當律師的Nic和網上創業的Jeremy是年輕時好友，長大後因為一次catch up而萌生了創立本地Gin酒品牌的意念。不是因為酒精影響的吹吹水，而是付諸實行，經過差不多兩年準備，香港製造的「無名氏 N.I.P.」Gin酒在艱辛過程下誕生。
由於公司只得兩人，甚麼事都親力親為，所以兩人既是老細，也是斜槓族 (Slasher)，是好處也是壞處。
他們繼續與我們分享幾年來的事情。
香港味道的平衡點
從零開始建立一款Gin酒，到底要放入幾多「香港情懷」進去？
平時比較多站在酒吧後，準備飲品予客人的Nic解釋「無名氏」的味道源頭。
「其實一開始我地想做第一支Gin嘅想法，係想做番傳統Dry Gin嘅風味，但亦想做出一啲特色，所以決定加入一啲香港嘅元素，搵個平衡點，令支酒嘅味道特別之餘又不是傳統gin酒該有嘅味道。」
「皆因香港比較少土生土長嘅原材料，我哋嘅概念就由一啲兒時嘅味道組合而成：譬如雪梨、杞子、薑，呢幾樣嘢都係由細個阿媽煲雪梨水而黎嘅主意嚟；而採用壽眉、龍井茶係因為茶係一樣非常香港嘅習族，而黎兩款茶都係我地由細到大飲嘅茶。另外桂花、陳皮等等係一啲每日喺香港都會用黎煮食材料。」
「當然我地都有試過用唔同嘅其他原材料去實驗，譬如紅棗，本來非常期待嘅，但係效果未如理想，出嚟冇乜紅棗味，仲有啲難飲添！先了解到唔係樣樣特別嘅原材料都可以用來做酒嘅！」
自砌名牌釀酒器
無名氏第一款Gin酒由杜松子、中國當歸、芫荽籽、桂皮、甘草、八角、荳蔻、檸檬皮、西柚皮、陳皮、洋甘菊、雪梨、枸杞、甘草、壽眉茶、龍井茶、桂花等共21款原料釀造而成。
名叫April的釀酒器也甚有來頭，其品牌Christian Carl正是世界多款知名Gin酒，包括Four Pillars、Sipsmith和季之美使用的同一品牌，而負責無名氏項目的正是和設立季之美釀酒器的同一人。不過……
「成嚿嘢我哋兩個人砌！呢部機器嚟嘅時候散收收五嚿嘢！本身有按排technician砌嘅，但裝修delay咗，想佢兩三個禮拜後先嚟，點知下一個期係三個月後，機會成本太大，所以開個skype session自己嚟。其實同砌 IKEA櫃咁啫，哈哈哈……」Jeremy笑說。「我哋要identify邊條管去邊度，都係好處嚟，至少我地可以好完全咁認識我地部機！好彩冇搞錯到！正式砌嗰日，一路做嘅時間，有問題就一路問，佢陪咗我哋幾個鐘頭解決，end-up成個架構我哋砌咗4日！」
有血有汗
他又笑說，每位到訪無名氏的人，都一定感受到他們的血汗。
「成條生產線最多兩個人，最少一個人，你見晒！成間公司都係得我同Nic，佢係我唯一員工，我係佢唯一同事！頭先我哋先喺度抹緊張枱！」
【「咁耐以嚟整到隻手嚡晒，又切到損晒，又入過醫院，Nic隻手又爆過好多次，我隻手又爆過好多次！」 】
除了準備材料要一腳踢，對於產品十分重要的部分，即是使用釀酒器製作每支Gin也當由他們一手包辦。
擦出火花
兩人除了由drinkers變成makers，更由朋友變成生意夥伴，當中肯定擦出了無數火花。
Nic說：「互相學吓大家嘅所長，之前都未一齊做過嘢，有磨合期但係磨合係必要㗎啦！大家做嘢方式唔同，大家知道嘅嘢唔同，大家認知唔同，但係最重要嘅係大家明白大家嘅出發點係為左公司嘅未來著想，所以大家嘅習慣或形式上做事係點都唔緊要，最重要大家了解個中嘅理念同目標，重新調整方式後用大家嘅方式去做。其實問題不大，我地有咩就會攞出嚟講，啱就做，唔啱就唔做住。」
理性面對
如果兩人在一事情上未有共識，也不用急。
「唔同意嘅咪擺埋一邊先。如果唔做唔得嘅，我地會搵辦法，點諗都諗掂佢！」
「做100樣嘢唔會100樣嘢都成功㗎嘛，做100樣嘢起碼八、九十樣唔成功㗎啦！如果我哋衡量過好壞，唔係真係好大風險嘅都會做，盡量尊重大家嘅想法。唔成功都唔緊要，咪做第樣嘢囉！真係未同意到嘅咪擺埋一二邊先，一個項目咁多嘢做，唔做呢樣嘢梗有第樣嘢可以做！」
