不知大家有否發覺，很多知名咖啡師都是半途出家，本來在飲食業見步行步，在周圍氣氛影響下才嘗試第一口咖啡，然後便慢慢愛上，甚至用心鑽研。
今次的主角Jeffie，本來就是一名espresso愛好者，每天無espresso不歡，後來更成為烘焙比賽冠軍，也自己開店與愛好者分享沖啡之樂。
她與大家分享成功之道：「過程一定有失敗，唔好因為5次、10次失敗而放棄，而要堅持落去。」
單純熱愛
Jeffie是真心喜歡飲咖啡，才萌生入行的念頭。起初她只是單純的熱愛，而投身連鎖店工作，也差不多純粹為了生活，加上公司文化不算鼓吹現時的所謂精品咖啡，所以還未有機會更上一層樓。
「起初入行真係因為鍾意飲咖啡嗰條癮，鍾意飲意式咖啡、mocha。咖啡癮好勁，嗰時最少一日飲3杯，但冇話咩研究啲咩風味 。」
後來這間連鎖店的其中一位經理自立門戶，並邀請Jeffie加盟，又慫恿她參加咖啡師比賽，Jeffie的咖啡世界才擴闊了。而在手沖和炒豆之間，Jeffie覺得炒豆更有趣味。
「因為無論係靚豆或者一般普通豆，可以炒到發揮到佢原有獨特嘅味道，係有滿足感。而自己喺炒豆過程中，又不斷反覆試味，都學咗好多嘢！」
兩次烘焙冠軍
Jeffie是兩次本地烘焙比賽的冠軍，兩次的奪標背景也有點不同。
「兩次都覺得有啲難以置信！因為嗰陣時未考Q Grader，只係因應自己嘅經驗，因為烘焙同tasting係有關係，但嗰陣時冇經過一個好標準嘅訓練，如果突然之間贏咗比賽係驚訝！
「第二次比賽冇再諗好多，嗰陣時工作係齋企吧，有幾可炒豆？兩個月先炒一次，所以嗰陣時都難以置信㗎，因為炒豆要練習㗎嘛，練習得少都攞到呢個獎，好驚訝！真係好興奮囉，仲搭的士去攞獎！」
炒豆的感覺
雖然Jeffie如此說，但她總有點心得和大家分享。
「除咗運氣，好靠個sense！係落爐嗰下，突然之間靈機一觸，嗰下就要落爐！」
「試烘焙機嗰日好重要，要當試機嗰日就係比賽嗰日，因為試機嗰日嘅炒豆profile同所有數據，要同比賽當日profile一致，先至攞到高分！ 」
「我比較追求甜度，接受唔到咖啡豆有草青味、焦苦味。如果烘焙時喺梅納反應階段，火力時間控制得好，咖啡豆甜度就可以推到高峰，好考烘焙師經驗㗎！咖啡豆原味夠甜，客人就飲得開心嘞！」
說到尾，比賽就是她研究咖啡、再深入其背景的動力。
重新開始
身為美國咖啡協會咖啡品質鑑定師的Jeffie，曾在烘焙公司工作時，有位客人跟她很合拍，又打算開咖啡店，二人一拍即合便開了Starting Over。
當初開店，是希望有一個分享咖啡的好地方，又可以和朋友傾偈，練習大家沖啡技術。而店子的名稱與標誌，也別出心裁。
「舖頭logo 係張filter 紙，沖手沖嘅時候張filter紙係濾走咖啡嘅雜質 ，filter 咗一杯比較clean 啲嘅black coffee出嚟，比喻人生裡面負面嘅嘢、雜亂嘅嘢，一次過畀張filter紙濾走晒，我哋想客人飲完我哋嘅咖啡有重新開始嘅感覺。」
持續發展之道
當起老闆，店子一開，當然不少愛追新店的咖啡愛好者會蜂擁前來光顧，不過當光環消失，一切真的重新開始。
「第3個月都仲OK ，第4個月打後如果冇lunch set畀客人揀，佢哋真係唔嚟！好靠嘢食去維持生意，仲要定期創作新嘅飲品出嚟，吸引客人返嚟。」
她直接道出了在香港營運咖啡店的難處。
「客人主導咗咖啡店定位，而家嘅trend 係地方靚、影相，為打咭。因為冇得去旅行，就追住某啲咖啡店；以前好hit 咖啡比賽嗰陣，會衝住啲贏咗獎嘅咖啡師飲咖啡」
「不過香港消費者唔算難教，即使有一批人仲係鍾意好深炒嘅，其實講吓仲有其他味喎，佢哋係接受到，慢慢教，只係唔可以講：『你唔好飲咁燶、咁苦喎』、『好燶喎你唔覺嘅咩？』之類。」
要逐步邁向成功，絕不能輕言放棄。
「老闆重大責任係堅持，唔好燒咗啲錢就當冇事算數。你自己set咗某個目標，要喺呢個行業攞到啲成就、攞到啲獎，過程一定有失敗，唔好因為5次、10次失敗而放棄，而要堅持落去！」
在咖啡生涯中做過最nuts的事情是甚麼？
「通宵炒豆！ 最密炒豆唔係玩烘焙比賽，而係玩Barista比賽！通宵練習、通宵炒豆為咗WBC香港區選拔賽，背稿背到癲咗！因為要學演說技巧 ！」
每天都可以飲的咖啡是怎樣的一杯？
「Espresso！ 每日返到公司，一定要飲espresso！一來可以check吓house blend穩定度，二來睇吓咖啡師tune shot點樣，三來咖啡機同磨豆機有冇啲咩偏差而要維修，四來espresso係出畀客人嘅意式咖啡靈魂，五來自己都要提提神！哈哈！」
最深刻印象的一杯咖啡是甚麼?
「當然要數參加第一次咖啡師比賽時沖的一杯signature drink，到而家都記得好清楚！想知係咩？就要來我舖頭搵我喇！」
做訪問也不忘宣傳，就明白Jeffie的對咖啡的愛有幾熾熱。
