非一般的咖啡路   咖啡活動策劃人Fiona Lau

每一個行業均由不同的專業崗位組成,各自飾演著小齒輪的角色。齒輪環環相扣,相互輔助彼此,要機器持續運行的話缺一不可。

以往咖啡相關的訪問對象離不開咖啡師、烘焙師或者咖啡店創辦人,至於今次受訪對像Fiona又是機件上的哪一個齒輪?又如何推動著「香港咖啡」這座有份量的大機器?

國際大賽搞手

席上Fiona與同樣喜歡咖啡的前輩,邊歎啡邊猜著杯中物的產地、風味和烘焙方法。當前輩拋出問題,問Fiona會怎樣界定自己在業界的角色時,世界彷彿停頓了一分鐘⋯⋯

「而家呢一刻,Hmm⋯我諗可以話係event搞手嘅⋯er⋯都可以咁樣講嘅,應該係嘅,你覺得呢?」她有點尷尬,生怕這個身份不被認同。

「最原先我係搞市集嘅,第一次搞市集要追溯到2018年聯合籌辦嘅『The Coffee Agenda咖啡生活市集』,另一類就係啲國際比賽嘅地區選拔賽,即係BC(Hong Kong Barista Championship 香港咖啡師大賽)、 Brewers Cup (香港手沖咖啡大賽)嗰啲。有時亦會擔當業界同商業品牌嘅中間人去促成交流活動、展覽、甚至搞期間限定概念店等等。」

從音符跳進咖啡界

Fiona不算是一個典型的「咖啡人」,並非一開始雄心壯志要「做咖啡」。她原本是鋼琴導師,自問當時對咖啡的認知比皮毛更皮毛,只停留於「Starbucks=咖啡」水平。可是,2015年於澳洲「工作假期」大開眼界後,她的生活便再離不開咖啡了。

「當時教琴教咗好一段時間,啲學生完成咗一個階段,自己都想take個break,有啲猶疑係咪要教一世琴,定係可以做吓其他嘢呢?所以去咗澳洲working holiday,嗰時真係大開眼界!」

「嗰時鬼識飲?喺香港以為飲緊杯Starbucks已經好勁,完全唔識搵咖啡小店,更何況咩手沖。」回憶當刻的自己,她都忍不住掩面。

大開眼界

「本身我零餐飲經驗,去到嗰邊諗住乜都試吓,點知畀我搵到間咖啡店做喎。嗰份就係我第一份關於咖啡嘅工!係一間好大型咖啡店嚟,有好多分店,所以啲管理好好,佢所有嘢都好系統化。不過,超忙!真係好忙!試過某一日我負責企打shot,由埋位開始4個鐘我都行唔開,廁所都去唔到,連客人再落嚟都驚訝問『點解仲係你?』不過我覺得嗰段時間對我嚟講係一個基礎嚟。」

「同埋澳洲始終成個文化好唔同,大家入到咖啡店都會好似見到朋友咁打招呼,成個氣氛好開心好親切,基本上每一間都係咁,所以畀咗個好好嘅感覺我。」

回港後,自然想延續於澳洲感受到的好,亦想以自己熟悉的語言學習更多咖啡知識,於是便開始入coffee shop做part time。而Fiona的咖啡圈亦因而「藤掕瓜瓜掕藤」般建立起來。

其後,她更與朋友於2018年創立了以期刊形式出版的《啡聞》,用一紙把香港咖啡人和事記載下來。漸漸,由不同咖啡活動的義工,進化成地區比賽中負責聯絡的小秘書,最後與多名前輩「撞吓撞吓」,撞到了自己的定位。

市集念頭之誕生

知道自己的長處不在沖一杯好咖啡的Fiona,靠著一股傻勁和朋友創辦了《啡聞》不久後,又再一次機緣巧合下當上了香港首個大型咖啡市集的聯合策劃人,是傻人有傻福,還是吸引力法則真的存在?

「喺香港沖啡叻嘅大有人在,sensory好嘅又有好多人,我唔覺得自己喺呢啲專業層面中做到咩,但我會想睇吓自己喺其他方面仲有咩可以做。因為我覺得一件事唔需要所有人做同一樣嘢㗎嘛,每個人將自己嘅崗位做好,最叻嘅人做番自己最叻嘅嘢,咁先可以將件事做得好。」

「主辦方本身一向好睇重創意,可能真係天時地利人和之下搵到我哋,我又諗起喺澳洲嗰時星期六日得閒就去行weekend market,而每個market都有好多元素,於是就一齊夾咗壇嘢出嚟,哈哈!」

互相交流

「我會視市集為咖啡界showcase,同埋係畀業界聚埋一齊嘅機會。正正因為多檔,檔主反而會諗多步,諗吓可以做啲咩去吸引客人埋嚟。每檔都有少少唔同,例如一檔出名淺炒、一檔專入市面好難買到嘅COE豆、另一檔專係深炒、嗰檔啲豆就專係for syphon嘅等等……所以我會話似一個party多啲!」

