人稱「師兄」的Michael（蔡逸興），本來從事物流業，誤打誤撞下投身咖啡界，在連鎖店和「少林寺」練得一身好武功。
他其後選擇創業之路，為咖啡愛好者提供好啡之餘，他有更重大使命，就是「傳承」，同時自投身咖啡行業以來，從無忽視培訓的重要，無論在不同場景也希望藉咖啡為身邊人帶來非一般的感覺，如果能為參加者打開人生新一頁，他更會覺欣慰。
無私分享
「起初教都係僱員再培訓課程，嗰度未必個個有心嚟學嘢。有啲諗住過吓日晨，睇吓發生乜事，未必個個諗住開舖、做前線入行。我都睇得幾化、幾開，喺嗰度嘅任務係教知識技能，但我有一個小小目標，係透過百零個鐘頭教識大家欣賞咖啡。
「如果有人入到行，甚至有自己咖啡事業我當係bonus。好多人可能覺得咖啡苦呀酸呀，可能未飲慣，會好卻步，所以尤其是而家喺香港可以叫做後精品咖啡年代，究竟有幾多人真係懂得欣賞？定喺間小店打個卡就叫識得欣賞？我角色就係透過我分享另一個角度嚟睇一件事。」
放膽一試
他絕對沒有「做嗰行厭嗰行」之感，相反他絕對鼓勵有志者入行。
「希望繼續有人傳承落去！而家資訊科技咁發達，要做個師傅，或者叫做有頭有面嘅人，邊度仲需要十幾年經驗？以前冇乜資源或者悟性低，先至要熬咁耐！
「而家基本上打開YouTube學一樣嘢唔難！睇你悟性同學習態度係點，如果學習態度係正常、係良好，唔使10年，玩吓手一、兩年，上完嗰百幾個鐘嘅再培訓堂，可以講『聽日我開舖喇阿sir！』」
感同身受
香港這個彈丸之地，精品咖啡愛好者多不勝數，而這門或多或少牽涉個人魅力和伎倆的產業，Michael也有一番體會。
「見到好多home roaster參差不齊，我都有去市集買啲有noise啲嘅home roaster嘅豆。佢哋啲生豆真係好高質，不過試過之後，部分會諗｜如果development time長啲就好嘞、唔好咁青就好嘞……
「飲落去會明白，回想番當初自己學嘅時候，兩條友收埋自己喺office自己炒、自己cup、自己試，邊有人教嘅啫?SCA 都未有！咪睇書囉！
「真係感同身受去試，覺得其實我以前都係咁咋喎！唔同年代都會見到啲咁嘅嘢 都係開心嘅，因為聽日可能係你嘅競爭對手都唔定！」
即使如此，他仍然覺得香港的精品咖啡標準是很高的，最近他便遇過令他十分讚歎的本地烘焙廠計劃，令他對「Roasted in Hong Kong」更有信心。
Michael會如何介紹自己的炒豆風格？
「可能我有啲沉悶，如果喺呢個年代係會鍾意攞隻豆最多味道。Body、aftertaste、回甘……自己唔係睇得好重。Body可以隨唔同沖煮方法得到番相應就ＯＫ，飲手沖唔一定要好full body，除非隻豆好full body。要好似飲杯茶咁，成日都話tea like、好silky味道行先最理想。反而意式espresso可能烤得深少少，intensity高啲。
「烘豆中淺for手沖，中至中深for espresso。可能好多人都做緊，所以係沉悶啲嘅方向。」
最令你印象深刻的一杯是怎樣？
「咁多年飲咁多杯，未必因為味道而好impressed，反而有啲故事性嘅，一定係我第一杯咖啡！
「就係喺星記返第1日嗰杯in house training上堂嘅morning coffee！當時係印尼嘅Sumatra！我當時唔多接觸咖啡，突然間第一杯French press出嚟！好intense、好earthy、好苦，呢一杯鎖得住喺印象裡面最深！好味嘅咖啡好多，但好有印象、好能夠代表我自己人生，呢杯咖啡真係數一數二！」
在咖啡生涯中做過最nuts的事情是甚麼？
「當時做前線時算係幾瘋狂，住粉嶺返中環，要朝早6點幾出門口，一日返十個鐘，計埋晒都一個『對』，同以前返物流差唔多。覺得要堅持認真，但係開心嘅，因為堅持完之後得到想見到嘅嘢！
靠自己雙手創業， 迎來更瘋狂的事情。
「上一個創業期間係兩個人，自己同拍檔，唔係你就我。當時未有資源請人就自己做生產，分咗工佢就對外見客，自己把關住炒豆做生產。最瘋狂係炒咗一日一夜，瞓覺都係瞓公司嘅紙皮上面。當時要趕住交貨，返到屋企好似喪屍咁，都未瞓到覺因為成身咖啡『除』，抹出嚟嘅油都係有味！」
追逐夢想的重要
Michael現時最專注的，當然是由他一手創立，全力以赴的個人咖啡品牌「澄謙咖啡」。世界如此紛亂，他卻能保持清晰視線，創立新事業。
「因為疫情而引發到自己跳出嚟搞新嘅事業，『澄謙』兩個字代表喺呢一行嘅心態，甚至對做人做事態度，咁啱又係我對仔女個名。點解選擇用番咖啡創立自己品牌，其實都冇其他懸念。
「呢間公司對我意義好深，以傳承作為基石，希望透過咖啡去激勵身邊嘅人追求夢想。行業都需要好多嘢，都要培訓新秀，帶啲新人上嚟。咁啱慶幸地咖啡呢段時間都好多人熱衷，開店又好入行又好，我既然喺呢個行頭都有一定經驗，可以嘅話希望盡做、傳落去，透過教學建立呢個品牌。
「可能好行貨，鬼唔知阿媽係女人咩？但有時都要做個牽頭角色，攞自己最純熟嘅嘢同人分享，我本身唔係做咖啡嘅，到而家可以畀人睇到好多嘢。譬如教小朋友拉花，佢哋一氣餒就激勵佢，可以凝聚到一班咖啡行業嘅下一代。」
相信Michael會繼續以謙卑之心，澄清的視野，肩負傳承大任，為今後的咖啡界培育生力軍。
