有心咖啡導師 Celia Wong 諄諄誘導篇

資深咖啡師Celia(黃秀清)有「清清老師」之稱號,顧名思義,她除了不同範籌的多個專業咖啡師資格,也熱愛教學,啟發了眾多對咖啡有熱情之餘,也希望在咖啡界發展的人士。當中不少參加她的僱員再培訓課程的,都是60歲以上的長者,而她經營的社企「光咖啡」便是讓這群充滿社會經驗的人士,再大展拳腳的舞台。

 賦予第二人生

「喺再培訓局教嘅大部分都係60歲以上,都係咖啡熱愛者,鍾意做咖啡。」

常常有不同年紀的學生希望清清老師助他們接有關咖啡的工作,例如私人派對、宣傳活動等,可讓學生延伸開心和熱情,也能賺取收入。

「有啲人好想繼續做,將咖啡成為第二人生。60歲其實好後生,以前覺得好老,而家可能係另一個開始。」

持續發展社企

要做社企,似乎和外間的打卡咖啡店有點不同。

「賺錢……都仲未有呢回事,仲未攞到任何funding,要自己好努力用以前嘅積蓄,其實好艱難。」

「要搵錢嘅同時,又要有番平衡。點解有初心去做呢件事?點樣惠及多啲人?做嘅嘢好多時惠及到多啲人嘅需要,我就可以擺番入課程裡面。我都想為咖啡文化、為學生做多啲事情,將自己技術、知識、技能交到多啲人手上,對社會都有幫助!」

在這兩年多來的疫情,大型企業都尚且苟延殘喘,更遑論清清老師的微型社企。

「呢兩年真係好辛苦,所以真係要做啲產品,有嘢賣就可以伸延落去。」

正向思維

「好多良師益友同我講,你都唔識做生意,做生意同我做緊嘅嘢係兩回事!想做咖啡係一回事,可以做到好好味嘅嘢,但做生意係另一門學習!」

她明言除了希望有多幾位伯樂出現,也要盡量申請不同資金。但在這些救星出現之前,驅使她保持正面思想。

「靠學習保持樂觀與希望!人要常常抱住希望,心態要正面。如果你成日都抱住黑暗嘅心態或者負面心情,唔會做得好,亦都會影響到別人。不如學習多啲新嘅事物,學習多啲嘢幫到自己。」

早前清清老師憑着「光咖啡」躋身「金紫荊女企業家」行列,努力算是有所回報。因此縱使艱辛,她一定會繼續讓這個有意義的社企能持續發展下去。

在咖啡生涯中,做過最nuts的事情是甚麼?

論最瘋狂的事情,還是要走到她的表演舞台:課室。

「我好鍾意任何關於咖啡嘅新事物,又好鍾意調飲品。我真係會預備一大堆嘢,幾十支糖漿、好多支酒、好多配料,只係為做一樣嘢!」

「開始教sensory時發覺好多學生都幾難理解味道,飲到呢啲味嗰啲味,點做到出嚟呢?其實sensory呢樣嘢,飲到啲味唔係一朝一夕。我準備成枱食物,同學生做分享,慢慢細味咀嚼,試吓點樣同咖啡擺埋一齊!」

實習為先

清清老師自言她的咖啡課堂,與教大家欣賞咖啡的一般課堂不同。

「我唔係為教書而教書咁做一個課程,我係要大家有得着,能夠成功與進步。譬如手沖教9個鐘,你可能估唔到我係分3個level教。每一堂我見到同學真係沖得好過之前,佢哋就會想知道下一步做啲乜嘢,咁我就見到佢進步嘅過程。」

「呢個係實踐課程,同淨係欣賞咖啡,我畀你試飲嗰啲班係唔同,其實係改善班嚟嘅。我好多時將教嘅內容send咗畀大家先,叫佢哋返屋企睇,第二日返嚟淨係問問題,我唔花時間講PowerPoint。因為成個課程係實習住講理論,咁考試就會見到佢有推動力,更有進步。」

度身訂造

始終沖煮咖啡並非紙上談兵,死記硬背就能成事,清清老師十分注重實踐,同時更要理解每位學生。

「好簡單嘅沖法,其實重點唔係個沖法,而係佢點樣沖!係佢自己!每個人都唔一樣,仲要理解乜嘢因素,先會做到咁嘅結果。當你全部因素都理解,就會做到。而每個人都有自己手法,手長手短唔一樣,揸個煲揸高揸低、睇嘅眼界唔一樣。何必要學生死跟?重點係睇得到佢學習嘅時候動作手法,改善佢個人,因為每個人有差異。加埋晒咁樣先係好嘅教學與學習方法!」

跳出框框

多年來的教學,也使清清老師不斷蛻變。

「我以前個人好有『框』嘅。SCA係咁話㗎嘛,要93度水,喺咖啡機嗰度30秒出30毫升咖啡,就叫做標準espresso,所有嘢都有標準。」

SCA的標準也說明,要確認為深炒、中炒或淺炒的咖啡豆分別需要多少度;甚麼叫水洗、特殊處理法的具體定義等;清清老師都覺得自己身為教育者,是有責任把這些標準傳承下去。

「後來時日變遷就發現,呢個世界變咗好多!咖啡世界變咗好多,人嘅世界變咗好多,好多嘢都唔使有框嘅!」

「咖啡機就要9個bar(壓力萃取)?而家我6個bar都夠膽出!冇乜所謂嗰樣嘢係點樣,做咖啡最重要嘅係好味囉!」

「如果大家同意話最好味係6.5 bar,咁就6.5 bar!點解要9個bar?譬如好味要用100度水沖嘅,咁就用100度水沖!即使濾杯都有好多款,冇話最好,其實都係個性表現!」

堅持好味,保持初心,尋找平衡,凡事沒有絕對!

ImNuts

Urban Nutters是幾位熱愛飲食的Nutters成立的網上飲食媒體,訪尋各路飲食精英,深入淺出講解不同的飲食知識,同時召集一眾志同道合的Nutters,組織全港獨一無二的飲食社群。

留言

Your email address will not be published.