/

NOC COFFEE創辦人SAM CHAN 哲理篇

SAM CHAN(陳澤森)是NOC COFFEE創辦人之一,本來由擺花街的小店,擴展至今有多間遍布港九新界的分店,又入選亞洲50大咖啡店。

大家看見的固然是他的成功,不過他自言工作其實十分貼地,捱過不少苦頭。多年來的耕耘,使他更加了解這個行業。

今次他繼續分享獨特見解。

貼地工作

身為知名咖啡店創辦人之一,他的生活當然離不打理咖啡店,除了決策的工作,在店內也一樣能找到他的蹤影,畢竟他也是個咖啡師。

「好似普通同事咁!返咗幾個禮拜嘅其他同事,可能會覺得我係老細咁,但耐咗

就有傾有講,我覺得返工應該開心少少!其實你打份工,我又係打份工,大家都執枱!我一返去就吸炒豆機啲塵,又吸靜電抽油煙機,成身濕晒!」

有苦自己知

自第一間NOC開業以來,發展算是順利,即使疫情當前,咖啡店因為禁堂食的影響也相對較小,NOC仍能愈做愈大。

SAM的經驗告訴他,即使股權少了,但收益可能是反比。

「只有一間店而擁有50%股份,同埋有好多間分店我只得1%股份,後者得到嘅收入,係多過得一間店但有50%!」

無論如何,NOC也可能成為了不少咖啡愛好者創業的借鏡或啟發,SAM也察覺到近年的精品咖啡店瘋潮。

「香港呢幾年簡直瘋癲,太多人開COFFEE SHOP!真係唔係佢哋諗到咁童話式,好現實,根本係搵唔到食嘅!10間舖頭有9間都搵唔到食!只不過係賣緊兩年租約,唔會回到本,你亦都冇辦法可以續租,因為會加你租,你亦都冇錢去開另一間!你要準備可以玩咗兩年之後可以做番原本嘅嘢!」

着重多元化

NOC的全名叫NOT ONLY COFFEE,這是SAM的營運概念,其實也是非常現實的狀況,有幾多間店子能獨沽一味靠沖咖啡便能一直支持下去?

「由始至終冇可能有一間coffee shop淨係沖咖啡!全世界都冇可能!就算我喺澳洲都唔可能淨係沖咖啡,一定要有嘢食!淨係沖咖啡賺唔到錢,或者可以勉強生活到,但香港就一定生活唔到。」

說到尾,可能是認知問題。

「或者係大家對COFFEE SHOP嗰個認知,同現實唔一樣。做呢一行嘅人,同普通客人對COFFEE SHOP睇法係完全唔同!」

工作的樂趣

如果想投身咖啡行業,SAM勉勵大家一定要作好心理準備。

「而家請嗰啲後生仔,十七、八歲,成日都會覺得鍾意咖啡啊、好有熱情呀,我唔覺得嗰啲係熱情囉,得把口講。一嚟就要我教呢樣嗰樣,少少苦都唔肯捱。一炒豆係好明顯㗎,炒豆係好厭惡嘅工作!」

沒錯,會渾身都是咖啡味、油脂味、又熱又焗……

對於十多年來的工作,SAM有獨到見解。

「冇工作係你好鍾意嘅,只會有份工作冇咁討厭。咁你慢慢做落去,就會發現到當中有咩樂趣。隨住你投入一個行業,慢慢學到啲嘢、好多人認同你,你就會愈嚟愈想做!好難一開始就會鍾意嗰樣嘢,因為好快又會唔鍾意。」

大家嘗試回望一下,自己的職場生涯也是如何。

SAM是第一屆香港咖啡師大賽冠軍,而在咖啡生涯當中,做過最NUTS的事情是甚麼?

「最瘋狂當然係為比賽嗰啲練習,人生冇乜試過咁瘋狂,我唔係自願但係都冇嘢瘋狂過佢!」

「我唔知點解啲人開舖頭可以放假㗎,我同我PARTNER差唔多八、九個月都冇放過一日假,日日都返十幾個鐘頭!」

「我啱啱有炒豆機嗰陣時140磅,有炒豆機幾個月後係120磅!瘦咗20磅!日日係咁喺度試,9點返公司炒到凌晨兩三點……呢啲都好瘋狂!」

得到很多

SAM由普通打工仔成為知名咖啡店老闆,他回望這十多年來得着的一定很多,但他卻覺得,即使有些人和事失去了或錯過了,也不必後悔。

「得到嘅嘢係好多,可以KEEP住做一樣有興趣嘅職業,可以嘗試好多唔識嘅嘢,不論技術上或者心態上會有進步或者成長。」

「冇乜嘢話失去嘅,唔好話失去,好多嘢係有正有反。」

SAM的太太是因為咖啡而認識,女方由客人變好友,再成為戀人,繼而成為伴侶。他覺得相處之道在於,兩人在鬧意見後如何處理。

「如果同一個人嗌完交,嘥少少精力氹吓,佢會冇事嘅,呢啲人值得一直相處落去,無論朋友又好,咩關係都好。」

「通常真係忍唔住先會嗌交,可能對我嚟講係一個溝通方法。嗌交,最重要對事,唔好對人!」

正如一杯好的咖啡,即使咖啡師是靚仔靚女,沖出來的咖啡也要達到要求,才能長久。

ImNuts

Urban Nutters是幾位熱愛飲食的Nutters成立的網上飲食媒體,訪尋各路飲食精英,深入淺出講解不同的飲食知識,同時召集一眾志同道合的Nutters,組織全港獨一無二的飲食社群。

留言

Your email address will not be published.