Charlina是全職咖啡師，向客人介紹和提供最美味的精品咖啡當然是她的工作，但她近年醉心研究咖啡的科學層面，除了香氣味道，還有揮發性有機化合物（VOCs），可算是向難度挑戰。何況，她是文科出身。
着迷研究
所謂VOCs，主要是在咖啡豆烘焙過程中的化學反應產生，可以主宰咖啡的品質。
「一開始都知道咖啡有VOCs，而我大概半年前開始接觸香水調製，發現原來都有VOCs，係一樣嘅嘢嚟！跟住就搵番咖啡入面嘅GC-MS report，然後對番手頭上面嘅原料，對吓對吓就編輯咗成件事出嚟！明白原來啲嘢係咁樣發生嘅！」
VOCs絕對是十分化學的題目，Charlina也同意，如要和其他人討論咖啡，這個題目着實太深奧。即使如此，近兩年她仍像着了迷般深入研究，就算自己是文科出身，要死記硬背也在所不計。
「深一定係深，但我自己好鍾意做研究，都會善用Google search。我自己本身都係文科，我唔係讀科學chemicals個啲嘢，有少少死記硬背，但加埋對原料嘅理解，加埋可能組合出適合自己、方便自己嘅嘢，等自己去理解。」網上資源可算無窮無盡，Charlina也趁機提醒年輕咖啡師，「炒場」的辛苦當然明白，但如有空閒也要努力上網接收新資訊。
參賽動力
了解到VOCs和咖啡質素、風味的關係，除了滿足她的研究之心，更像從後推了她一下，參加Barista Championship。
「其實又唔完全係比賽咁，對我嚟講有少少似係發布會。」
雖然未至於奪取冠軍，但她的現場表演贏盡口碑，也使人更關注咖啡中的VOCs。
「本身用mokka隻豆有局限嘅，我好清楚，最尾質素係點樣，但我都堅持用mokka去玩。鍾意揀mokka係好符合我主題，所以我好堅持！」
「比完賽我係極度滿足！聽到好多人講成個presentation成個表演咁，同我講good show，亦都帶到好多焦點去VOCs。好可惜係冇得再表演多一次，或者再攞高啲排名去製造多啲noise，去令多啲人關注件事。」
再接再勵
自古成功在嘗試，永遠可以再接再勵。
「改咗張計分紙之後我覺得幾啱我玩！但比賽唔係好啱我：壓力呀、前期準備嗰啲嘢，每次準備比賽都係折磨，會好大壓力，如果做唔到好完美嘅嘢出嚟，我寧願會唔出現！」
「因為攞出嚟表演嗰套嘢，唔係完全一開頭想做嗰樣嘢，cut咗好多嘢冇做到。因為主題太複雜，如果用番同一個主題，會用唔同嘅形式去展現！」
Charlina透露，要等待自己找到新想法才再挑戰Barista Championship，但如果香港有烘焙比賽，她非常希望挑戰。
在咖啡生涯中最nuts的事情是甚麼？
「想出一個kit set會有VOCs嘅原料去聞佢嚟做聯想。VOCs除咗喺咖啡裡面，亦可以喺好多生果裡面出現呢啲compound。我就想攞一個compound出嚟問大家會聯想到啲乜嘢呢？呢個kit set，我話畀你聽我自己聯想到啲乜嘢、佢會喺邊度出現。會有27支好似Scentone咁樣，去幫咖啡師建立一個自己嘅library！」「舉例，大眾對藍莓味嘅印象係點，我就會做一支藍莓嘅聞香器出嚟！暫時做嘅project會係呢個聯想kit set，算係人生最大project最crazy一件事，國外都冇人做呢件事！」
基因改造
Charlina不像市場上很多咖啡師，追求專業資格，或者參加無數比賽來增加自己的所謂競爭力，她仍然心繫咖啡豆的處理方法分析。
現今的咖啡本身都有使用基因工程咖啡豆，試想如果基因工程不再只為要搞好產量和抗蟲害，而是為了風味去做，會有多大的空間？
「我覺得呢樣嘢係會發生，我幾期待睇到一隻咁樣嘅咖啡出嚟。唔使再覺得係人為控制咖啡嘅outcome，例如手沖用咩方法沖、點樣烘焙、點樣做處理方法……」
「如果將成件事諗返轉頭多一步，去控制咖啡豆基因排列，會係好受爭議嘅主題，但我覺得無可避免！」
即使最靚的Geisha，處理方法來來去去只是水洗、日曬。還有甚麼可以做？
「冇辦法！呢個世界冇嘢係完美，你可能有A呢方面比較優勝，喺B方面會比較弱，好正常。本身大自然成個編排已經有好微妙嘅平衡喺度，我想睇吓人為方面嘅可以再點樣影響呢件事！」
「我諗處理方法仲有好多嘢玩嘅，呢個世界仲有好多發酵嘅食物、好多新發現，早兩年有酒麴， 我覺得會再有唔同嘅新嘢出嚟，期待再睇吓！」
正如無數咖啡愛好者，也正在期待Charlina在各方面的挑戰！
