只是三十來歲的Luke Chan，已是fusion餐廳老闆，他擅長把本土特色食材，放進經典西方菜式，一味「臘腸卡邦尼手工意粉」美味非常，回頭者眾。
創業前，他在米芝蓮星級餐廳工作十多年，被世界級優質食材和人才圍繞，不知不覺間壯大了自己的美味庫存，造就今天充滿姿采的創作料理日常。
不過，即使擁有宏大理想、過人技藝，也必須有正確態度才能成功，Luke認為沒有那十幾年的打工生涯歷煉，不可能有今天的自己。
緣起家政課
談到對料理萌生興趣，要追溯至Luke的初中時代，男女同學分別要參加家政和工藝課。有趣的是家政科不再只為女生而設，而每星期一次的這一課，是他上學的最大動力。
「我好期待家政堂，好專心，次次都攞第一，對料理嘅興趣喺嗰陣時萌生。」
Luke自問不是能安靜坐下來讀書的材料，幸好又不屬於搞事份子，這一點他的家政老師也看得出來。
「家政堂個老師好錫我，同我講咗一段說話。話既然我鍾意煮嘢食，而且又唔係蠢，不如早少少出嚟攞社會經驗，做想做嘅嘢啦！」
聽師一席話
這一番話成為了Luke的前路明燈，可是卻嚇壞了他父母。
「我就毅然同父母講唔會再返學，想做廚師啦……當然畀佢哋鬧到飛起啦！佢哋話做廚師、廚房佬，學埋晒全部都唔係好嘢！」希望Luke父母看到兒子今天的成就，會感到安慰。當時正值IT潮流興盛，Luke為了討好父母而跟隨表哥加入了IT行業，做了兩星期後當然受不了。「嗰陣時我有個同學阿哥喺Amber做嘢，佢畀我入去做part time。初初入去咩都唔識，好驚青。」
武林秘笈逐本儲
甫進去Amber，沒有技能的Luke只能當個唯唯諾諾的Yes Man小員工。
「人哋叫我做乜，只係識OK、OK咁。最深刻嘅嘢就係紀律，啱啱入去fine dining餐廳想學嘢嘅話就要做好畀人鬧到狗血淋頭、畀人飛煎pan嘅心理準備，一係你就走。師傅都係人，你肯聽佢哋講嘢嘅，佢哋就無條件教晒所有嘢畀你，如果覺得自己不可一世、叻晒，係絕對唔會學到嘢。」
「需要完成自己工作崗位嘅嘢，唔好帶麻煩畀人哋，咁樣啲師傅就會特別愛惜你，肯教你。每個師傅都有佢嘅長處，慢慢就會練到好多本秘笈，繼而變成自己本秘笈！」
萌創業念頭
Luke在每間餐廳工作的時期都有得著，既培養出紀律，自己的技藝也在進步，打工期間有一位名叫Philip的意法混血廚師，給予了讓他到意大利的鄉村餐廳實習3個月的機會，使他脫胎換骨。他發現即使看來十分完美的菜式，永遠都有層次提升的空間。
「一係唔做，如果做就一定要全力以赴！」
這心態使他在廿來歲便躍身成為主廚。
「第一間做主廚嘅係上環法國小酒館Comptoir。一入去做sous chef，試用期3個月後幾個老細都好鍾意我，就畀我處理晒所有嘢。嗰陣時雖然得24歲，但why not？」
這時開始他學懂整個廚房的運作、計算成本、庫存，甚至管理員工，加速了他創業的念頭，只是時機尚未成熟。「當然唔可以創作菜式啦，但已經萌生咗做fusion嘅相似念頭，只係覺得自己仲未夠底氣。」
邊學邊做邊成長
疫情來襲，重創各大行業。不過有危便有機，Luke感到時機到了，便趁這時實踐埋藏多時的創業夢。兩年前吉舖多，租金合理，當他走進上環永吉街這個舖位時，腦海便自然浮現了餐廳的構想圖，一切像命中注定般便租下了那裡，成為了Daap。
「成個過程都係靠自己，係經驗同埋勇氣！同行如敵國，所以要自己做、自己諗，雖然未必一定啱，但都要嘗試，慢慢至知道自己成長咗，就算之後有咩問題都解決到。」
夢想的第一步是實現了，但正式開業幾天，便遇上第五波疫情全面大封城，獨自望着空無一人的街頭，慶幸仍然撐得過去。
「成為老闆後，係轉換角色。餐廳嘅廚師當然係靈魂，但都想建立自己文化，令自己團隊有同一目標去進發。另外行政方面要搵咩人幫手，都係一門學問。呢兩年真係學咗好多嘢！問題日日都有，要諗點樣盡快解決，唔係一直逃避！」
「只要全力以赴去做，結果未必一下子浮現，但係兩年持續去做，唔係話一定可以好勁或者大富大貴，但到你離開呢個世界嗰日，起碼覺得做咗啲事！」
料理夢想
創業的夢想已經實現，Luke希望繼續把自己堅持的文化宣揚得更廣更遠。「好有興趣知道呢種fusion文化、同埋自己品牌可以去到幾遠。而家知道嘅係自己要努力啲！」短期來說，貫徹中西fusion概念的Luke，期望加入更多單點（A la Carte）菜式，讓大家可以輕鬆快捷地吃個pasta、喝杯酒，從而增加生意。
無論如何，Luke為客人奉菜時，對方一句小小的讚賞，已是推動他每天工作的動力。
「做料理係同人有connection，你未必識我，我未必識你，但食完之後話好好味嘅滿足感，我唔知世界上暫時可以搵到乜嘢代替！」
身為八十後的他，絕對比很多廚師熱情百倍，在他眼中，料理無分國界，所以從他雙手，定可為料理界帶來驚人新衝擊。