「其實當日啲檔主都會走嚟走去,互相去對方檔口睇嘢試嘢,唔止檔主同客人有交流,檔同檔之間都有交流。」

回想起自己第一次籌辦的市集活動,Fiona當然知道仍有進步空間,但大致上都滿意又滿足的。因為她既達到自己開首時為活動訂立的目標:「讓更多人認識或接觸咖啡」和「促進咖啡愛好者之間的交流」,亦暸解到自己「真係好鍾意呢件事」!因此才會繼續做,密密做,甚至在疫情期間,百業蕭條,明知困難重重,吃力不討好的情況下都要把咖啡界的恆常活動由線下移師線上。

「外間很多反對我愛你的聲音 任他怎麼講只要與你持續熱吻」

人多自然意見多,資訊發達的世代,當你以為IG story只在綠圈「密友」群內發放,誰知輾轉還是會變成「公開的秘密」。作為接洽的窗口,「行先死先,在所難免」,面對大家的矛頭,連Fiona身邊的朋友都曾經苦口婆心勸她「唔好再搞」,但這刻的她仍心繫5月上旬的比賽。

大學時期當過聯校活動搞手的筆者,聽到Fiona的工作範疇和籌辦國際比賽香港站的限制時,腦內隨即冒出兩個問題:

1)是甚麼驅使她當上這個「留下來的人」?

2)咁鬼煩又要受咁多氣嘅job好好pay㗎?

「哈哈哈,你覺得呢?大家都知咩情況㗎啦!」她補充:「我而家都要繼續教琴先夠生活㗎!」

「所有SCA轄下比賽,選手同評判相對係最大,我自己一定以選手行先,成件事最重要一定係公平公正。一旦有人有意見,作為地區籌委一定係跟番國際籌委派落嚟嘅規則。」

「不過我理解嘅,有啲feedback我都會聽嘅!我明白參賽者站喺自己嘅角度出發,睇嘅重點同搞手一定唔同,而且佢哋睇唔到full picture,所以有諗法係好合理。我聽過有人投訴直播啲聲收得唔好,攝影師擋住鏡頭⋯⋯喺我能力範圍內可以做到嘅,我當然會做啦!有邊個搞手唔想做好件事吖⋯最好梗係皆大歡喜啦!」

「我都聽過大家都對公布結果慢有意見,但真係冇計,有時評審意見唔一致傾耐咗,我冇理由干預㗎嘛!又正正因為重視,更加唔想出錯,所以先要覆檢,要對多幾次。」

寬容面對

背負著眾人的期望,加上國際賽的頭銜和自身的責任心,言談間雖看似「睇化晒」,但誰會相信她沒有壓力。

「大家站在觀眾或者選手嘅角度,佢咁講好合理;調番轉諗,假如有一日我面對唔熟嘅範疇,唔了解件事,批判嘅說話可能都好易講出口。經過咗咁多次搞活動,而家我會更易地而處,會體諒。哈哈,不過疫情完咗喇,今年終於可以有番實體賽喇!大家不如都係親身嚟睇,支持吓啲選手嘛!」

先處理心情 再處理事情

「至於你話點樣去釋放負面情緒呢,好彩我係嗰類轉換環境就可以轉換心態嘅人嚟,settle晒啲基本事務後咪去個旅行囉。我會選擇乜都唔聽唔睇,例如避開有參賽選手嘅咖啡店。」

「咁當然啦,調整咗心情之後都係要面對嘅,有啲想法係需要知嘅,之後再分析自己係咪已經做足本份。如果我係可行情況下做足本份,問心無愧,咁人哋講咩我都冇辦法㗎喇。」

「仲有,其實真係好好彩香港係國際賽編制裡面係一個獨立選區。前人一定係經過好多努力先爭取到。如果唔係好難打㗎,打完省又要打市,再打贏先出到個地區代表,有得搞梗係繼續搞,我好想香港可以再出個世界冠軍㗎!如果可以搞埋roasting就仲好!」

字裡行間,「哈利」都對「香港咖啡」抱著滿滿的愛和責任,當談到「想唔想好似倫敦或者東京咁有自己地方嘅咖啡節」,Fiona第一反應當然都說想。

但被問及「咁點解唔搞『香港咖啡節』」,Fiona和席上另一位咖啡前輩都不禁歎氣。

至於原因,正在閱讀這篇文章的大家都不妨想一想,我們下集再分享。

作者:j0ytotheworld

ImNuts

Urban Nutters是幾位熱愛飲食的Nutters成立的網上飲食媒體,訪尋各路飲食精英,深入淺出講解不同的飲食知識,同時召集一眾志同道合的Nutters,組織全港獨一無二的飲食社群。

留言

Your email address will not be published.