要有門手藝
高高瘦瘦的豪仔，聲線溫柔細致，像極當咖啡師的材料，左看右看都絕不應做粗重工夫。
「因為只得中五畢業，學歷唔高，速遞、sales、婚禮布置、貼街招全部都做過。」這些粗重工夫令他不幸地爆了肺，令他的工種選擇更少，他決定集中申請蛋糕、甜品、咖啡這三個行業的工作。
輕鬆得來有門手藝，身體又應付到。做多4年同自己同期嘅大學生畢業出嚟，都可以競爭到。
有回音的只有一間兼賣咖啡的台式珍珠奶茶店，首先地方不整潔，咖啡粉不會準確量度，咖啡機還會發出嘰嘰聲和噴水。
「我唔係要嚟做呢啲嘢，本身想做蛋糕甜品先，咖啡擺最後。不過一開頭都係炒吓蛋、煎奄列。」
豪仔常常要送女朋友上班，途經大角咀一間只得一個人開工的café看到請人告示，便主動應徵。
「本身想做蛋糕甜品先，咖啡擺最後。嗰刻都未係好鍾意飲咖啡，心態係：興趣係培養出嚟。縱使我冇興趣，但我想培養佢、花時間投資落去，唔試點知鍾唔鍾意？卒之都係砌番半年三文治先！惟有靠自主學習，日日『炒場』邊個得閒理你？放工都攰，返屋企。悉心栽培你又唔知你會點！」
有人教他咖啡的事情，是一年後一位長工同事要離開之時。
機會來了
吃不消，好辛苦！但知道而家機會嚟，我盡量吸收。本身個人讀書唔叻，係要落手做，不停犯錯。冇乜天份，一定要不停咁錯。
縱使那時手沖咖啡未成氣候，兩星期都未必賣出一杯，但他仍想深入了解、拆解它。
「前人好多事都唔係講晒，尤其是手沖。點解我要打圈？點解要斷水？點解要呢個gram數嘅水…… 沖得好飲嗰個唔會話到畀你知點解咁樣做，總之咁就好飲啦 ，經驗嚟嘅！其實係可以拆解，但要花好多努力嚟數據化。」
豪仔試過努力學手沖，但總是裹足不前，瓶頸處處。即使跟足老師，沖出來仍是不一樣。
「磨咖啡粉後要浸濕佢，叫infusion，我一開始就計時，但有啲人落完水先計時，呢個好小嘅細節已經好挫敗。你唔會judge教你嘅人佢係咪教錯嘢、講少咗嘢，只係一味問點解我做極都唔得。嗰時知識有限，唔知咖啡豆每包唔同、底面唔同、沖落去breathe時間唔同。我淨係focus點解沖唔好，到底係咪轉少咗一圈？係咪慢咗一秒？」
日久生情
豪仔在訪問期間常重複自己「先天不足」、「個人比較蠢」之類，連他老闆也試過給他一次當頭棒喝。
「有新咖啡豆返嚟，叫我一齊試。以前試嘢唔叻，老闆話：『你試唔到分別？炒你㗎喎！』我就話會再試多啲，跟住就不停咁試。
「後來知道有trial & error呢樣嘢，跟住我就（用秒錶）計每30秒試一次，落完料又試一次，中段又試一次，每個細節唔同都試一次。可以諗吓一杯咖啡就唔知沖咗幾多次，每個factor都改一次，記住有咩分別。同時味覺增長咗，因為要分有咩唔同！
你冇了解嗰樣嘢，你唔係學習緊，你係copy緊！
好彩，豪仔愈試愈喜歡，這叫日久生情。
試得多，慢慢會搵佢好處、令你覺得開心嘅嘢！呢杯同上次飲好唔同，有驚喜！或者賣平一半但好飲過嗰杯貴嘅，會突然好開心！
登上世界舞台
興趣培養了出來，豪仔想更進一步，若無其事地推動他的老闆，又再輕描淡寫地着他參加Cup Taster比賽。
所謂Cup Taster比賽，即是參賽者要杯測不同咖啡豆的香味、味道、甜度、酸度、平衡度等，找出與別不同的一杯。
「佢隨口講話下年有比賽，你玩吓囉、攞支羹去飲咋嘛！」
除了500元報名費，這類比賽的成本最低，不用甚麼團隊、資金，有人甚至連自己的匙羹都不帶。
「我覺得都好喎，了解吓呢個行業做緊嘅嘢，唔係淨係屈喺舖頭。」
之後便展開了為比賽而作的訓練，相約志同道合的朋友互相學習，通宵達旦都是等閒事。
付出努力當然有回報，在香港得到冠軍後，世界賽入場券是最貴重的禮物。
「了解到自己視野幾咁狹窄！會匿埋角落頭，比賽之前個party，個個選手揸住杯啤酒同啲參展商傾偈，亞洲選手全部都縮埋一角，但又唔互相傾偈。外國人好social，目的唔係比賽，係交流！嗰一刻覺得，死啦點解我唔學好啲英文！鵪鶉咁縮埋一角！」
雖然這樣，他上台仍能展露大將之風。
