有更多自信心,我哋可以畀更多人認識產品,形象唔同啲!」

充滿力量

Anita和明珠為金齡婦女做的每一步,都使她們更有力量,也就是品牌的重要口號「婦女充權」(Women Empowerment)的體現。驟眼看這四個字,似乎十分正經,其實都是來自大家最近身的經歷。

Anita說:「疫情下好多媽媽、好多照顧者唔可以返工,又要照顧家庭,收入、情緒壓力、財政上都好大影響。喺屋企大家日對夜對好大壓力,好多爭執,抑鬱症發病率都高咗。我哋覺得佢哋搵工好局限,只可以搵返幾個鐘嘅工,例如清潔、包裝。」

她們都認為,即使廚藝了得,並非能好像某些專業資格般能寫進CV。

「其實佢哋啲廚藝咁犀利,整糕點整咗幾廿年,我哋想畀個發揮所長嘅機會,好多嘢都係雙贏!佢哋有收入維持屋企,自己用到技能幫到我哋又幫到佢自己,仲要去整嘢食嘅時候心情係開心嘅!自己有自信,新糕點好多味道都唔關我哋事,係佢哋研發嘅!」

凡此種種,都令這些五、六十歲,看似平平無奇的婦女在任何時候都充滿力量,成就品牌口號的「empowerment」。

「花生點樣整得脆啲?糯米點樣搓得好啲?呢啲真係靠年月累積落嚟嘅經驗!」

「每次聽到佢哋做完啲order,或者嗰排生意好好,佢哋比我哋更加開心!仲經常鼓勵我哋不斷向前衝,我哋就覺得佢哋係我哋後盾!我諗佢哋真係當我哋係女!遇到好多困難煩惱,都會主動幫我哋解決!」

訪問下半部分,Anita和明珠會道出兩位年輕少女,在創業期間如何把所有困難一一解決!當然她們也會分享在這一門傳統生意之中的瘋狂事!

ImNuts

Urban Nutters是幾位熱愛飲食的Nutters成立的網上飲食媒體,訪尋各路飲食精英,深入淺出講解不同的飲食知識,同時召集一眾志同道合的Nutters,組織全港獨一無二的飲食社群。

留言

Your email address will not be published.