/

社企 糕點時光創辦人  明珠、Anita 多重努力篇

以傳統中式糕點為核心業務的社企「糕點時光」,名字甚有意境,但其實是由明珠和Anita兩位九十後女孩創立。她們看到傳此類被人遺忘的小吃藏着的商機的同時,更為親手製作糕點的金齡婦女開創人生新里程。

事實上,談到砵仔糕、芝麻卷、茶粿等食品,絕大部分人只會覺得便宜、難登大雅之堂,所以她們在建立和營運時都遇到一浪接一浪的困難。

扭轉形象

在電子傳媒工作的明珠,和中學時代好友,攻讀文化保育碩士學位的Anita,在Instagram介紹傳統糕點,後來逐漸演變成一門社企生意,更在西營盤開設了實體店。店舖雖處於舊區,但附近有不少新派咖啡店,加上來自中小學、大學、住宅的客人,人流不錯,開業短短一年已經收支平衡。平日下午時分,店員忙得不可開交。

當然,在華麗背後,卻是孤軍作戰的困境。

Anita說:「我覺得最難係要點樣扭轉負面印象,幾十年來中式糕點都覺得係擺街邊、白膠袋笠住、好平呀、水蒸汽呀……要改變根深蒂固嘅諗法。」

要用「根深蒂固」來形容,是因為這些食品,不能單靠改改包裝、說說故事,效果便可一下子顯現出來。

「因為唔會做咗一樣嘢,就即刻見到效果!」

「例如茶粿,唔係做咗款新嘅外型即刻成件事會唔同,係各方面、每人要做啲事。我哋要出個食廠牌,令佢喺持牌環境合法生產;用有機材料去做,希望健康啲;唔用精製糖而用甜菊糖呢樣天然甜味劑,食完之後對血糖影響冇咁大,因為好多老人家成日要篤手指計住數。」

「之後仲有包裝方法,唔可以就咁用白膠袋,點樣靚得嚟,味道又保存得好?所以有獨立包裝就衛生啲,拎嗰時唔會油淋淋。跟住口味上,啲人覺得眉豆好老土,有人鍾意食辣,我哋做咗辣嘅鹹茶果,客人又想試吓!」

外型也要打破框框,加了眼耳口鼻和不同顏色,所以能成為打卡熱門。

Anita一口氣地解釋了一種產品的改革,絕對是由核心內圍到核心外圍,缺一不可。即使如此,成效也不是一朝一夕顯現出來。

「咁樣做係咪動搖到啲人?都唔夠膽咁講!要逐啲逐啲做,仲需要時間。」

從錯誤學習

市面上有規模地售賣此類糕點的店舖寥寥可數,明珠說當遇到困難時,好多時只能靠自己摸索,從錯誤中學習。

「孤軍作戰咁,尤其是遇到困難時。傳統中式糕點因為係蒸煮出嚟,新鮮時一定會有水蒸汽喺面,唔同曲奇餅嗰啲整完好乾爽,可以擺好耐。所以產品點樣保持靚嘅樣?真係冇咩人可以答到我哋!」

現時採用的包裝,是經歷無數失敗和摸索出來,但明珠仍未感到最滿意,尚有改良空間。

另外,也不能一本通書睇到老,一味改革又不代表是好事。以砵仔糕為例,最受歡迎的仍是最傳統的黃糖白糖口味,所以明珠說不能在味道和形狀上過分創新,反而推出了DIY套裝,有齊材料和教學片段,只要有家用煮食爐和水,任何層面的人也能輕易地製作這種好味小點。

在這門生意當中,明珠和Anita做過最nuts的事是甚麼?

兩人異口同聲說:「疫情下開舖已經夠瘋狂!」

Anita說:「疫情底下條條街都係吉舖,但我哋疫情下去開舖!個個都執笠,啲做糕點嘅都話退休,但我哋就兩個後生嘅辭埋正職嚟做,呢啲都係very nuts!」 

明珠補充說:「我都同意!所有都係呢一年嘅事,由網店去到實體,我哋又好主動去打入多啲更大嘅市場,好多人眼中覺得好瘋狂!又有人覺得我哋得唔得㗎?玩玩吓嘅啫!但真係冇諗到啲嘢會成真,令我哋覺得呢件事好瘋狂!」

天衣無縫

言談間,感到明珠和Anita的確是感情很好的夥伴,其中一位要回應電話或應對客人查詢時,另一位便能無縫地補上回應問題。這種默契,在生意合作上肯定是不可多得。

Anita笑着說:「有咩都係傾㗎咋,將大家嘅理據講出嚟。好彩大家年紀差唔多,想達到嘅嘢差唔多,咁都係好嘅!唔會一個人好想搵錢,另一個只係想食好嘢,其實都係健康嘅。」

「反而因為比較friend,成日話開會啦,點知我哋講吓啲『哎吔我最近有啲唔開心……』講吓講吓就講咗十幾個鐘都未開會!」

「公司有個WhatsApp group,suppose講正經嘢,但實在忍唔住講咗其他嘢,嗰條裙好靚呀……拍拖點點點……」

繼續保育

政府雖有把茶粿列入香港非物質文化遺產,但後續行動乏善可陳,所以明珠和Anita希望在新一年,趁世界逐漸回復正常,「糕點時光」可以透過更多面對面的公開活動、工作坊等,繼續履行保育傳統糕點的使命。

適逢農曆新年將至,兩人不忘推薦自己的最愛產品。明珠最愛放在店子冷櫃內的流心芝麻卷:「好多客人都好鍾意,好少見到芝麻卷可以做流心。平時食開嘅芝麻卷,只得一種口感,就係爽、滑脫脫咁樣,我哋加咗特濃芝麻醬,食嘅時候一直流心,有視覺效果,又有味蕾衝擊,口感多層次,自己都幾滿意!」

Anita就介紹了最新的賀年糕點黃金甘栗南瓜糕:「做產品研發時,會問所有姨姨嘅意見。有姨姨同我哋講佢每年都整南瓜糕,請佢以前所有同事食,仲每人一底!連唔食南瓜嘅人都好鍾意!我就覺得要推出市面,因為係佢好獨家嘅配方,而且我哋一滴水、一滴糖都冇落,真材實料,只靠日本南瓜本身甜味,加上金黃色好好意頭!」

不論是砵仔糕、茶粿,甚至是賀年糕點,除了真材實料的美味,更有人情味,有社會使命,有文化保育,每一口都可裝飾與締造每位香港人每分每刻的時光。

歡迎瀏覽糕點時光的網址了解更多:

https://timetogold.org/

ImNuts

Urban Nutters是幾位熱愛飲食的Nutters成立的網上飲食媒體,訪尋各路飲食精英,深入淺出講解不同的飲食知識,同時召集一眾志同道合的Nutters,組織全港獨一無二的飲食社群。

留言

Your email address will not be published.