/

資深咖啡導師 浩南 以咖啡擴闊世界—核心價值篇

廚師出身的精品咖啡師浩南,近8年來不停為客人沖煮咖啡,又踏進教室,主講咖啡課程,啟發人們。

能使他無間斷努力投入咖啡事業,是因為整個過程充滿互動,教學生咖啡時也在學習不同知識;為客人沖煮咖啡時也在互相了解溝通。

不過,現代資訊發達,咖啡店競爭激烈,一杯咖啡的價值,到底是漂亮的拉花、靚仔的咖啡師,還是……應該更注重咖啡的根本:咖啡豆?

尊重咖啡農夫

「我好坦白,我係唔識拉某啲圖案。我而家除咗教你咖啡之餘,亦都係教緊做人嘅道理。你沖咖啡或者你拉花好叻,冇問題,但歸根究底,杯咖啡你會唔會飲落肚?拉花好靚,影相嗰吓係一剎那,跟住都係飲落肚。

「如果因為個花靚而覺得好飲嘅,係對個豆唔尊重。係對咖啡豆有尊重係好緊要,因為對農夫、炒豆師、咖啡師一個尊重。

「比起都市人,咖啡豆農夫更加辛苦!佢哋三、四點起身,摸黑上山,斜坡好斜好高好危險,但可能只係去觀察吓啲豆、咖啡果實嘅情況。採收嘅話唔係求其採收,要分辨熟唔熟、有冇爛,確保所有嘢好好,先採收一粒果實!係有血有汗,甚至有淚,都係為咗令你嗰杯咖啡好飲!」

用心感受

所以照他所說,一杯咖啡的價值,絕對不是一句說話、看一眼便能明白。

「一句難飲呀,或者單單一句拉花好睇呀,又話或個shot出得太快太短呀,杯咖啡肯定唔好飲……淨係用對眼,或者憑說話判斷咖啡品質……真係要用心感受背後農夫做咗啲乜嘢,真係比較少人忽略咗咖啡背後係點形成出嚟!

「咖啡豆出世就有佢使命,就係產生喺味道、風味,同所有成分。而成分係邊個做出嚟?係農夫、炒豆師、咖啡師,好多人用好多心血,加埋地理環境、天氣所有嘢而合成出嚟!而呢粒咖啡豆好珍貴,點樣先對得住佢?就係用我心血心機,令大家一齊感受到我嘅諗法!」

科技令人冷漠

有部分人,對喝精品咖啡的看法可能流於表面,或許這就是社會的錯。

「科技會令人冷漠咗,一打開互聯網,譬如 Geisha個個都知係咩嚟,使乜你講呀咖啡師!科技發達係好嘅,亦都會令咖啡師同客人距離愈拉愈遠。 

「以前上網知識冇咁豐富,因為唔會咁易搵到吖嘛,就落嚟咖啡店吹吓水。你嗰隻Geisha豆係咩嚟㗎?可唔可以講多少少?」

正是這樣,咖啡就是浩南口中,人與人之間溝通的橋樑。只不過,這條橋樑是否牢固,便要看雙方面了。

「科技發達咗好多,互聯網學到咖啡知識係好事。但第一問題係可信性,啲心得係點樣得嚟?可能由講者自己出發點講出嚟!所以啲文章好多唔同款,好容易令初學者、客人、消費者啱啱學咖啡時無從選擇,因為佢哋唔識分辨,呢個咁講,嗰個又另一種講法,到底信邊個?」

肩負咖啡師使命

所以浩南早便洞悉了這狀況,不能滿足現狀,沾沾自喜。

「咖啡師都要進步嘅,客人都已經上網睇咖啡,咖啡師都唔好原地踏步,都需要每日學習、每日吸收新資訊。因為你係咖啡師,有專業知識可以做過濾,分析、過濾、了解啲資訊,再將正確資訊教番客人。

「譬如客人入嚟問Geisha係咪嚟自巴拿馬?其實唔係呀!Geisha最早出世係1931年喺埃塞俄比亞已經發現到,所以有唔同品種!我哋要將正確資訊帶畀客人,因為客人唔識嘅,要用專業同佢剖析番。」

在咖啡行業中最nuts的事情是甚麼?

「為咗咖啡工作就會忘我,會忽略咗身邊好多人,家庭、朋友。朋友結婚,我話唔得閒,要炒豆!要開舖!要沖咖啡!已經將我個人生代入咗咖啡!會覺得咖啡最重要,無論邊個都唔會叫得郁我! 

「你結婚關我咩事啫?我要炒豆吖嘛、我要教書吖嘛、要教識佢哋沖咖啡吖嘛。會忽略咗陪伴屋企人嘅時間、見證朋友重要嘅時刻。

「忽略咗好多嘢,會有後悔,但唔覺得我應該要停落嚟,係要更加努力,將時間分配更加好! 

「認真工作係一個態度,點樣對待佢,用心做出嚟嘅大家有眼睇!唔係求其做出嚟,扮吓嘢、扮OT話好辛苦,人哋係可以感受得到。」

今天的浩南,正努力平衡工作和生活,因為他已經意識到,對待咖啡要等於對待屋企人,雙方都值得投進平等的時間。他母親也在職場中與別人談及當咖啡師的兒子,浩南也希望到訪,向新朋友展現一招半式沖煮咖啡伎倆。

「呢件事幾開心,令大家有機會坐埋一齊,咖啡真係好好嘅橋樑。」

香港人的咖啡樹

香港這片亞熱帶土地,原來也有咖啡樹生長,產出屬於香港人的咖啡,浩南也感到光榮。

「香港有咖啡樹係光榮!以我認識,咖啡生長喺接近赤道地方。其實有好多國家都種到咖啡樹,只係冇咁出名啫,唔代表人哋冇用心血心機去種。

「呢個世界冇咩唔可能,每一日天氣變化、氣候影響,會令到香港有一日種出嚟嘅咖啡樹可以去到世界級!

「當然而家仲係嬰兒階段,要發掘好嘅方法種優質咖啡樹。唔可以單單話香港咁潮濕嘅地域,點同其他國家比呀?冇錯!而家係咁啫!但10年之後,唔包保仲咁講。起碼係自己地方,出嚟嘅味道,我係有信心嘅!」

言談間,浩南不但對自己工作範疇十分清晰,也對將來樂觀。

「人外有人,天外有天,永遠都有人比你勁、永遠有人比你更加top!所以人需要每日學習,不斷要有突破!」

短短的說話便是推動他向前的動力,繼續以咖啡開拓更遼闊世界!

ImNuts

Urban Nutters是幾位熱愛飲食的Nutters成立的網上飲食媒體,訪尋各路飲食精英,深入淺出講解不同的飲食知識,同時召集一眾志同道合的Nutters,組織全港獨一無二的飲食社群。

留言

Your email address will not be published.

Popular