用咖啡發揮無限可能,精品咖啡導師及評審 Cecilia Yueng

本身是OL的Cecilia在8年前誤打誤撞下成為了咖啡師,再晉身咖啡導師行列,最近更建立個人品牌。除了分享咖啡知識,她更想連結不同興趣人士,發掘更多有意義和好玩事情。


不少人覺得咖啡師像藝術家,無論烘焙的、手沖的,都默默無言,埋頭苦幹,為了完成一杯客人滿意的咖啡。Cecilia(楊樂泓)由普通咖啡師出身,後來晉身為咖啡界作育英才行列,到最近設立自己品牌,為的就是發掘更多可能性。「好多時大家淨係focus咖啡而忽略其他唔同可能性。不如做啲嘢將咖啡連結唔同parties可能多啲好玩、唔一樣嘅嘢!」

追逐夢想

在2013年當上精品咖啡師之前,Cecilia都只是一名普通OL。直至有一次誤打誤撞、機緣巧合地在朋友邀約下試了第一杯精品咖啡,之後便「一入啡門深似海」。

「因為有個飯腳朋友,佢個朋友放咗飛機,就問我有冇興趣去Knockbox 夜啡會。我本身唔食苦嘅,連latte都飲唔到,但嗰晚開始跌咗落坑,實在太impressive!本身鍾意飲茶,但原來手沖咖啡好似飲茶咁!因為想知多啲,之後逢星期六、日就出咗去coffee hopping咗1年。

「嗰陣做嘢都好悶,鹹魚咁,又唔算係自己好鍾意做嘅嘢,見仲後生咪試吓跳出嚟做咖啡師。」

無悔當上咖啡師

當年的Cecilia肯定對自己想要的十分清楚,因為她要先斬後奏、排除萬難也要投身咖啡界,可想而知當時的那杯咖啡魔力所在。

「屋企好反對,媽咪係傳統諗嘢嘅人。細個被灌輸咗大個都唔好去做飲食行業,細個好奇,話好似好好玩咁,但一講就畀阿媽ban到九彩!

「其實係轉咗工先話畀佢聽,真係畀人鬧:『做呢啲咪好似做水吧一樣咋嘛!平時畀人serve 開,而家要serve番人!』對佢嚟講好似有啲低人一等咁,家用畀少咗,2013年真係人工$10,000都冇,真係爭好遠。後來佢發現做咖啡師個人開心咗,跟住就由得我,佢唔鬧已經係support!

「以前行屍走肉,咖啡帶畀我靈魂,好感恩遇到呢樣嘢!」

為人師

愛分享的她,當咖啡師時也有開興趣班講咖啡,在偶然機會下獲The Coffee Pro羅致成為導師。她最犀利的,是加入當時,自己一張證書也沒有。

「香港考好貴,讀書唔係好叻,都係做咗嗰樣嘢先,咁對我來講容易吸收啲!佢哋知道我有敎開,志同道合!由小助手開始做起,可以聽到唔同導師風格 approach!」

當導師3年後,她又轉到大型咖啡連鎖店,擔任培訓員。

「咖啡都不時有新嘢、新產品、新科技、新豆,唔覺得學晒啲嘢所以走,要出去睇吓啲其他唔同嘅嘢。碌咗入大型連鎖店,學吓一間連鎖店點樣run branding 嘅嘢。

「做咖啡師,體力上要企十個鐘;做導師就攰、用神,要用好多energy。有時遇上學生問課題以外冇期望嘅問題,要每句諗清楚先講出口;練 practical要瘋狂執,尤其是新手,教班完直頭熄咗機!」

療癒心靈

不過因為社會環境和疫情雙重打擊,她又要離開連鎖店。這時Cecilia得到思考的好機會,並展開創業之路。

「創立自己品牌係好啱timing嘅嘢!香港太過辛苦,社會運動加疫情。我覺得咖啡係療癒感強嘅嘢,當心情好煩躁,沖完、 focus 完,情緒好好疏理咗。既然搵到咖啡搵到呢可能性,不如由呢個方向做多少少嘢,所以喺2020年創立了 Lab Aura。」

