/

資深咖啡導師 浩南 以咖啡擴闊世界 — 溝通篇

一杯咖啡,對很多人來說,是提神工具、是每天生活一部分。

對於在咖啡行業近8年的浩南來說,除了上述功能,他還活用一杯咖啡,在店內努力與人溝通,在課堂內啟發更多「新鮮人」,帶來不能量化的價值。

「咖啡係一個橋樑,同客人溝通咗之後,你會發現世界闊咗好多!」

被拉花吸引

自言性格內向的浩南,本來任職意大利餐廳的副廚,但碰上愛咖啡的同事,機緣巧合下看到他們玩拉花,便引起了他的興趣。

「幾得意,喺咁細個杯玩拉花!」

其實他本來覺得咖啡只是苦的飲品。

「咁苦嘅嘢都飲得落口?好奇怪。」

不過愈看拉花便覺得愈有趣,同事便介紹他修讀僱員再培訓局(ERB)的課程。

「覺得有啲難度,有唔同煮法、唔同工具,幾得意,又見出面咖啡店嘅咖啡師好似好型。」

完成課程,他很樸素地拿着打印出來的履歷,到中上環一帶的咖啡店逐間叩門應徵。很多人原來不知道,第一間聘用他的,是在上環巷仔的The Cupping Room。

前線與教學兼備

落到「戰場」,便不是一個「型」字那麼簡單。

「原來做咖啡好大壓力,又要不停講英文,但我英文又唔好。又好忙,朝早開舖做到夜晚,不停英文對答,壓力好大。嗰陣比較年輕,所以好怯,返咗一個月冇再返。」

幸好那種生活沒有令他放棄咖啡,然後他便找到了在Barista HK的工作。當時正值觀塘新店開張,有廚師根底的他更可在食品飲品兩範疇盡情發揮。初時構思餐單,其後漸漸投身教學工作。不經不覺,至今已經7年多。

「因為公司每年都有旅行!哈哈哈……

「無論返內地、日本都有做嘢、擺檔,除咗見識吓,仲可以了解吓其他地方咖啡文化。平時教學生,但調返轉自己都係一個學生,呢個世界咁闊,冇理由學到晒其他嘢㗎嘛!

「老闆好着重培訓、好着重人,佢唔會吝嗇培訓或者喺人嘅方面。第一佢係為公司,第二佢係為業界好,所以佢要培訓更加好嘅咖啡師出嚟!

「感謝兩個老闆真係對我不薄,培訓、待遇方面都好用心,做足咁耐,佢哋錫咗我咁耐、教咗我咁耐,好感恩。」

啟發新鮮人

正因為老闆着重培訓,所以浩南也加入了精品咖啡導師行列,在他出身的ERB課程中教學。

「可以令大家認識到精品咖啡,令佢哋改觀,原來唔止一小撮人玩嘅。可以影響老一輩、青年、未來棟樑嘅後生仔。

「明白好多都為咗攞嗰4,000蚊津貼而嚟,為咗4,000蚊冇問題,但作為一個導師,要本住要佢認識精品咖啡係乜嘢嘅使命感!

「好開心嘅係,好多人本來飲方便快捷嘅大品牌咖啡,有可能影響健康。佢哋上完堂後真係去精品咖啡店飲,或者自己落手落腳買工具返屋企沖。有同學完成課程,譬如會同我講哥倫比亞出咗啲新豆好似好吸引,咁起碼佢噏得出哥倫比亞有新豆,即係佢有update咖啡資訊!

「教ERB係好好嘅動力,每個月都會對住唔同學生,會教識到佢哋嘢,又會喺佢哋身上吸收到唔同嘅嘢,互相影響!」

亦師亦友

互相影響的範疇不止於咖啡,而是涵蓋美容、香水、投資,甚至牛肉豬肉不同部位名稱、某某街市今日白菜仔幾錢斤之類。

「我行入班房教緊你咖啡同時,調番轉你又教緊我其他知識。所以我唔係老師,係好似朋友咁。有時完咗課程佢哋都會約番我出嚟食飯,大家都唔會叫我阿sir,甚至一上堂大家都唔使叫我阿sir,可以親切啲叫我浩南就得。因為我唔覺得我比你哋更加大,大家互相學習緊,唔會因為做咗老師就高高在上。」

參加課程的人士來自五湖四海,背景各異,三十出頭的浩南已慢慢掌握到拿捏群眾注意的竅門。

「唔同人,總有唔同方法學習。我要諗有咩方法佢哋比較容易掌握,始終學習都有高、中、低難度,有啲人學習能力比較弱,唔可以排斥佢,要諗唔同方法、教學方式,令全部人吸收到佢哋需要嘅嘢。」

前線互動

作育英才,啟發人們,當然帶來滿足感,不過浩南還是喜歡當一個站在前線,為客人沖煮、介紹咖啡的精品咖啡師,和客人交流。

「我個人唔可以坐喺度,其實呢一行幾好玩,可以四周走嚟走去。我好鍾意同客人傾偈,了解佢哋感情、工作、心情。你願意講,我願意聽。如果你唔願意講,我就去serve你,介紹咖啡,呢個係我職責、我專長。

「如果你話呢杯咖啡幾好飲喎,就會行埋嚟同你傾偈,講吓呢杯咖啡會有啲咩味、係咪成日嚟呢區飲、有冇咩意見咁。」

始終由一杯啡開始

站在前線講咖啡滔滔不絕,甚至站在幾十人前主講咖啡課程,大家都以為浩南本來就是非常熱情、愛說話的後生仔。

「本身我性格好內向,做咗咖啡之後大家覺得我好外向、好多嘢講、好熱情。但   day off、收咗工,我會變番內向嘅人!呢個係咖啡嘅神奇魔力,成為咗人與人之間嘅溝通橋樑。」

即使現代的客人喜歡看手提電話,較以前冷漠,但浩南不介意扮演比較熱情的角色。

「同客人溝通咗之後,你會發現世界闊咗好多!你會發現個人學多咗嘢,或者更加熱情咗。

「都係由咖啡引入嘅,因為客人行入咗你間咖啡店。無論客人行入嚟係熱情又好,冷漠都好,我哋總要令佢同我哋打開到話題。話題點樣打開得到?靠一杯咖啡!呢杯咖啡就係機遇,令我哋去溝通!」

訪問下集,浩南會談到一杯咖啡的根本,即是咖啡豆價值,又會分享在咖啡行業中最瘋狂的事情。記住留意!

ImNuts

Urban Nutters是幾位熱愛飲食的Nutters成立的網上飲食媒體,訪尋各路飲食精英,深入淺出講解不同的飲食知識,同時召集一眾志同道合的Nutters,組織全港獨一無二的飲食社群。

留言

Your email address will not be published.