/

咖啡杯測世界亞軍Jaco   個性與態度篇 

Jaco(趙朗皓)是世界咖啡杯測比賽亞軍,也是香港比賽的冠軍,年紀輕輕已擁有一間非常特別的咖啡店,比很多咖啡走前了很多步。

這非一般的經歷,使他在不知不覺間,從觀察和親身經歷當中,洞悉到咖啡界、甚至香港人生活態度的問題。

咖啡,可能是扭轉這個境況的重要工具。

精品咖啡之門

Jaco是不折不扣的咖啡愛好者,讀書時已熱愛咖啡,愈喝得多便愈想明白更多,所以自發地買書進修,而畢業找工作時更全心全意找咖啡相關工作,目標非常明確。

即使在第一份全職咖啡工作之前,他已在Pacific Coffee當兼職,不過打開Jaco精品咖啡之門的,始終是Studio Caffeine。

「第一次接觸到精品咖啡得意味道嘅係Studio Caffeine新開時,同一堆朋友去飲吓,就開始接觸到手沖、虹吸、唔同產地咖啡豆,有飲Kenya、Costa Rica、印尼。飲Kenya飲到有番茄、黑加倫子糖,嗰時啲Kenya真係好好飲!而咁Costa Rica好似粟米田,印尼飲到啲米香!原來咖啡可以咁樣嘅!」

打工歲月

要與世界亞軍Jaco切磋技藝,可能要過五關斬六將,但要飲到出自他手的咖啡,到他營運的咖啡店或許比較容易。

不過在開自己的咖啡店前,Jaco同樣經過連鎖店的洗禮,也加入過著名精品咖啡店。

做了一定時間後,Jaco希望學習更多炒豆技能,便加入烘焙公司,但只幹了幾個月。

「我覺得佢畀我個價唔尊重,仲低過我做barista。係玩得OK開心,如果人工高啲我可以玩耐啲,但如果我say yes 就委屈自己,我又唔想咁做。」

然後在機緣巧合下,他又幫忙為新餐廳內設立咖啡吧,管理營運,他以前在精品咖啡店和連鎖店的經驗也派上用場。

「廚房以外嘅營運,都係由我砌嘅。」

個性之店

Jaco現時是Duet Cuts & Cups的老闆之一,店子除了有single origin espresso(簡稱SOE)飲,同時也是髮型屋。

「舖頭主要目的係試水溫,試吓我自己做一間咖啡店出嚟可以做到點。呢間舖其實投資唔大,月租平,風險又低嘅鋪好適合我視野,我想試吓自己營運生意,維持得到先有空間做自己想嘅嘢。」

「我見到好多其他咖啡店仲要貼緊錢,而家我仲有得賺少少,營運都順暢咗,對我來講滿足,要攞嘅嘢都攞晒,可以再大膽啲試其他嘢。」

解決問題

他說得輕鬆,始終一盤生意面對無數挑戰。即使由世界杯測亞軍營運,也不代表甚麼。

「我嘅獎同我舖頭嘅質素冇關,除非所有嘅啡係我沖,我只可以做好training,我喺鋪嘅時候就認真做。同埋我會同同事講,無論沖得好唔好,都要同個客講吓豆嘅資訊,引導下個客,無論你杯啡沖成點都要做呢樣嘢。唔做,就唔係精品咖啡!」

另一方面,咖啡豆質素也是他非常關心的一環。因為他的開舖初衷時,希望能把不同flavour profile的SOE帶給客人作比較,可惜他遇上了咖啡豆的質素問題,使他於初期順利實行了的想法,頓時寸步難行。

「一齊飲兩隻豆時候分唔出,仲要兩個產地唔近,印尼同埋美洲,點知飲落去好相似,就做唔到我想做嘅嘢。惟有轉吓炒豆供應商,搵其他地方SOE。」

同時他又慨歎,本地豆愈來愈貴,甚至比計入了運費,質素更佳的外國豆也要昂貴。

無論如何,身為咖啡師的他,絕對明白自己的使命。

「就算遇到豆唔得,都要令到啲客覺得好飲,要佢tune 到冇咁唔好飲。」

培養生活態度

Jaco和他的團隊有能力令咖啡豆在杯中的個性,發揮到好喝的最大極限,但談到香港的根本問題,便不是一朝一夕能解決。

「我想改變嘅唔係香港所有人,但我盡量想將對生活嘅熱情,同埋認真態度分享畀客人同朋友。你認真啲食吓嘢、飲吓嘢,飲同食嘅時候用吓個腦享受細節,分辨細節層次,所有嘢已經做到高質少少嘅生活!好簡單!你又唔一定要買啲乜嘢名牌、飲好貴嘅嘢,只係一種生活態度嚟。」

身為九十後的他,比很多營營役役的香港人,心水更清。

「點解香港生活文化會咁差?香港生活結構嘅問題,就係冇生活時間,咁就冇心機去發展生活態度,然後你就需要好急速、好有效率,你就唔會有時間分析味道細節。你諗吓,分析細節、分析圖表之類,唔會係一件快嘅事嚟。」

「無論佢係搵唔搵到錢嘅人,都冇時間!就係冇時間就發展唔到生活文化,我呢個思考唔會太錯!早前疫情,大家有段時間都home office,會煮飯、自己沖咖啡,係好咗少少,因為生活文化、態度,同你有嘅空閒時間多少,有直接關係!」

在咖啡生涯中,做過最nuts的事情是甚麼?

「為咗準備比賽,瘋狂去練聞香。因為有Scentone有100支,每日起碼聞夠30至50支!喺30至50支之外,再另外練多3、4次,同一隻味朝早、晏晝同夜晚聞都會唔同。嗰陣學到其中一樣嘢係,氣味嘅定位會有偏差,而我個定位都會用番自己味蕾。咁樣連續訓練左3個月,連放假都會朝早六、七點返去練,我連葡萄酒嗰套『酒鼻子』都練埋!」

感激之言

雖然Jaco的咖啡人生才幾年,但他仍想藉此機會感謝很多人。

Brian

「第一個全職嘅老細係佢,令我認識精品咖啡嘅係佢,一直令我好認識精品咖啡師嘅視覺,好多思維模式都係佢畀我,佢係我前老細但我哋一直都係close嘅。」

大輝

「我喺Pacific Coffee度識佢,好多嘢都係佢教嘅。我本身喺Pacific傻吓傻吓,然後Studio Caffeine搵人,大輝就話有個friend做精品要人,就叫我過去,好微妙嘅關係。佢仲有教過我要飲水思源,呢樣嘢係好重要㗎!

另外,他也要非常感謝Dixon、Chris阿謝,他們都非常照顧他。

Jaco腦袋內尚有無數夢想和計劃即將要實踐和實現,因為未成事所以尚且賣個關子,不過全部都對咖啡行業有肯定的助力,大家一定要拭目以待。

ImNuts

Urban Nutters是幾位熱愛飲食的Nutters成立的網上飲食媒體,訪尋各路飲食精英,深入淺出講解不同的飲食知識,同時召集一眾志同道合的Nutters,組織全港獨一無二的飲食社群。

留言

Your email address will not be published.

Popular