言談間,Cecilia當表現自己注重mindfulness的一面,即所謂「正念」。透過認知與接受當前一刻的所有,包括個人感覺、思想、身體感覺等,達到療癒效果。誠然,咖啡是療癒Cecilia很重要的工具。

「我個人幾宅,本來唔會主動識朋友。識咗咖啡之後識嘅人多咗、學嘢多咗、見嘅世面多咗,會肯行出去,想知人哋咖啡做成點。真係會碌咗去台灣、韓國旅行,飲吓當地咖啡店出品,幾多得意嘢睇,人生精采咗。

「都好想去埃塞俄比亞呢個咖啡發源地,去睇吓個地方係點,佢哋啲ritual,會用啲好靚嘅壺去沖。仲好想去玻利維亞 ,飲過咁多origin 嘅咖啡,對於玻利維亞嘅豆有一定偏愛。飲開個莊園好乾淨、好舒服、價錢唔算貴,同莊主傾過偈,除咗致力改善自己莊園質素,亦推動番當地咖啡農權益!」

擴闊眼光

為自己品牌命名為Lab Aura,除了非常注重不同人的Aura,也帶有實驗意義,開拓更多可能。

「香港好多時大家好focus咖啡嘅嘢only,成日講將個餅開大啲,淨係focus 自己嗰舊,個餅唔會自動大㗎嘛!炒到個豆有幾好、沖到個啡有幾好,冇令啲人留意到呢件事係爭啲,因為滾嚟滾去都係呢群人!開呢個brand 想同唔同嘅嘢crossover,可以接觸到嘅層面多咗!

「做guest barista時,遇過啲coffee geek嘅人,話齋飲咖啡唔好搭其他嘢落去,我以前曾經都有過呢個堅持!其實咖啡都可以配某啲嘢食令到咖啡好飲咗,點解唔做?呢個世界唔係淨係得咖啡!蛋糕、鹹嘅嘢食,可以令到某啲風味提升,飲啡除咗分析風格、body之外,仲有第啲可能性!」

當咖啡遇上…

Cecilia的品牌之下有「當咖啡遇上星座」系列,和香港本土烘焙師合作,Cecilia負責找出最合乎每月星座特質的豆, 附上星座專欄作家的打氣和提醒語句。

「睇吓有冇機會透過星座,可以踢到部分人落精品咖啡坑!

「好多時大家淨係focus咖啡而忽略其他唔同可能性。不如做啲嘢將咖啡連結唔同parties可能多啲好玩、唔一樣嘅嘢!」

不少客人因為包裝、打氣字句而喜歡上她的精品咖啡豆。

「沖咖啡過程都係個ritual,希望畀到一個休息時間客人。好似水瓶座,係好鍾意inspiration,所以我同一隻生豆畀兩個唔同processing,等客人試到唔同風味。

分開飲又得,將佢做blend 又得,或者跟我提議做個blend出嚟又得。有時有客人會問話有啲咖啡好似有啲難沖,咁我都會答佢哋,希望提議recipe畀佢沖到我想帶到嗰杯啡嘅味道出嚟!」

此外,她還有咖啡與茶、咖啡與音樂等crossover。

「要有quality,唔係淨係gimmick!同埋真係想踢多啲人落坑!」

在咖啡生涯以來,最nuts的事情是甚麼?

「踢咗個妹落坑!我第一次接觸手沖咖啡嘅第二日就夾咗佢去飲咖啡,佢仲讀緊大學然後話不如去搵part time。佢喺接觸咗精品咖啡唔知有冇兩個禮拜,就去咗做咖啡師,反而係入行早過我,佢6年前已經考咗Q grader! 我個妹做咗咖啡師,我又做咗咖啡師!同埋因為咖啡,識咗我老公。」

最好飲的咖啡應該是怎樣?

