由零變壹
小時候受濃郁咖啡香氣吸引，無論人生第一杯麥當勞咖啡、茶餐廳啡走、檸啡，皆讓他心動。2012年，適逢瘋狂拉花年代，全城掀起一股咖啡狂熱，Zero亦跟隨潮流加入咖啡行業。
「好坦白，我都係見latte art好靚，所以揀當時較專注玩拉花嘅Habitu。」他興奮又帶點尷尬地自爆：「當時仲係小薯薯，乜都唔識，我仲收藏咗本陳豪親筆簽名的咖啡書㗎，哈哈！」當年未正式接觸過意式咖啡，初嘗Espresso的感覺竟然是：「吓？呢杯細細杯就係？好苦喎！」
入職一年後，漸漸掌握咖啡基礎和打奶技巧，更受到公司咖啡培訓導師King Sir的啟發，讓他明白咖啡味道比外觀重要。
「當時同事們好著重奶啡融合，仲教我心態調節，所以就算參加拉花比賽，我都好著重啡底味道。」 只得區區一年經驗，便膽粗粗參加了人生第一場咖啡比賽。他笑著憶述：「當時好鍾意玩拉花嘛！覺得自己好勁、啲拉花又靚，走出去同人Let’s get battle，點知輸得咁快！」
我好鍾意嗰種暴力萃取玩法
2014年，Zero轉跟Espresso Alchemy的老闆Peter學炒豆。4年間，有時到舖面練習各種咖啡沖煮，有時到工場處理炒豆。有天，Peter送了一台AeroPress給他，讓他嘗試新器具，點知一試便愛上。「我好鍾意AeroPress嗰種暴力萃取的玩法，可以好暴力地揸盡每粒咖啡豆精華！」
談到手沖，很多人會想起咖啡師站在手沖壺前，拿著水壺優雅地為咖啡豆注水，客人則凝視著緩緩留出的咖啡細注。如用虹吸壺，更像身處化學實驗室，望著底座的燈或火照射著下壺內沸騰的水，由下壺湧至上壺，浸出咖啡，再由上壺回落，何其浪漫。
AeroPress則沒有誇張式視覺效覺，反而只求樸實地沖泡出一杯好咖啡。這也可能代表了Zero的咖啡取向——用實而不華的器材為客人帶來最實在的咖啡、最優質的體驗。
事實上，一般人用88-90度沖泡咖啡粉3分鐘，便會壓出咖啡，但Zero為求咖啡的味道更醇厚和有層次，用94-95度熱水沖泡咖啡粉4分鐘，自創了一款「暴力」玩法，背後皆因對農夫的敬意。
「每次試豆，我都會用安全比例沖，然後再挑戰一兩次用暴力萃取，即係理論上和Recipe上都會問『得唔得㗎』咁去試。「我試過最暴力係哥倫比亞的WushWush*, 用95度熱水泡煮4分10秒先壓。水溫高，時間長，萃取到嘅物質多啲，有好aftertaste，成杯咖啡層次、味道都多啲！」「農夫用咁多心機種粒豆，點解唔試吓攞盡啲呢？」正因為AeroPress的特性，讓Zero發揮小宇宙，用心鑽研最好味道，帶來人生首個獎項，就是2017年香港愛樂壓比賽季軍，這就播下了開設Number 9的種子。
咖啡生涯最Nuts的決定
「All-In開舖！老婆、朋友都叫埋嚟一齊搞！」跟許多咖啡師一樣，Zero入行前已想開間歐陸式咖啡店，主打手沖咖啡、奶啡，兼賣一點蛋糕。發現AeroPress的優點後，令他更想以此為餐廳主題。
「當時一心想推翻AeroPress唔好飲嘅概念，啲客體驗過初期AeroPress，冇咁多配套同工具，出嚟嘅咖啡好雜、有渣。「其實佢可以攞盡粒豆嘅風味，因為手沖有濾紙會吸左啲咖啡油份，反而AeroPress用Metal Filter仲可以keep番啲油分同埋物質多D，令口感更順滑，呈現唔一樣既味道。」「飲咗咁多年咖啡，想搵比較實在嘅野。有時試過喺出面飲咖啡，入口好好飲好甜，但散得好快，有種『好飲喎……冇咗！』嘅一飲即逝感覺。漸漸就想追求一種長久嘅味道，希望呈現到畀客。」
有些客人開初都抗拒AeroPress，只得一成飲過，幸得Zero兩年來的用心經營和教學，現在只少三成顧客專程找Zero飲AeroPress咖啡。「多咗識欣賞自己嘅朋友，仲會同我傾偈，研究點樣沖得更好咖啡嘅recipe！」
