要說Studio Caffeine是香港精品咖啡名店，相信不會有太多人反對。這裡不但出過咖啡比賽冠軍級人馬，不少現役咖啡師也可能受過這裡的影響，因而立志成為咖啡師。
Brian（鄧創恩）是Studio Caffeine的創辦人，營運了自己生意8年之後，他仍然覺得以最優質、性價比高的豆來吸引更多新的愛啡之人，還原基本步，輕輕鬆鬆地大家來多飲一點，才是持久發展之道。
會計學位咖啡師
Brian持有中文大學會計學位，不過他沒有像一般大眾心目中的所謂會計師，在Big 4從低做起，即使他曾經試過，最後無奈因性格不合而分開。
「做過一陣會計，但真係唔啱自己性格。我都係內向，但會計太極端，朝9晚9基本上都係對住個電腦，喺公司完全一句嘢都冇講！仲有，我本身喺大學嗰4年都係搞event多。」
轉戰咖啡界，只為了去澳洲working holiday前學懂一技傍身，所以在2012年8月加入了Pacific Coffee。
「好開心，嗰陣時識到嘅同事都對咖啡有興趣。到2014年仲有機會幫公司比賽，當然覺得公司嘅支持未必夠，所以自己去咗搵師傅學吓嘢，令我重新認識咖啡！」
一鼓作氣
比賽經歷都有頗瘋狂部分，尚且不談，但比賽期間最重要的是遇上幾位朋友，包括Joe、Andy、Issac、Aaron等，助長了Brian開舖的念頭。
「14年9月開始傾，11月就開Studio Caffeine。細個唔同諗法，覺得有咁嘅機會做，就搏盡，嗰陣唔識攰，而家就會好攰。」
「頭一年半真係蝕，我同阿Joe（開舖拍檔，現已離隊）都唔識整嘢食，大家都係做咖啡開始，但係條數搞唔掂都要諗有咩出路。」
「只沖咖啡」是所有精品咖啡店的兩難，維持到理想，往往得不到麵包。當然，大家也看到現在的Studio Caffeine，食物的提供已頗多元化。
「真係去到扭轉狀況嘅契機，係我參加Brewers Cup好好彩贏咗第三，先有人識Studio Caffeine。」
回應客人
Brian與開檔時的拍檔Joe於合作約兩年因了解而分開，留下Brian一個人主理整個舖頭，決策可以加速。
「嗰時冇特別計劃，坦白講仲係諗緊點樣捱第一間舖。」
「做舖頭好簡單，見到客人有咩唔鍾意，就要換、要改。之後換咗啲唔同嘅同事，有唔同Cafe經驗嘅，再慢慢修正吓問題，就開始有盈利。」
引入外地烘焙
精品咖啡店的靈魂，當然是來自不同地方，由店主精心挑選的咖啡豆。初期因為成本、時間所限，採用本地roaster咖啡豆肯定是理所當然，更遑論自家烘焙豆。
「嗰陣未開始諗開第二間舖，有多啲錢就搵多啲好嘢、試多啲唔同嘅豆先。嗰陣時先慢慢搵外國roaster，慢慢先開始飲入口豆，因為用香港roaster好似有啲悶。」
事實上，Studio Caffeine要到2018年才有自家烘焙咖啡，而那又是另一個故事。
香港的問題
事實上，一直以來Brian始終最想透過自己的咖啡店，擴闊飲咖啡的客群。
「而家香港面對嘅問題，係開咗好多精品咖啡店，但市場仲未好容易普及化。我哋唔想嚟幫襯嘅都係圍內嗰班人。贏咗Brewers Cup第三之後嘅分享會，嚟咗嘅80人全部都係咖啡師，其實呢個係惡性循環。」
「再到好極端嘅例子，BOP (Best of Panama) 今年有三lot去咗大坑，你唔覺得好諷刺嘅咩？大家都係做緊手沖咖啡嘅時候就要鬥豆靚！早兩年有啲anaerobic、有啲infuse、有啲新嘢，你可能推音樂家！然後大家又回歸本質，鬥貴，大家都賣BOP！大坑得嗰三條街一人一lot你點sell？都係得咁多人飲！哈哈！要擺低$200飲一杯咖啡？冇可能！要搵啲新人肯接觸呢件事係冇可能！今年好明顯覺得咁樣好唔舒服！」
「我自己沖畀你飲都係沖巴西，夠natural。亞洲好多被忽視嘅國家，點解仲係巴拿馬？仲係埃塞俄比亞？世界咁大！亞洲進步咗好多，印尼都唔同咗，絕對值得重新認識，點解唔飲吓呢啲？」
擴闊客群
有清晰的目標，Brian願意為業界和咖啡愛好者踏出一步。
「做領頭，做啲唔同嘅嘢。譬如而家逢星期五夜晚做啲COE cupping。其實我哋唔係叫做cupping，叫做batch brewing。總之大家攞隻杯，行出嚟㩒掣，我唔覺得咖啡係啲咁複雜嘅事！點解一定要cupping？你唔識『啜啜啜』就唔可以飲咖啡咩？攞隻杯嚟咪得囉！大家一齊接觸新嘢，我純粹提供呢個機會，例如今次秘魯主題有20隻唔同嘅豆，你係咖啡師又好，你係lover又好，大家飲吓嘢，飲啲新嘢！」
「我哋今年先課金畀Alliance of Coffee Excellence，啲sample真係多到飲唔晒，冇理由淨係啲同事學！最後都係要啲客嚟！」
有興趣的朋友，可以留意Studio Caffeine火炭店的活動！
在訪問下半部分，Brian會繼續分享他營運咖啡店的堅持，當然也會講講咖啡生涯中最瘋狂的事！記住留意！
