已有十多年經驗的資深咖啡師Jonathan，憑着熱情在不知不覺間導人入了精品咖啡的坑，同時自己也不斷學習繼而精進，除了成為香港Cup Tasters冠軍，累積下來的各個比賽冠軍已經有10個。
然而Jonathan強調自己並非天生異稟，sensory也並非異於常人，靠的只是不停發問，和為自己設下地獄式訓練。
地獄式自家特訓
Jonathan獲公認嗅覺味覺敏感，他直言只是天生和一般人一樣，絕對不是super taster，也不是味蕾特別多。
「我都知道唔係天賦非常好嘅人，係來自秘密訓練。就算Q Grader我都唔係一take pass，我都要補考，惟有喺tasting嘅時候不斷去注重多啲細節，諗吓之前有冇飲過。」
他口中的秘密訓練，其實一點都不花巧，反而應該用「艱苦」來形容。
「我 brew一杯水洗椰加做 reference，同時喺張枱上我會 brew 20杯咖啡，十零杯同 reference 一樣，其餘同 reference 唔同，但其實佢地都係水洗椰加只係唔同合作社，個味好似!我會咁樣練習，會搵番同 reference 嗰杯唔同嘅耶加出黎。
因為喺正式比賽時我好容易飲第三杯時違忘咗第一杯既一些細節，呢個方法可以短時間鍛煉到記憶力。」
失敗構建成功
Jonathan雖擁有大大小小共10個咖啡比賽冠軍，但這些冠軍背後，到底經歷了幾多失敗，又有多少人知道？
「精品咖啡最迷人嘅地方，同商業咖啡最大唔同嘅係有趣嘅風味，所以好多時我會遺忘咗body、balance等等呢啲細節。因為我自己喺Cup Tasters比賽經歷咗好多失敗，每次失敗我都會反思點解會失敗、點解會爭少少。去到後期我發覺淨係注重風味可能唔夠，要諗多啲。」
「跟住嗰年又因為body就fail咗，可能再要諗多啲。之後又可能因為甜酸苦嘅balance注重得唔夠，又失敗咗，所以好多細節要從失敗中去培養。」
Jonathan說得輕描淡寫，然而有苦自己知。反複失敗，終於構建了他的成功。
如何善用黃金8分鐘
Cup Tasters比賽要求參賽者在最快時間內，於8組、每組3杯共24杯咖啡中，找出每組不同的一杯。
「之前係冇章法係咁飲飲飲，發覺咁樣亂咁嚟，好快就超時，原來喺台上8分鐘比你想像中快！太多失敗經驗，後來自己創造咗一套流程。」
如何好好運用這幾分鐘，和留意咖啡整體風格的變化成為致勝關鍵。
「開始嘅時候啲咖啡比較熱，去辨別風味嘅唔同比較好，開頭我會好快飲晒嗰24杯，個腦淨係諗住搵風味唔同嘅，通常喺熱嘅時候有啲set會特別明顯，例如兩杯巴西一杯埃塞俄比亞、兩杯哥倫比亞一杯印尼係容易辨別出嘅。」
「有時比賽考到人嘅地方，就係三杯一樣味。好可能係同一個莊園、或者係同一個國家，只係可能唔同合作社，個味係好似！飲晒頭一次24杯，分辨風味可能用1分40秒至2分鐘，跟住之後仲有6分幾鐘，就要解決三杯一樣味嘅。既然佢哋風味一樣就要用第二招甜酸感嘅唔同、或者酸質嘅質素。」
事情變得愈來愈技術性了。
「有時可能係蘋果先檸檬，而酸質方面兩杯都可能係檸檬，但有一杯尖少少，或者冇咁平衡、或者程度低少少；又或者有兩杯，第一杯甜少少，可能就係甜酸感不同，酸質質素唔同，我就會搵呢啲唔同。」
見招拆招
即使這樣細致，也不是必勝。
「最令人困惑嘅係3杯唔同味，3杯酸質都有少少唔同。第三招就係body嘅重量，杯咖啡嘅黏杰度去到溫度有啲下降嗰時，黏杰度分別開始增加。其實仲有第四招會靠body有幾順滑，或者個清潔感、aftertaste。 」
「大家唔一定要抄我，但好多外國選手嘅第二招都同我唔同，你要搵自己嘅長處，最擅於辨認乜嘢唔同，再去排序。」
在咖啡生涯中，做過最nuts的事情是甚麼？
相比不少咖啡師的瘋狂經歷，例如是連續通宵炒豆7日7夜、地獄式返工放工再練手沖、或者放棄高薪厚職去開咖啡店等，但Jonathan的瘋狂卻是夾雜了洋蔥。
「呢次係瘋狂得嚟有啲遺憾、有啲傷心。最瘋狂就係2014年參加世界賽，嗰年我個仔出世，佢係喺日本出世，而我唔喺老婆身邊，因為要參加虹吸香港賽同世界賽。我都喺日本比賽，可能只係幾個鐘頭車程之外……所以可能最瘋狂嘅一件事，亦可能係呢世人最遺憾嘅事，亦都冇辦法彌補，錯過咗就係錯過咗。」
「老婆嗰一刻係支持嘅，但後尾聽番佢同啲朋友講，佢係有啲介意嘅，有啲唔開心，諗吓其實都幾心酸，所以而家我花咗好多時間陪個仔。」
最緊要發問
人生有幾多個10年？剛在咖啡圈過了一個10年的Jonathan，縱使自問與年輕咖啡人交流不算多，但他有甚麼勉勵新入行的後輩？
「要多啲發問！呢個都係自身經驗嚟，我初入行時都周圍問人，無論香港、外國所有咖啡師，我會不停咁問。有少少唔明就會不停咁問，呢個係最快嘅學習方法！」
「唔去嘗試，你唔會知道有咁多人肯教你嘢！可能你問100個人，估唔到原來有90個人肯答你！你唔好介意嗰10個人唔睬你，可能畀人直接粗口問候都試過。有90個人願意教我，得着已經好大。去發問，再加而家好多咖啡資訊都可以喺網上面搵到，多啲問喺呢一行做得比較耐少少嘅人，因為擁有知識同聰明嘅人係唔介意分享！」
「沖煮上可以花多啲心機同埋時間去思考，搵藉口、賴一樣嘢係好容易，你係咁賴就未必學到新知識。如果不停去檢視自己或者尋求新突破，其間會學到好多新嘢，新嘅解決方法！」
對於「可能」一詞，它有它不肯定的意思，但同時意味將來的潛力。常把「可能」掛在嘴邊的Jonathan深明此道理，在微小的可能性中，尋找到無限可能。
