論備受注目的准揚菜式，當然數之不盡。不過無論在大小場合，准揚菜餐桌上必備的肯定是多款包點：小籠包、鍋貼，而生煎包更加是必食！
而在香港擁有40年經驗的生煎包師傅，絕對要提一直於「雪園」品牌工作的明哥。
師承准揚名廚蔣標的他，一入行便遇上他口中是「奇才」的蔣師傅，至今對他影響深遠。師傅教落，「勤力、絕不馬虎」，才能做出風靡全城的生煎包。
主動應徵
明哥入行當廚，可謂完全沒有波折。八十年代初，還是二十出頭的他，看見蘇浙同鄉會登報招請廚房學徒，便主動去排隊應徵。
「突然間好想做廚房，嗰陣時冇諗咁多嘢，後生仔生活好單調。十幾個𡃁仔見工，請三個人，其中一個揀咗我。」
本來他在舅父的洋服店工作，雖是一門手藝，但明哥爸爸喜歡烹飪，多少得到一點遺傳，所以寧願放棄衣車。
「做車衫車褲嗰啲，成套西裝我都識做㗎！但一對住個衣車就眼瞓，愈做愈眼瞓！」
遇上名廚
初出茅廬當然甚麼也要做，剛好當時的蘇浙同鄉會的點心部欠缺人手，明哥便展開了點心師傅的路。
「當時好勤力，切嘢、洗嘢、開麵、打高力…… 乜鬼都要做！」
而全力教導明哥的，便是名廚蔣標。明哥十分欣賞他的細心，而且大讚他不慍不火，十項全能。
「佢唔會點樣鬧人，修養好好，點心、爐頭、砧板都全能，真係奇才！（在冬瓜、蘿蔔、青瓜等伴碟）挑龍挑鳳都識，簡直係我偶像！做嘢好精細，到而家我都學唔到。」
當時學藝未精，但蔣標仍肯用不同方式，希望徒弟成才。
生煎包要做得好，最重要的始終是人。沒有精準的手藝，擁有最優質的材料也是徒然，而明哥對蔣標師傅的尊敬，可謂溢於言表。
「師傅真係好好，耐心教，仲教得有深度。佢真係上海菜嘅奇人，不止識，仲要做到精！師傅真係我偶像。」
「初初做，我做完嗰啲點心做得好醜樣咁就擺喺度，之後借啲意走去做第樣嘢。師傅就拉我埋嚟，仲𢳂埋啲餡畀我包，佢話要好似刀咁，唔好就要操！捉住我嚟練包點心！所以我覺得佢呢個人非常之好！」
蘇浙同鄉會的廚房人材濟濟，一到了吃飯時間，就可能是師傅的發火時間。
「如果啲𡃁仔員工要開飯餸，但未排到你，會即刻畀師傅捉走，佢就話：『唔到你炒，要第二個嚟炒！』因為嗰陣時啲人爭住去做，因為平時冇機會去兜鑊㗎嘛！」
扶搖直上
明哥感到蔣師傅對他的好，除了磨煉他的手藝，也非常關心他的生計。除了定時加人工，還給予機會他外闖。
「有人開張搞間新嘢，師傅叫我出去做。嗰陣時好單純，師傅叫我去咪去囉！」
在新場除了管理所有點心製作，更要管理員工，但工作一會後，明哥覺得力有不逮，惟有決定在城中其他小食館到處落腳一陣子，但始終不覺踏實。
「跑咗兩年，到北角雪園開咗之後幾個月，師傅喺出面拉我返去雪園做，做咗兩年到就升咗我做大佬。個心當然定啲啦，有師傅睇住！」
到銅鑼灣雪園開張，蔣標依然關照明哥，安排點心部主管崗位給他，又送他股份。
「師傅好欣賞人勤力、肯做，唔好怕蝕底。佢係咁教我：其實人唔好怕蝕底，愈蝕底其實自己愈着數。做，就一定要做到最好，如果做唔好不如唔好做，做好今日，不要為明天擔心！今日做唔好，聽日梗係擔心啦，因為聽日就會冇得撈喇！」
一晃眼已過三十多年光景，而明哥現時在灣仔南洋酒店的「雪園壹號」（前名「老雪園」）工作。
「我一生之中，識兩個人就夠啦！一個偉哥（蔣標之子蔣偉源，「雪園壹號掌舵人」），另一個佢老竇！咁樣直情係我一生人呀！」
在訪問下半部分，明哥會分享生煎包美味奧秘，也會分享生涯之中最瘋狂的歲月。記住留意！