「乾淨同平衡。自己好怕苦味,連苦瓜都食唔到。好乾淨嘅定義係冇negative 風味 ,乾淨即係層次好分明,平衡就係,唔係好尖酸、唔係好苦,甜度為主,我會鍾意飲呢種咖啡。」

曾經啟蒙過、又或者給你靈感的咖啡界人士,有哪些?

「有一位韓國咖啡老師,嗰陣時嚟香港做head barista無意間認識到。佢好肯share技術上嘅嘢,好多嘢都好肯分享。我就發覺咦點解外國人咁肯分享到咁嘅地步?其實點解我咁鍾意share自己識嘅嘢,有啲人問我一定會答嘅,係因為佢。  好想好似佢咁,因為佢係偶像,好似想做番接近嘅嘢,點解會做咖啡導師某程度上都係因為佢。

「最感動係我問咗aero press一啲問題,佢直頭拍咗段片send畀我!我睇到段片直頭感動到喊咗,佢可以無私分享到咁嘅地步,喺而家世代裡面好難得!我喺佢身上面學到好多嘢咖啡,學到佢好肯分享。以前都有撞過板,有疑問但搵唔到人問嘅苦況,希望幫到幾多得幾多!」

「香港cup taster champion—Johnathan Fan,第一次飲到精品咖啡係佢沖。初頭飲時都唔知佢係咁勁嘅一個人,後來傾偈多咗,覺得呢個人真係黐線㗎喎!對於問題執着,佢會好尋根究底,對於比賽,佢會練好多,迫自己做到呢件事。佢個sensory好強、好犀利,希望學到佢一半!」

「喺台灣有位咖啡朋友,係Single Origin嘅阿吉,喺2013、14年,喺嗰個年代當我飲到咁上,feel到咖啡店開始冇乜進步時始轉移目標。佢keep住一路都好有進步,搬咗舖我都有去過。第一次去台灣旅行時係佢沖嘅 Elida,我未試過飲到一杯咖啡我唔捨得將佢飲晒!我覺得太~好飲!直到我對上一次疫情前去台灣,經歷咁多年都仲係有呢種感覺,真係好難得!佢係我其中一個啟蒙老師令我remind自己,唔好冇進步!」

咖啡夢想是甚麼?

「好多咖啡師朋友都開舖,我又冇諗過呢樣嘢。我係一個好鍾意自由嘅人,開間舖好困身,要work life balance ,開舖絕對唔係一個option。 想做到嘅嘢就係將精品咖啡再畀更加多人認識。因為係工序比較多嘅嘢,由種開始已經要take care ,人手採收、processing,好多工藝上嘅嘢,要多重工序先得嚟一杯好嘅咖啡,好想將呢樣spread出去!」

在紛擾的世界,閒暇時的Cecilia飲咖啡,也繼續貫徹「正念」。

「放假想去飲杯啡,見間舖靚靚哋、未飲過,不如入去試吓。唔會好似做cupping 咁,唔會評吓杯啡沖成點、唔會評吓啲豆炒成點,咁樣會畀壓力人。有時見到人喪tune shot ,其實就咁出畀我啦,唔好搞咁多嘢!有嗰個心態係正常,但唔想見到人瘋狂tune shot,唔好嘥咁多杯啡,乖啦你哋 !想放鬆吓啫,其實好攰,唔係做嘢時都係輕鬆飲。」 

下一次當你遇上聚精會神,努力眼前沖啡的Cecilia時,除了用感官享受美味咖啡,也不要忘記嘗試感受一下,它正在散發着某種屬於當刻的非一般aura。

ImNuts

Urban Nutters是幾位熱愛飲食的Nutters成立的網上飲食媒體,訪尋各路飲食精英,深入淺出講解不同的飲食知識,同時召集一眾志同道合的Nutters,組織全港獨一無二的飲食社群。

留言

Your email address will not be published.