Chris So（蘇任中）可算是跨界別飲品專家，他的專業涵蓋葡萄酒、烈酒、啤酒、咖啡等，不但深入研究，更在從事教學工作，又於國際比賽得獎。
學習和知識是無止境，常常聽人說要「終身學習」，到底學習的原動力，是因為要搵食，還是無窮的好奇心？
Chris說：「最緊要keep住自己up to date，始終世界會繼續變，更加要保持到有實力！」這個年代，要預測未來難上加難。
先跟Chris談談他的葡萄酒歷程吧。
為食工程師
在英國讀大學的Chris，很順理成章被當地自由的飲酒文化影響。
「去到英國主要飲啤酒、cocktail，會自己溝cocktail，要平就要自己搞，喺hall攞個湯煲溝一大batch畀同學飲！嗰陣我已經係supplier！」
於The University of Warwick唸機械工程，當然以成為工程師為目標。
「都係因為自己鍾意計數、project management係強項，鍾意研究、解決啲嘢。聽落同而家完全冇關係咁，其實學咗啲critical thinking、analysis mindset、點樣manage project，就算blind taste一支酒都要經過好多思考，或者對做生意都有幫助！」
在努力唸書同時，他不忘追求自己興趣，就是食。
「我係好為食嘅，係不停搵餐廳食，我at heart係一個foodie嚟先！
「喺餐廳observe到其他人叫啲咩，除咗揀個dish仲有酒，好好奇到底有咩特別，所以引伸咗興趣！喺餐廳嗌酒飲都貴，但都會試，只係唔可以花費太多，直至返嚟香港做工程師再搵多啲錢，就去學，買多啲唔同酒研究。」
認清方向
當時已在頗知名的工程公司任職，同時對葡萄酒的熱誠也有增無減。
「做工程係有趣，但係始終悶啲。喺大工程中你係其中一粒齒輪，睇吓點樣貢獻到。當做多幾年就會諗吓考唔考牌成為chartered engineer，人工高啲但responsibility又會高啲。」
Chris有機會參與很多大型建設，如地鐵站、機場新客運大樓等等，也在北京工作過，但他已決定轉行。「去完北京都覺得比較dry，雖然北京啲嘢食都幾有趣……都係諗咗嘢食先！始終同性格唔係好夾，style問題！我鍾意冇咁悶、新奇啲嘅嘢！」
自由的葡萄酒世界
他轉到朋友父親的公司當朋友父親的助理，在香港管理公司的多種不同生意，包括零食、餐廳、酒樓、首飾等。
「喺朋友公司變咗一個乜都要幫手嘅人，學吓做生意、計吓啲成本、點樣採購運輸、bid啲項目，搵啲proposal嚟做。
「我負責維持香港office，都會有空間去八吓周圍發生啲乜，可以去吓trade show幫老闆睇嘢，自己試吓其他嘢，喺空閒繼續讀WSET Diploma。同時都有花多啲時間寫blog，嗰時已經好多人寫嘢食寫得好勁，我不如搵個niche，淨係寫嘢飲，都有少少business angle去諗㗎，個個寫嘢食我就唔寫！我鍾意反市場嘅，個個都做我就唔做，我好鬼乞人憎嘅！因為專注寫酒，寫寫吓又開始讀多啲，可以再專注啲做呢樣嘢！」
到了2008年他創立自己公司，葡萄酒媒體、教育及顧問公司的多項功能兼具，分享葡萄酒樂趣之餘，也向企業客戶提供創新方案。
「我細細個已經做啲小生意炒YES card、入啲四驅車摩打擺喺人哋舖頭仔賣，嗰時有少少創業興趣。」
挑戰難度
開了自己公司，Chris的目標更加遠大，完成了很多人要三番四次才能全部通過的WSET Diploma後，他再挑戰高峰，立志成為「葡萄酒大師」（MW，Master of Wine）
「喺行內Diploma好似好難，好似好多嘢喺入面咁，所以去試吓。係咪最好？都唔一定。嗰個係其中一個channel，完咗之後個人好似有啲空虛咁，仲有咩可以玩呢？咁咪去挑戰吓Master of Wine！玩吓玩吓就知永遠係一條不歸路！考晒啲試都唔代表啲乜，有少少純粹自我娛樂。呢一個係好expensive嘅entertainment，不過有啲嘢又冇得計嘅，鍾意就鍾意，因為可以混合自己passion再share出嚟，我就比較有興趣，如果叫我去做trading、做買賣，唔係我最大興趣。」
MW考試堪稱地上最難，在多重理論、品飲考試之後，考生還要提交研究論文，據聞最快達標的也要3年，花了最長時間的則是17年。
Chris一次過通過了全部品飲考試，反而理論考試卻兜轉了3個循環才完成。
「Tasting一嘢合格係唔normal，因為好多人覺得tasting難啲，大部分人都係考唔到tasting而考到theory。「我有少少懶嘅，你唔畀足夠effort，係好難好穩陣咁pass MW，我相信咁多同學入面我係比較懶嗰種，咁咪學到有啲嘢係要足夠準備嘅，無論讀書定比賽定做生意，準備唔夠咪考多次，咪當畀人罰一年停賽，下年再嚟過！我不嬲唔係好急嗰種人，都ＯＫ嘅！
自己的步伐
現在只餘研究論文部分，他正在努力搜集資料並撰寫中。
「Research我又可能唔係好急啦，所以咪搞咗咁耐！我之前個topic完成咗，但最後都改唔到嗰個standard，所以做過個topic，total搞咗超過10年㗎喇！ 」
「我得到上一次經驗，今次唔會做我上次做得唔好嘅嘢。」
「我性格係：今次唔得咪下次囉！個過程學到好多嘢，人生係好長，係咪一定要咁急？咁急可能中間miss咗好多嘢。」
「我啲朋友都話點解我唔搞埋個MW佢，我又唔覺得考到同考唔到爭幾遠。當你學過晒、考過晒，知識喺我入面冇人可以攞走佢，唔係個title代表啲咩，當然有個title有個着數啦，始終佢有value喺度，好似勁啲咁樣，所以都會盡量考埋佢！」Chris很有決心地說。
相信大家都期待，第一位香港土生土長的葡萄酒大師誕生。
最喜歡甚麼葡萄酒？
Chris大大話話都飲了葡萄酒20年，而且是深入品試，徹底研究，作育英才，到底他最愛的提子品種是甚麼？
「Riesling！比較prefer原始啲感覺，反映番原本個味多啲嘅，即係少啲wine making影響。我會比喻Riesling係一個雕塑咁，睇你點樣雕琢，唔係加好多嘢落去，而成為一個好嘅出品或者好嘅藝術品！飲品係可以去到呢個層次，無論酒、咖啡，定其他飲品，最緊要balance！」
眾所周知，Chris的興趣還有其他飲品，當中咖啡還佔了很大部分，我們下一次詳談他的咖啡世界！
