上回談到Bernard邂逅葡萄酒與成為作家的歷程，今次他會分享更多他的最愛。
持續發展之道
經營葡萄酒文字一段時間，Bernard領略了持續發展之道。
「當你識多咗winemaker同佢哋多咗溝通，寫嘢時候多咗consideration，會體諒佢哋。」
因為葡萄酒不似電子產品，原料出問題便直接引致產品質量問題，消費者投訴也理所當然。
「當你愈識得多佢哋，發現因為好大部分個結果係點，係由天決定，佢哋只可以盡人事，個天話嗰年提子係咁嘅味嘅都要頂硬上。所以我會多咗體諒，會知道佢哋都好慘喎。
「但有啲人寫酒嘅方向係譁眾取寵，『呢啲垃圾倒落坑渠都冇人飲呀！』如果咁寫係好睇嘅，好多人鍾意睇偏激嘢嘅，我就唔鍾意咁做！我就鍾意寫多啲古仔嘢，有時關於個樽咩形狀、個label點解，rather than有啲好technical嘅wine writer寫咩medium sweet、medium plus呀、幾多個月桶、糖度幾多……我覺得啲讀者未必會好有興趣，睇咗啲數字都唔知睇咗啲咩！」
最大得着
這個方向，為Bernard帶來完全不能量化的回報。
「最大得着係飲酒識嘅朋友，睇事物、眼界又會闊咗啲。以前覺得專門識咗一樣知識，會覺得自己好叻，認識咗葡萄酒之後發現葡萄酒世界好大，學極都仲有啲唔同嘢可以學，永遠都做唔到好專嘅專家！眼界會闊咗，見到世界會大咗！」
「我寫嘢冇乜特別力量，又唔係咩名人，係得到多啲去tasting嘅機會，識多啲人，會比普通wine lover多咗接觸唔同崗位嘅機會，會識winemaker、又會識做business嘅，同時又會識到更多wine lover，擴闊咗自己圈子。」
「我又唔係話寫得好叻，如果有人睇，作為一個興趣係ＯＫ嘅，所以keep住寫！同埋keep住有得去tasting，又有人睇、有人回應吓，都可以成為可持續興趣！ 」
云云葡萄品種之中，最得Bernard歡心的是哪種？
「如果呢個世界剩番一隻提子，我會揀剩番Riesling。因為可以好dry，又可以好sweet。想飲好dry嗰時就飲dry Riesling，當你想飲甜酒可以飲Ice Wine或者 Trockenbeerenauslese！ 」
如果這一生人只可以選一支酒來飲？
「香檳囉！Cristal！所有elements都好balanced，balanced嘅程度去到好和諧嘅感覺，如果age得耐啲可以好complex！」
可以分享一下難忘的葡萄酒食物配對嗎？
「飲咗支Bordeaux『龍船』08嚟嘅，配豉汁蒸盤龍鱔。我心諗唔係啩？會唔會腥呀？仲要配酒嗰個人我唔係好信得過佢㗎嘛……一飲落去好好囉！個豉汁好濃嘅，支酒又有啲年紀，所以你唔好話魚就唔可以配紅酒！但我自己就唔會試，講真我係啲好穩陣嘅人，食魚梗係配番白酒啦！冇咁容易瀨嘢囉，但佢又得喎！」
在葡萄酒生活中，做過最nuts的事情是甚麼？
「因為要移民加拿大，所以要運走啲酒。好多酒其實好平，但運費同稅就好貴，貴過晒啲酒！因為有啲係朋友送嘅，有啲我自己又好鍾意嘅，全部都係我回憶嚟！咁樣都幾nuts！」
人人應飲
相信人人也會同意，如果認真研究一種嗜好，會帶來無限樂趣，所以Bernard真心希望更多人能享受葡萄酒。
「唔識飲酒嘅人原理上都鍾意食嘢、鍾意欣賞啲舒服嘅嘢，如果飲到好飲嘅酒真係會舒服㗎嘛，同埋真係好味㗎嘛，所以都係建議去飲啦，食嘢時候去飲，因為有mariage效果，嘢食好食咗，嘢飲好飲咗，就算你唔鍾意飲，你都可以飲啲，試吓提升吓食物味道！
「識飲嘅人梗係繼續飲，飲多啲！Explore唔同地方，唔好淨係飲一個region！」
愛葡萄酒的人都是…
Bernard發現，喜歡葡萄酒的人都有共通點。
「都係好有耐性，譬如有啲會等支酒開，有啲會等支酒age，有啲又會等下年vintage會點！好多仲好有loyalty，鍾意間莊幾十年，好devoted to間酒莊！」
擁有百幾支酒，自言「唔係好多」的Bernard反觀自己，卻又下不到判斷自己到底夠不夠耐性、忠心度。
「所以我先做到中立㗎嘛，我冇錢去等啫！買一箱酒返嚟，一年試一支都ＯＫ嘅！」
如果自問不夠耐性，對事物又不夠忠心的，不妨採納一下Bernard意見，把更多精力投放到葡萄酒當中吧！
