當咖啡師，牽涉由上線至下線的多重手藝和技術，要深得當中真諦，所花時間分分鐘要十年八年。如年輕時已立志由低做起當個成功咖啡師，都尚且有時間吃苦繼而成功，但半途出家轉行的辛酸，實在不為人道。
人稱「師兄」的Michael（蔡逸興）就是放棄本業，再中途投身咖啡業、重新來過的人辦。捱過不少苦頭，到今天有了自己的咖啡事業，靠的就是「傳承」兩個字。
裸辭彰顯決心
隨便找間咖啡店，可能找到本來是建築師、律師、時裝設計師、廚師的精品咖啡師，Michael本業是物流，來到二十多歲，身邊環境迫使他為未來好好打算。
「做物流日夜顛倒，對貨多過對人。身邊同事都比較年長，唔想好似佢哋咁去到嗰個年紀都得個做字。自己係長子，而同女朋友都拍咗好幾年拖，要打算將來。」
他選擇裸辭，證明自己重新出發的決心，即使未有非常明確計劃，也勇於踏出一步。
不可不信緣
機緣巧合之下，有天在廟街吃飯後，天意讓他走進了公廁對面那一排睇相佬檔口，找人指點迷津。
「係雀仔擔籤形式畀人指點吓迷津咁。啲人話睇掌相可以知到多啲嘢，佢有一句說話比較入心嘅，佢話我屬於木命人，需要流動啲行業。」
即使他的物流本業都足夠流動，但睇相佬更加肯定了他的方向，再在誤打誤撞，又帶點幸運地，就順利地加入了本地著名連鎖店「星巴克」當起前線來，其後又到了被喻為少林寺的中環Fuel。
「喺連鎖店學到嘅，就係佢哋最擅長嘅系統化。咖啡未必係最多話題嘅嘢，但有佢哋嘅文化，好深深體會到就係佢哋嘅系統化！
「喺Fuel日日打shot打幾百次、打奶打幾百杯，日子係咁過，追求到做咖啡人嘅功夫！」
打好根基
此時Michael希望再向前多踏幾步，和在「星記」遇上的 Reeves Chung 第一次創業。
「喺星記（星巴克的暱稱）同區嘅，偶然遇過一、兩次。一個大學畢業生。有一次去借貨時見到點解有個文質彬彬嘅人企喺cashier，講嘢chok晒咁？原來佢嚟幫更，咁就開始溝通。第一句開場白就問我有冇諗過自己開咖啡店！我覺得呢條友嚟真㗎喎！」
這個緣份，即使是熟悉的範疇，也有接觸全新的工作領域。
「每個過程都係做啲唔識嘅嘢，例如做行街sales、炒豆，我好少做嘅admin嘢。喺新嘅環境都係學習吓，又學習吓租舖、裝修，幫自己擴大版圖，營商策略上想法都可以實現到，呢啲嘢吸收咗之後，對我自己開自己新業務都有幾好根基喺度。」
雖然如此，Michael選擇在合作得好開心時候決定各自發展。這時對他來說，正正是了解了連鎖店的系統，又學到咖啡師武功後，更進一步把技能融合一齊的時機。
感言
跳出comfort zone，甚麼都要靠自己，可算是重新落到地面，從新開始，Michael先要感謝身邊人。
「當然係感謝我太太，唔聲唔聲撐咗我咁耐。由物流轉去咖啡除咗重新做起，喺生活上亦都重新起步，由咁高drop到落咁低嘅薪水，都係重新適應。」
「太太放棄佢最鍾意嘅工作，選擇做屋企嗰個，我就做出面嗰個。放棄緊佢嘅理想、鍾意嘅嘢，過程中佢都默默支持，除咗『多謝』都唔知有咩好講。」
有了身邊人支持，Michael更有信心開創自己事業。訪問的下集中，他會繼續分享傳承的信念，還有最令他難忘咖啡！
