女性的感官是否特別細膩？身為全職咖啡師的Charlina十分注重自己的感官表達，她有一套屬於自己的科學化描述，這使她更可以了解每款咖啡豆的特性，讓愛啡之人更能享受手沖精品咖啡之樂趣。
人生主角
一般人口中的咖啡味，Charlina有這一套演繹。
「大部份人講嘅咖啡味，都係經過梅洛反應，同埋焦糖化出嚟嗰陣焦香。再講到精品咖啡，就真係有番咖啡豆入面啲好果味嘅風味，始終咖啡豆都係果實！」
但回想與咖啡的邂逅，都是來自茶餐廳或者罐裝咖啡，只有苦和酸，
「一畢業就出嚟做咖啡，其實我入行之前完全唔飲咖啡。我嗰陣時只係鍾意整甜品，覺得第時要開間coffee shop就不如去學咖啡。」
本來的配角，成為了引領她至今接近8年的主角。
「以前覺得咖啡可能好苦，飲落去好唔舒服，但原來飲落去可以咁甜、咁多唔同味道喺入面，打開咗新世界大門！」
味覺資料庫
在Studio Caffeine工作的Charlina，獲老闆Brian和已離隊的Joe的眷顧，店子以入口外國烘焙者咖啡豆為主打，她亦順理成章比一般咖啡師感受到更多。
「係幸運嘅，幾擴闊到眼界。香港roaster唔係好多間，尤其是以前生豆用來用去都係嗰幾隻。而我哋飲到外國豆，有唔同來源、有唔同farm畀我哋睇、畀我哋試！」
愈試得多，她便意識到自己的感官要進步，在日積月累的品試中，逐步建立一套自己的資料庫。
「我反而係覺得自己味覺唔敏感，所以想去研究。啲人話有橙味、有炒米、有提子味，一開始唔會感覺到…原來佢講緊嗰隻係炒米、提子味，點解我會飲唔到呢？覺得自己味覺好弱，所以會保持住研究。」
「靠咁多年飲咖啡嘅經驗，自己build up咗個library。覺得佢偏citrus、偏malic我就會去嗰方面聯想啲味道出嚟，大概係用啲咁嘅方式去講味道。」
無限處理的可能
咖啡豆有它本身的香氣味道，而精品咖啡更有所謂的特殊處理法，賦予咖啡豆更多性格。Charlina對此保持開放態度，最緊要是能讓咖啡豆發揮到最佳狀態。
「其實係額外加咗落去嘅味道，一定有影響豆本身嘅味道。要睇吓你點睇，農夫種植又好，處理方法又好，譬如Anaerobic效果去做有氧日曬又好，控制微生物生長環境嚟控制咖啡味道，點都一定有影響豆本身味道，只係睇你點樣可以帶出豆最好嘅一面！」
說到尾，身為咖啡師，要先做好功課，透徹了解咖啡豆的特性，才能為客人選出經過最佳處理方法的豆。
「譬如蘇丹汝魅，用日曬方法可以再帶出佢嘅特色出嚟，但水洗可能會爭啲好寫實嘅果酸。」
自然就是美
曾經風靡一時，有香精豆之稱的「音樂家系列」，Charlina也給予正面評語。
「其實好睇佢最尾做出嚟嘅效果自唔自然、飲落舒唔舒服，有人鍾意嘅話就會有市場。」
「精品咖啡嚟講，唔單止係飲緊豆本身嘅味道，如果係處理緊嘅時候加啲額外物質，我覺得可能做cinnamon或者之前做嗰啲koji yeast，加工過後嘅豆都有化學反應喺豆裡面發生咗，出嚟嗰陣有啲都幾自然嘅味，都算係A加B等於C嘅效果！」
對於這些處理法，Charlina有很美妙的比喻。
「個個都飲檸檬茶㗎嘞，真檸檬茶又好，紙包檸檬茶都好，都有人飲㗎啦！百貨應百客！」
在訪問下半部分，Charlina會分享一下她參加咖啡比賽的經歷之外，她早前開始研究咖啡的揮發性有機化合物（VOCs），這在她的咖啡旅程有甚麼啟發？另外她當然會講講自己最瘋狂的事！
