/

有心咖啡導師 Celia Wong 堅持好味篇

沖得一手好咖啡的咖啡師大有人在,沖得好卻絕不代表教得好、懂得啟發別人。

人稱清清老師的資深咖啡師Celia(黃秀清)不但享受教學,而且絕不困於框框中,啟發不同階層的咖啡愛好者。

縱使教學佔她的咖啡生涯十分重要部分,不過她對「好味」的堅持,也是值得學習。

興趣成為職業

清清老師學習咖啡純粹因為大約10年前不幸地成為了失業大軍,絕不坐食山崩的她便四處尋找可能性,她一直對咖啡有興趣,所以僱員再培訓計劃課程便成為了她其中一個選擇。

「我冇諗過一樣嘢係咁難……我讀書雖然唔係好叻,但慢慢讀、大學跟住讀碩士都OK。但點解呢粒咖啡豆咁難搞?整極都唔好飲!反而令我好想知道點做。」

身為初學者,她「唔理三七二十一」購入的第一部磨豆機便花費三千多,第二部更加是堪稱磨豆機神器的EK43。

「一有呢部機嘅時候我就買,我首飾又唔敢買、咩都唔敢買,係買呢部機,仲唔敢帶返屋企,因為部嘢太大啦!」

「真係好鍾意玩,成屋都係咖啡喺度!同超級市場啲咖啡真係爭好遠,同上堂嗰啲精品咖啡都已經係兩樣好遠嘅嘢!都買咗十幾台機,自己成個人都瞓咗落去!」

享受教學

其後多年,她不斷考取咖啡資格,無論Barista、Q Grader、虹吸、沖煮、烘焙、感官、評審……說得出的幾乎都有,只欠關於生豆的資格,因為她始終覺得要在產地做有關生豆的事情才比較適合。

擁有如此多資格,清清老師絕對夠資格成為大家的咖啡老師,而她也享受教學。

「本身係VTC酒店旅遊科老師,我覺得咖啡帶畀我熱情,令我熱愛教學,令我有種滿足感,來自於學生真係學識咗,佢又做到想要嘅嘢。」

不吝傳承

教學當然要把正確事情解釋和實踐出來,讓學生正確地學習。

「教學嘅原因係我學識咗一樣嘢好耐,某樣嘢係做到嘅,就希望將嗰樣嘢傳承!以前啲老師話,有啲茶嘅師傅成日都留番一把喺自己度,結果死鬼咗,啲嘢留唔到落去!」

「如果我覺得自己啲嘢真係好好、好叻,或者有啲嘢實驗咗好多次都做得好嘅時候,不如將佢分享畀大家!」

好味的真諦

同時,她也要保持初心。

「初心係純粹追求好味!」

「好味只有兩個字,就係『平衡』。不多與不少,唔會太甜、唔會太酸、唔會太苦,可能有丁點苦,只係強度唔一樣。」

你的好味並不代表他的好味,可以好主觀,卻又可以好客觀,清清老師教大家如何分辨,別人真正覺得好味是怎樣一回事。

「偷偷地望下佢哋(客人),如果你見到一個人會心微笑個樣,我相信嗰杯就係好味,呢樣嘢係冇得呃,每個人都搵得到嘅。」

「咁當然都有啲係『嘩真係好好味呀』,嗰時你真係知道好好味啦!」

驟耳聽似乎十分虛無飄渺,不過只要細心留意,並先照顧了客人所需,定能尋獲好味。

「唔虛㗎,只係你冇理會到啫!去理解顧客需要,如果個顧客話畀你聽,佢嘅口味真係想熱啲嘅咖啡,咁首先去理解咗佢需要先,先做佢想要嘅嘢。之後先慢慢同佢講:『太熱呢……其實都可能流失咗某啲嘢㗎。』」

10年演變

這十多年來,清清老師也覺得香港人對精品咖啡的認知提升了不少,風氣也變得非常盛行。

「以前香港人會話只飲淺炒,而家會問咖啡豆用咩處理法。睇到原來香港人真係鍾意咗精品咖啡,嚟到今時今日改變咗好多,多咗好多人鍾意咗咖啡,開咗好多咖啡店,林立唔同地區,甚至crossover唔同餐廳,與唔同公司合作,時裝又好、傢俬又好,咩都可以擺埋一齊。」

「有啲小店已經開咗六、七間分店,香港又出咗好多世界比賽冠亞季軍,好值得光榮,亦都好為呢樣嘢開心,香港咖啡文化已經普及。」

「我哋做過好多home brewers評判,水準都好好,覺得好開心!我哋成日都講話好希望將咖啡文化推廣出去我覺得而家真係做到咗,尤其香港人鍾意好多新鮮感嘅嘢,不斷變但又可以留番啲以前嗰種風格。」

「啲cappuccino都變咗,以前好厚泡,自從SCA cappuccino係1 cm泡之後,我哋比賽就要1 cm厚,變咗同latte好相近,杯杯都一樣。然後我就返番轉頭想做厚泡嘅cappuccino,有好多唔同嘅變更,但離不開大家都係追求好味。」

不斷追求好味和當導師的清清老師,其實非常有社會責任,為年長人士開設了名為「光咖啡」的社企,可讓他們有精采的第二人生。在訪問下半部分,她會繼續分享!

ImNuts

Urban Nutters是幾位熱愛飲食的Nutters成立的網上飲食媒體,訪尋各路飲食精英,深入淺出講解不同的飲食知識,同時召集一眾志同道合的Nutters,組織全港獨一無二的飲食社群。

留言

Your email address will not be published.

Popular