上台前超級緊張，手震到咩都做唔到，但上到台嗰吓就冇嘢。因為初中時畀人推過去做美荷樓開幕司儀，我一上台講大家好，就嘭一聲跌晒啲MC卡落地！啤牌曬冷咁！有呢啲童年陰影，之後再上台都冇乜可以衰。」
豪仔在亞洲選手當中成績前列，惜未能晉身決賽，他當然會再挑戰，但也要等疫情後。
其實贏咗都唔可以囂，因為每年都有冠軍，你囂乜嘢？
推倒重來？
這些時間，也令他重新思想自己的方向，這時他想到身邊令他甚有啟發的戰友。
「我比賽助手同我沖咖啡嘅style係兩極端，佢比較傳統派，深炒、炭燒、做body感覺，好溫潤、回甘、有稠度，係感覺派，所有形容詞都好感性。
「我就係幾多gram、幾多秒流速、研磨度幾多……我係走風味有幾多個layer，重點唔係擺喺質感上。我好重視精準，而佢好重視感覺。我係trial & error逐步逐步𢱕石仔𢱕出嚟，但佢比我做得更好，保留到以前沖煮方法概念，亦加咗新世代元素。
「我成日想推散佢（自己嘅做法）重新嚟，但好難，因為我個框架起得太穩，無意識咁掣肘咗你。」
如何才算理想的café？
「有啲好高級日式酒吧，佢點樣令你覺得杯嘢好飲？就係由客人踏入門口第一刻開始！當我入到間café，個個都㩒電話，咁係唔得嘅！你個樣如果放鬆得太多，會暴露咗你內心出嚟，要有番個專業喺度。誠懇啲又好，friendly啲又好，要畀你覺得你係想同客人溝通。咖啡師除咗調整咖啡之外，另一個工作就係溝通，客人唔識唔了解就唔識欣賞。客人入嚟唔同你講嘢，第一步已經斷咗，可能買完杯latte就走，呢個行業需要咁，唔係好難前進，都係變咗Starbucks咋嘛。」
怎樣才算好喝的咖啡？最深刻的一杯又是怎樣？
「大部分初初接觸咖啡嘅人都會接觸到Ethiopia水洗。好舒服，每一日都可以飲 ，我會好鍾意。好普通好平凡，唔會令你厭，飲完想再飲，價錢唔會特別貴。
「杯咖啡會令你想繼續飲落去，亦係我沖手沖嘅宗旨。點樣為之沖好佢？係客人飲完第一啖會飲第二啖第三啖……飲晒成杯。而家好多咖啡味道好強烈，好aggressive，一飲覺得好得意，有士多啤梨味、有酒味……每日都呢啲味會攰！
「至於印象最深刻，就係接近成千蚊但我覺得唔好飲，係咩咖啡就唔好講喇。」
在工作生涯、咖啡歷程中做過最Nuts的事情是甚麼？
「就係當初不停𢱕石仔咁樣試咖啡嘅過程，飲飲飲飲飲到凌晨，第日再返工，不停試到胃都痛埋。又為咗比賽去鑽研烘焙，問朋友借烘棓機，不停炒不停聞，咁會對個鼻有damage，我直頭玩到流鼻血。想做好，就會不停試，畀好多錢買好貴嘅咖啡豆返嚟試，自殘咁樣！結果都係值得嘅，付出咗我唔會後悔！」
漫畫店老闆的肺腑之言
回想當年，使豪仔知道為甚麼要學一門手藝，不是父母、不是老師，而是一位好像很不重要的人。
「一間租漫畫舖頭，兼補習社，一個三十零歲嘅老闆，會同小朋友講啲心理建設，譬如 將來社會係點、有冇諗過將來想點。佢話讀唔成書完全冇問題，唔好嘥錢補習，搵你鍾意嘅嘢，興趣係培養嘅！你要同人競爭，憑咩競爭？幾深遠影響！
「我好用力去做做咗八、九年唔擅長嘅嘢，仲要面臨測試去話畀我知我真係唔成功！咁點解唔做啲擅長、或者未知我擅唔擅長嘅嘢？」
世界很大，沒有人可以限制任何人朝甚麼路線發展。生命很短、時間很少，甚麼都應該試，尤其未做過的事，它很可能帶領你的人生進入前所未有的領域。
Barista Profile
鄺偉豪 Chris Kwong 簡介
年資：2013年加入Craft Coffee Roaster
定位：手沖咖啡師、烘焙師、杯測師
專業：手沖咖啡，Cup tasting
興趣：周圍食
個人名譽：
– 2015 香港咖啡杯測大師賽 – 冠軍
– 2016 World Cup Taster Championship – 11th Place, Semi-Finals
– 2019 香港咖啡沖煮大賽Hong Kong Brewers Cup – 冠軍
– 2019 World Brewers Cup Championship – Rank 21