日間看舖，夜晚炒豆，日日夜夜都活在咖啡的世界裡。如果當日沒有選擇自立門戶， Zero會做甚麼？
他想了一秒便答：「冇喎，我冇諗過會輸！係咪好自大？哈哈哈哈！你覺得自己唔得就唔得㗎啦，開始咗就要一鼓作氣，一路向前，冇backup㗎。」說得也是，創業的人跟打工的人，心態就是不一樣。
由打工銳變成老闆，有沒有想感謝的人？
「第一次總會遇到困難，有好多嘢唔識，真心嘅，好感激一路上好多人幫過我。Peter都幫咗我好多，到而家都有keep contact，不斷叫我諗多啲。」
現在事業初上軌道，下一個目標是甚麼？
「現在咖啡文化知識的推廣仍未足夠，早期客人飲開filter coffee，得一成飲過AeroPress，甚至要番手沖。」他希望用自己能力推廣更多，促進業界正面發展。
疫情數月，生意受一定打擊，但Zero仍堅持維持行業生態，毋忘初心。「成個疫情，我真係只做過外賣9折，大家知道成本幾多，假如我再平啲，隔籬兩間舖點算呢，鬥平有咩為？何況我想做長期嘅嘢，唔希望客人只是短期支持而幫襯。就算水深火熱，都會回想開舖的目的，如果只求一條簡單清晰嘅路，何不打工？盡可能保持開店時的初心，我都算係和平使者啦，哈！ 」
有人認為咖啡師只是大學期間的兼職首選，但細閱Zero的故事，十載未滿，便憑著一顆熱切的勇氣，堅定的信念，由白紙一張的「小薯薯」發展到自立門戶，自己炒豆，更獨創一套「暴力」沖煮方法，以提升咖啡的味道層次。說出來好像輕鬆，但只要憑魄力和衝勁，的確可以創一番成就。下次約朋友飲咖啡，不妨去尖沙咀探探Zero，感受下這種暴力萃取的獨有味道！
後記：有一種執著，叫沖煮時的執著。不知大家有沒有留意，儘管平時熱情奔放、滔滔不絕的咖啡師，每當進行手沖動作的時候，都會靜下來，展現出一副專注、沉靜的模樣，整段時間像靜止了一樣，「暴力Zero」也不例外，大概這就是欣賞咖啡沖煮過程中帶來治癒感的原因。
Barista Profile
陳瑋樑 Zero Chan 簡介
年資：2012年入行定位：Number 9 店長｜全職咖啡師
專長：使用愛樂壓 （AeroPress）
沖咖啡奬項：2017 香港愛樂壓比賽（Hong Kong AeroPress Championship）季軍
工作歷史：
– 2012 Habitu
– 2014 Espresso Alchemy
– 2018 Number 9
曾參與比賽：
– 2014 TNT香港拉花比賽
– Coffee Power Latte Art Competition – Colour Brown
– 2015 Hong Kong Barista Championship (HKBC)
– 2016 Hong Kong Barista Championship (HKBC)
– 2017 Hong Kong AeroPress Championship
– 2018 Hong Kong Brewers Cup (HKBrC)
– 2019 Hong Kong AeroPress Championship
最深刻的一杯啡：
2015，第一次HKBC比賽用嘅Espresso：Epithopia bita bonga的日曬 – 茉莉花和澳洲芒果，「任何人一入口，係芒果！好甜！好好飲！Body又正，好好飲！真係好好飲！」
第一次比賽經歷：
TNT香港拉花比賽。「當時好鍾意玩拉花嘛，嗰陣覺得自己好勁，啲拉花又靚，走出去同人Let’s get battle～，點知輸得咁快。哈哈哈！」
點為之一杯好咖啡：
「我講嘅tasting note，客人飲得到。」
入行經過：
2012被咖啡熱潮吸引，純為拉花而入行，發現味道的趣味後，輾轉下到Espresso Alchemy跟Peter學炒豆，偶然收到一個朋友送的AeroPress，一直發展至今
