喜歡葡萄酒的，有很多人。
喜歡葡萄酒又定期寫文章介紹的，沒有幾多個。
喜歡葡萄酒、定期寫文章介紹、再把這份熱愛化為很實在的桌上卡牌遊戲的，相信只有一位：Bernard Leung。
他不斷把自己的熱愛透過不同方式分享出去，真正做到「樂、饗」葡萄酒。
啟蒙經歷
Bernard自言是一般平民，少時對酒精飲品的認知，都是啤酒為主，喝葡萄酒已屬luxury。與葡萄酒的邂逅，要從大學生活數起。
「大學群埋啲外國exchange students開始有酒精類飲品，包括烈酒同wine。覺得幾好飲嘅，都好解渴，又有多層次過啤酒，有少少想去搵吓嗰啲究竟係咩嚟，有買啲書嚟睇吓酒係點造嘅，但就冇乜有系統咁去讀。」
踏足社會工作後，又遇上熱愛飲葡萄酒的同事，好像註定他要努力研究下去。
「我發現做ＩＴ嗰啲人好鍾意飲酒，因為佢哋有server房可以放酒！撞正嗰堆比較飲得起同埋都有啲研究，開始帶我去飲啲好飲啲嘅酒。」
在他們介紹下，Bernard第一次一箱過買入Rioja酒；而另一支則是Napa Chapellette的Chardonnay，到現在仍然愛喝。
認真經營文字
此後，他便認真地學習葡萄酒，並修畢WSET Level 3。當時正值blog與社交媒體交錯的年代，Bernard便開始在這些平台貼文分享一下喝過的酒。
「朋友介紹下識咗個《信報》編輯，佢哋嗰時想開一個lifestyle journal《優雅生活》，問有冇人寫酒，咁啱搵到我。我話我中學之後都冇寫過中文喎，但佢都見我有post啲wine sharing出嚟，佢話我平時都有寫啦，咁咪照樣咁打，打多少少字咋嘛！」
那時他尚未敢一口應承，然而這未算甚麼有壓力的工作，雖沒有酬勞，但不限字數、特定交稿日期。
「諗諗吓，咪試吓囉！又冇壓力嘅，咁就開始咗寫嘢。
「飲完支酒，有咩諗到出嚟咪寫囉，都係好casual又冇乜壓力，鍾意寫乜就寫乜。嗰陣時又讀完Level 3，呢個葡萄酒世界都好大，好多嘢可以寫，第一篇係06年寫Beaujolais Nouveau！」
雖然沒有酬勞，又沒有老細催稿，偏偏他又很有紀律地每星期交稿，在2014年他更開設了屬於自己的博客《Bernard’s WineFiesta》。
畫酒樽本為慳時間
幾用心的文字，也要畫面配合，Bernard尊重版權，所有圖片都循正當途徑索取，電郵酒莊聯絡成為必做的準備工夫。
「問酒莊攞相有啲都好快覆，但嗰次寫Lafite佢又叫我問香港批發商，最後都攞到相，但來來回回搞咗個幾兩個星期，我就覺得好慢。諗吓諗吓，嗰陣時有部iPad就開始畫啲我想畫嘅嘢。」
「例如情人節可以畫個心，配合支Calon Segur，用嚟replace張stock photo，後來發展到直頭畫個樽加埋label！畫完啲人就話幾得意喎，啲人開始覺得有興趣。後來寫耐咗就開始有人搵你去啲event做tasting，每逢去一個tasting見一個winemaker前都會預備，畫咗嗰個樽跟住叫佢簽名、同佢影相，跟住作為嗰篇文嘅主題，有個樽同嗰個人嘅合照跟住寫嘢，咁以後冇需要問人攞相！
「讀小學嗰時就好鍾意畫畫，到中學之後都冇乜點畫，亦冇特登學。（即係有天份？）惟有話有啦……」Bernard謙虛地說。
推出葡萄酒card game
寫文章寫到一點成績，Bernard早前還實現了自己多年來有關葡萄酒的另一心願，就是推出葡萄酒卡牌遊戲《醉佳拍檔》。
唸經濟出身的他，自言無論讀書工作都和數字有關，「好虛」，所以想用實在的東西來平衡一下。
「做建築師可以起咗樓出嚟，做土木工程會見到個工程，我一直都想有樣實體嘢create到出嚟！」
某書局詢問他有否興趣出書，本來Bernard打算出一本整合自己過往文章的散文集，但得到回應是：「出嗰啲散文賣唔到㗎喎！幫你出冇所謂，擺晒喺度咋喎！」
其後書局反建議他能否出一問一答式的卡牌遊戲，不過Bernard覺得太悶。碰巧他有個大學同學經營card game café，同學看過德國有類似葡萄酒拍賣的遊戲，Bernard試玩後也覺得幾好玩，於是他便向原作者取版權來改編，成為現時集合中國怡園酒莊、黎巴嫩Chateau Musar、南法Mas de Daumas Gassac、紐西蘭Cloudy Bay、意大利GAJA、波爾多Bernard Magrez和Salon香檳的《醉佳拍檔》。
沒錯，最吸引之處可算是酒莊都是實名推出，緣於Bernard寫酒多年，與酒莊頗有交情。
深得世界酒莊支持
「怡園、GAJA、Cloudy Bay都好爽快話好，仲話成日想有隻遊戲飲酒嗰時候玩，好鼓勵我出，雖然飲住酒係玩唔到嘅！哈哈！隻game係要比較多時間去學，但學完之後好容易玩，好順暢！」
每張牌有他親自繪畫的酒樽，背面則是酒杯圖案。
「本來係oak barrel嚟，其中有個莊主話，『我啲酒冇用oak barrel㗎喎，所以你唔應該用。』所以同番designer講有個莊主唔鍾意oak barrel，轉用杯啦！」
籌備一年多，這已是唯一阻滯，反而推出後即撞正疫情爆發。
「限聚令就冇得玩，冇得玩就發展到而家咁嘅狀態！所以未做到預期結果，暫時會存在喺鍾意玩board game同埋鍾意酒嘅人。聽講話原作者都覺得幾正，咁都開心嘅！」
Bernard經營葡萄酒文字一段時間，慢慢領略了持續發展之道。另外他也會分享他最難忘的酒食配對、最愛葡萄酒！
記住留意！
