在訪問的上篇，Ricky分享了他創業的因由及無心插柳下如何把工作經驗應用於Kind of Brew。這一篇會深入了解在咖啡酒館這個空間所製造出的人情味和回憶，感受店舖為城市人帶來的「溫度」和「質感」。
溫度小故事
問及Ricky有沒有甚麼與客人之間的小故事可分享一下，他立即說客人為他帶來了很多歡樂，想也不用想就說了好幾個例子。
有兩位在香港中文大學修讀法律系的女生令他留下深刻印象。「佢哋通常喺平日嚟呢度飲咖啡溫習。有一日佢哋專登嚟舖頭同我講話：『我哋合格咗啦！』」Ricky沒想到她們會突如其來「報喜」，感覺自己有點像她們的爸爸，又感恩客人把他當成了能分享喜悅的朋友。
「有客人埋單時鼓勵話：『好鍾意呢度個環境，希望你哋繼續努力，唔好咁快執笠啦！』，我聽完都唔知笑定唔開心好！」
另外，又有些客人會在農曆新年時送年花、光顧時順道帶來台灣愛文芒、旅行後會專程來給手信，有些更會在外地買黑膠碟送給 Ricky⋯⋯Ricky深感這些都是錢買不到的東西，感激遇上這麼好的客人。
對爵士樂的第一印象
Kind of Brew的成立初心蠻簡單，就是想有一處讓朋友相聚，呷口咖啡聊聊音樂，讓人好好歇息的地方。看到店內的軟裝、咭片和社交媒體上的介紹都充斥著「Jazz」元素，本以為他對爵士樂自小結下不解緣，或者是一聽鍾情，誰料他首次聽爵士樂音樂時不到三秒便擲下耳機。
Ricky對「鼓」情有獨鍾，小學初接觸樂器時首選學鼓，不過當時導師看到他身高和指長的優勢，建議他嘗試大提琴，因此他一開始接觸的是對音節和拍子講究的古典音樂。
至於第一次真正接觸爵士樂，則追溯至小學後期。當時在灣仔藝術中心的唱片試聽室，Ricky與一起學習大提琴的同學選了一張有「爵士樂」字樣的唱片，誰不知耳機一掛上沒一會兒，他和同學對望交流了眼神，便立刻放下。
「完全同想像嘅「爵士樂」唔一樣！中文翻譯叫爵士樂，「爵士」感覺上好優雅，好高級；原來同平時聽開嘅古典音樂完全唔同。」隨人生歷練及時間洗禮，Ricky漸覺聽流行曲已不夠滿足，相反爵士樂中演奏者隨著拍檔或現場表演氣氛而改變的Jazz music更得其歡心。
店名Kind of Brew也是由此啟發出來
「Night GIG」之誕生
「Jazz嘅靈魂就係improvise，即興嘅音樂，但我由細到大嘅classical music training就係跟住指揮，對住音樂譜，所以愈聽就愈覺得呢件事好有趣。即使而家我已經接觸咗一輪，我依然覺得玩jazz嘅musician好勁！ 佢哋完全唔洗夾，一埋位一彈jam得好有默契，出嚟嘅感覺好正！佢哋真係好厲害。」訪談過程期間每次說起爵士樂相關的資訊時，Ricky總能娓娓道來，亦正因為對爵士樂的鍾愛，他在籌辦Kind of Brew的初期已決定要在店內辦音樂活動。當社交限制放寬後，恆常活動「Night GIG」自然正式露面。
「有心」大於一切
「有咗Kind of Brew後，我識多咗好多玩爵士樂嘅音樂人， 我覺得99.9%嘅人都好nice， 對呢件事好有passion，完全唔計較。感覺上玩爵士樂嘅人都有一個共通點，就係只要大家覺得係自己人，大家都鍾意爵士樂就OK喇。譬如我去搵啲音樂人嚟表演，我問咗音樂人啲定價，我就畀錢；之後再接觸唔同嘅音樂人，無論佢係大師級都好，一個初出茅廬嘅年輕樂手又好，我都係畀相同價錢，咁耐以嚟都冇人講價，大家都想為Jazz Music出力！」