「梗係有拗撬，做同事一定有拗撬，做partner就更加多拗撬啦，但係起碼大方向係一樣嘅，起碼冇咁傷，唔會take it personal先！哈哈哈！
「無論你打工嗰個年代定自己出嚟做startup，【你gather你嘅grounds去convince，convince得到就係你叻囉！】而家好處就係我哋兩條友唔使同其他人交代，唔使多隻香爐多隻鬼！
「Idea一路都有，我哋相信肯努力去諗嘅話，唔會無 Idea，永遠有進步餘地！」
無名氏是本地Gin酒最多款式的品牌，除了最中流砥柱的Dry Gin，有專門製作予國際酒店品牌版本，農曆新年特別版、也有超難駕馭的木桶熟成版等。
「細scale嘅嘢一定要做好個質量，唔可以求其出支嘢畀人！出每一支酒都希望唔係只係出一隻味，希望每支酒背後都講到點解創造呢樣嘢、背後故事係點樣！」
兩人在工作生涯中最nuts的事情是甚麼？
Nic說：「喺Scotland已經幾驚險，喺唔諗住落雪情況底下，居然落雪，揸車上山去Speyside，架車冇brake嘅，真係瀡出去。山邊冇欄河同埋冇燈，爭啲死！個零鐘嘅車程，揸咗三個半鐘！」
Jeremy也好像猶有餘悸：「起初揸嘅時候3點鐘好風和日麗，一揸嘅時候仲要好興奮好正，諗住天黑嘅時候到啦，揸到一半佢居然狂風暴雪，啲雪打橫飛！」
認真說，離開安穩的工作創立幾乎前無古人的公司，也很nuts。
Nic的壓力來自家人，他說：「阿媽話供我讀書，做咗7年律師都好穩定啦，做乜搞啲咁嘢？當時喺crossroads一係搵過另一份律師工，一係去start 自己嘢。一路都想做啲真係自己真係好有興趣嘅嘢，創一番事業，覺得係一個時機，唔做就冇機會。再做律師落去個機會成本太大，就唔會踏出第一步。由原本有穩定收入，突然間變咗0蚊。」
當無名氏概念仍在萌芽之時，Jeremy本身已經有自己事業，情況又有點不同。
「冇話畀屋企人聽呀，有一次我帶咗我阿媽上嚟睇，話差唔多開喇咁。咁我老婆知啦，of course佢知啦！」
「我都係耷低頭做嘢嘅，做完跟住先講！除非有啲嘢開頭要disclose就講先，冇人會畀特別多嘅意見我，我亦都唔會理人哋啲意見！」
大家的Gin酒夢想是甚麼？
Nic說：「我哋想將香港味道留喺個樽度，亦可以將香港味道帶出國際， create番真係屬於香港本地一個品牌，同埋真係香港製造嘅Gin介紹畀全世界，香港唔係得金融、地產，係有啲值得大家留意嘅本土製作！」
Jeremy還是着眼於品牌本身，他說：
「Made In Hong Kong我哋係proud嘅，但人哋去買呢支酒嘅時候係咪必須？咁就唔係。希望啲人去買我哋支酒係因為quality夠好，先至會有recurring purchase。如果撐香港做嘅，撐一次囉、撐兩次囉！你支嘢唔好飲嘅，就唔飲啦！ 」
「我哋起咗個brand，希望過多幾年，我哋真係可以live up to個brand嘅promise。當你做得好大嘅時候，會唔會唔記得咗原本想做嗰樣嘢？個brand stand for啲乜嘢呢？無論間公司變大，請人做都好我都希望有番N.I.P.陣除，而唔係just another Gin brand！」
At the……
訪問了接近兩小時，成品的這篇文章，當然經過編輯刪減。其實兩人當天都有重複了很多次的口頭襌，Jeremy是「at the end of the day」，而Nic是「at the same time」。
如果有英文測字句睇心理的遊戲，這是一個很好的例子。
兩個短句不約而同都以「at the」開頭，證明兩人的起點一致，所以才能合作建立「無名氏」，而Jeremy注重結果，也屬非常有前膽性的人；Nic則對眼前事情觸覺敏銳，希望很多人和事一同合作，成就意想不到的樂趣。
希望大家享受閱讀這篇訪問，at the same time找到自己喜愛的味道，at the end of the day，大家都是熱愛香港產品的 nutters！