三方信任 享受無限
Ricky找音樂人參與Night GIG，從來不過問當中的內容和流程安排。
「既然我欣賞同相信佢，呢一部分就應該交由佢哋全權負責，我絕對相信佢哋嘅專業！」
「對於觀眾，我哋當然都會定立啲小規則，例如表演開始咗就唔會再serve drinks，呢個都係對樂手嘅尊重。」
「音樂人好欣賞呢點，所以我覺得喺音樂人圈子裡，我哋嘅名聲應該都唔錯嘅，當然觀眾質素都好高啦。我營造一個理想嘅環境，佢哋可以好放心咁去玩一啲佢哋鍾意嘅音樂，大家都可以全神貫注享受。」
苦盡甘來
活用餐廳空間或在非繁忙時間舉辦活動，亦是疫情期間餐飲業的一個大改變，雖然Ricky在籌備Kind of Brew初期就已考慮畫出舉辦小型音樂會的靈活空間，但活動正式進行時又有沒有遇到甚麼困難呢？
Ricky坦言辦音樂會的事前準備功夫絕對不容易。活動通常在週五或週末舉行，但眾所周知這些時間同樣咖啡店生意「最好」的時候，所以又一次要「平衡」。
「6點一清場就即刻set場set音響，同時樂手就嚟sound check。尤其啱啱開始搞嘅第一兩次嘅時候係有啲混亂，不過慢慢改善，大家熟咗就愈嚟愈好。」
「我通常匿埋喺咖啡機後面睇，當樂手彈第一粒音，我就覺得幾辛苦都值得喇。見到觀眾都好enjoy，我就覺得已經超越咗一盤生意。大家都做緊一件大家好鍾意嘅事，只不過大家扮演嘅角色唔同，我提供一個平台、音樂人提供音樂、聽眾就去支持你、支持音樂人，同時我又去enjoy顧客嘅支持。」
Ricky在硬件上提供了舒適且設備完善的場地，軟件方面則因三方信任加上高水準的演出，軟硬件相輔相承，令整件事都昇華，如魚得水，成就了現在在香港爵士樂界都知悉的Kind of Brew。
「盡做！」
大家都知道Ricky開設這個地方，首要目標不是為了賺錢。
「香港開嘅咖啡廳，大多數都趕頭趕命，食完嘢就走，好似想坐低睇書其實都唔容易⋯⋯ 呢度正正就係想你慢慢嚟，如果你留低慢慢享用享受呢個空間，我反而更欣賞。如果真係要賺錢，不如去開三餸飯店！搞爵士音樂，喺香港就算你幾成功，一定唔係一件能夠賺大錢嘅事。」
大家沒說出口，卻有默契地在宣傳爵士音樂。這個默契，就是希望Ricky的咖啡酒館能夠維生，樂手繼續有個地方可以玩爵士音樂。默契能在不知不覺間形成，因為無論樂手還是客人都知道營運Jazz Cafe，尤其是在香港更加不容易，那種仗義相助的感覺，在這個圈子裡，特別是香港社會，是很難得的。
天時地理人和
客人、Jazz愛好者、家人的鼓勵和支持成為了Ricky的無形動力，往往這些聚沙成塔的小故事總能默默地在困惑時給予大家安慰和支持，也是令他們繼續努力、不放棄的原因。
「Work咗一年望返轉頭，好多嘢好似set定好晒等緊你嚟做。就好似舖位咁，就算我見到佢好靚，但人哋未必賣，但呢度啱啱好放盤，裡面嘅嘢亦ready好晒畀你咁，Bingo！好似天時地利人和，我哋都有少少咁就開始咗。」
Kind of Brew剛慶祝了一周年，相信Ricky在未來必定會繼續在這個有魔力的小空間內把咖啡、爵士樂和美酒這三個元素再撞出新搞作，絕不會讓我們的期待落空！當然，也請大家要繼續好好支持香港的小店啊！
